PJ《P仔樂園》

大家有冇試過一件怪事?
明明你訂閱咗某個 YouTube Channel,
過咗一段時間入去睇,竟然發現自己冇訂閱?

最近,發生喺我自己身上。

我嘅頻道唔大,但我真係默默做咗幾年,
每個月可能得一百幾十人訂閱,
慢慢慢慢咁累積上去。

喺兩個月前,我終於睇到個數字去到 19987。
心入面諗:快到兩萬啦,係一個對我嚟講好有意義既里程碑。
雖然唔係乜大成就,但代表咗有一班朋友係度默默咁支持緊自己。

但由嗰陣開始,怪事出現。

每日都見到——朝早會多十幾個訂閱,
夜晚睇返少咗二三十。
係咁連續兩個月,日日如此。

我知,有人退訂係常態,唔應該太介意。
但係當件事變得「不尋常地一致」時,
你就會開始懷疑:係咪我做錯咗咩?定係平台有 Bug?定係⋯⋯?

直到有朋友話:「喂,我冇退訂你喎,不過入去睇,發現自己被退咗。」

聽到呢句,我真係無言。

我唔係要鬧 YouTube,
只係想講,對一個小頻道嚟講,每一個訂閱都唔容易。
你唔係追數,但係你明白「有人選擇留低」嘅意義。
所以當人自動被退走,你唔係嬲,只係有啲心淡。

我唔知你哋有冇遇過同樣嘅情況?
係咪我唔夠好?定係系統有錯?
你哋又曾幾何時發現自己冇再 follow 某啲明明一直好支持嘅人?

唔係抱怨,只係誠實分享一段感受。
或者,就算真係少咗人睇,
只要仲有你一個真心留低,
我都會繼續拍落去。

#默默做咗幾年都係珍貴的路
#YouTube自動退訂
#望住兩萬訂閱都幾得意
#多謝每一個冇被退走嘅你

1 week ago | [YT] | 109