Azad Iran

Lavrov: “İrana hücum odla oynamaqdır!”

Rusiyanın Xarici İşlər naziri Segey Lavrov “Əl-Ərəbiyyə” kanalına eksklüziv müsahibəsində ötən ilin iyun ayında İran ilə İsrail arasında 12 günlük müharibəyə və ABŞ-ın müdaxiləsinə işarə edərək bildirib ki, İrana əvvəlki hücum mənfi nəticələr doğurub.

O vurğulayıb ki, İranın nüvə obyektlərinin hədəfə alınması çox təhlükəlidir və Tehranın daha sərt müdafiə tədbirləri görməsinə səbəb ola bilər.

Rusiya Xarici İşlər nazirinin sözlərinə görə, İran nüvə öhdəliklərinə sadiq qalıb və İsrail ilə ABŞ-ın hücumu riskli addım olub.

Lavrov xəbərdarlıq edib: “Hamı bilir ki, İrana yenidən hücum etmək odla oynamaqdır və ərəb ölkələri də İranda vəziyyətin gərginləşməsini istəmirlər”.

O əminliyini ifadə edib ki, Beynəlxalq Atom Enerjisi Agentliyinin müfəttişləri geri qayıdacağı təqdirdə Tehran onlarla əməkdaşlıq etməyə və uranın zənginləşdirilməsini dinc məqsədlər üçün tələb olunan səviyyəyə qədər azaltmağa hazırdır.

Lavrov vurğulayıb ki, heç bir tərəf nüvə silahının yayılmasını istəmir, lakin İranın uranı dinc məqsədlər üçün zənginləşdirmək hüququ vardır.

14 hours ago (edited) | [YT] | 21

Azad Iran

Taliban İrana kömək edəcək

Əfqanıstandakı Taliban hökumətinin sözçüsü Zəbihullah Mücahid fevralın 15-də bildirib ki, ABŞ İrana hücuma keçərsə, Taliban İranla əməkdaşlıq etməyə hazırdır.

“Əgər amerikalılar İrana qarşı müharibəyə başlasalar, biz İrana kömək etmək üçün bütün imkanlarımızdan istifadə edəcəyik” – deyə, Mücahid bəyan edib.

“Radio İran”ın puştu xidmətinə verdiyi müsahibədə Mücahid söyləyib ki, hücum halında və kömək istənildiyi təqdirdə, Kabul Tehrana dəstək verəcək.

O əlavə edib ki, İran ötən ilin iyun ayında İsraillə 12 günlük müharibədə qalib gəlib və ABŞ hücum edərsə, İran yenidən qalib gələcək.

3 days ago (edited) | [YT] | 35

Azad Iran

“Sepah” yenə Azərbaycanı hədələdi

İran İnqilabının 47-ci ildönümü münasibətilə keçirilən rəsmi tədbirdə ölkə prezidenti Məsud Pezeşkianın bir sıra qonşu dövlətlərlə yanaşı, Azərbaycana və onun prezidentinə təşəkkür etməsi ilə eyni vaxtda İslam İnqilabının Keşikçiləri Korpusuna, yəni “Sepah”a bağlı media resursları Azərbaycanı növbəti dəfə hədələyib.

“Sepah”ın rusdilli kanalı “Amerikanın cəzalanacağı gün yaxınlaşır” başlıqlı paylaşımda yazıb:

“Ərazisində ABŞ hərbi bazaları olan və düşmənlə əməkdaşlıq edən Birləşmiş Ərəb Əmirlikləri, Qətər, Bəhreyn, Küveyt, Azərbaycan və digər ölkələr bunun mümkün nəticələrini anlamalıdırlar. Ermənistan da diqqət dairəsindədir. İntiqam günü yaxınlaşır”.

Daha əvvəl sözügedən kanal bu günlərdə regiona səfər etmiş ABŞ-ın vitse-prezidenti Ceyms Devid Vensin Azərbaycan və Ermənistan rəhbərləri ilə fotolarını paylaşaraq yazıb:

“Qafqazda böyük müharibənin təməli qoyuldu. Qurbanlar artıq seçilib. Öz təhlükəsizliyindən söhbət gedəndə, İran heç kimlə zarafat etmir”.

Beləliklə, qonşu dövlətlər, o cümlədən Azərbaycan Respublikası İran ətrafında gərginliyin azaldılmasına və mümkün müharibənin qarşısının alınmasına çalışdıqları halda, İran hakimiyyətinin bir qanadı həmin qonşuları hədələməyə davam edir.

1 week ago (edited) | [YT] | 20

Azad Iran

İranda qadınların motosiklet sürmək hüququ tanındı

İran mediası bildirir ki, İranda qadınlar rəsmi olaraq motosiklet sürücülük vəsiqəsi ala bilərlər və bu da ikitəkərli nəqliyyat vasitələri ilə bağlı illərlə davam edən hüquqi qeyri-müəyyənliyə son qoyur.

Bu qərar ötən ay ölkə miqyasında rejim əleyhinə etirazların qanlı şəkildə yatırılmasından sonra verilib. Əvvəllər qanun qadınların motosiklet sürməsini açıq şəkildə qadağan etmirdi, lakin hakimiyyət orqanları praktikada sürücülük vəsiqəsi verməkdən imtina edirdi və qadınlar qəza halında qanuni məsuliyyət daşıyırdılar.

İLNA xəbər agentliyi İranın birinci vitse-prezident Məhəmməd Rza Arifin yanvar ayının sonlarında kabinet tərəfindən təsdiqlənən bir fərman imzaladığını bildirib. Fərman yol polisindən qadınlara praktik təlim keçməsini, nəzarətli testlər icra etməsini və motosiklet sürücülük vəsiqələri verməsini tələb edir.

İranda 1979-cu il inqilabından bəri qadınlar geyim qaydaları da daxil olmaqla, geniş sosial məhdudiyyətlərlə üzləşiblər. Lakin maraqlıdır ki, 2022-ci ildə hicab qaydalarını pozmaqda ittiham olunaraq qətlə yetirilən Məhsa Əmininin ölümündən sonra, xüsusən də böyük şəhərlərdə qadın motosikletçilərin sayı kəskin şəkildə artıb.

2 weeks ago (edited) | [YT] | 12

Azad Iran

Pezeşkian yenə “Günahkar bizik!” dedi

İran prezidenti Məsud Pezeşkian ali rəhbərin əyalətlərdəki nümayəndələri ilə görüşdə ölkədə baş verən etirazlarla bağlı hakimiyyətin məsuliyyətini vurğulayaraq bir daha: “Günahkar bizik!” deyib.

“Biz problemlərimizi müəyyənləşdirib qarşısını almalıyıq” – deyə, prezident əlavə edib.

Pezeşkian önəmli bir məqama işarə edərək deyib: “Əsas problemlərimizdən biri budur ki, biz fərqlilikləri qəbul etmirik. Kim bizdən fərqlidirsə, onun inqilaba və islama zidd olduğunu iddia edirik. Halbuki belə deyil. Əgər fərqlilikləri qəbul etsək, bir çox ictimai problemlər həllini tapar”.

İran prezidenti etirazçılara qarşı güc tətbiqinin son addım olduğunu bildirib və buna qədər gərəkli tədbirlərin görülməsinin vacibliyini qeyd edərək söyləyib: “Mən ali rəhbərin yanında da demişəm ki, biz çalışıb etirazçılara qoşulanları öz tərəfimizə çəkməliyik. Axırda görməli olduğumuz işi əvvəldə etməməliyik”.

Pezeşkian həmçinin deyib: “Gənc nəslə diqqət yetirməmək, onların ehtiyac və tələblərindən xəbərsizlik son hadisələrin baş verməsinə zəmin hazırlayıb və etirazların əsas səbəblərindən biri olub”.

3 weeks ago (edited) | [YT] | 202

Azad Iran

Donald Tramp: “İrana yeni lider lazımdır”

ABŞ prezident Donald Tramp yanvarın 17-də “Politico” nəşrinə verdiyi açıqlamada İranın ali rəhbəri Ayətullah Əli Xameneyinin 37 illik hakimiyyətinə son qoyulmasını tələb edib. Tramp: “İranda yeni lider axtarmağın vaxtıdır" – deyib.

Son üç həftə ərzində İranda minlərlə etirazçı öldürülüb və Tramp dəfələrlə İran hakimiyyətini hərbi müdaxilə ilə hədələyib. Xameneyi isə dünən etdiyi çıxışda: “Biz ABŞ prezidentini İran xalqına vurduğu itkilərə, zərərlərə və böhtanlara görə günahkar hesab edirik” – söyləyib.

Tramp bu açıqlamaya münasibət bildirərkən deyib: “Bir lider kimi Xameneyinin günahı ölkənin tamamilə məhv edilməsi və əvvəllər görünməmiş səviyyədə zorakılıqdan istifadə etməsidir. Ölkənin fəaliyyətini davam etdirməsi üçün - bu funksiya çox aşağı səviyyədə olsa da - rəhbərlik, mənim ABŞ-da etdiyim kimi, ölkəsini düzgün idarə etməyə və nəzarəti saxlamaq üçün minlərlə insanı öldürməməyə diqqət yetirməlidir”.

Tramp əlavə edib: “Liderlik qorxu və ölümə deyil, hörmətə bağlıdır”.

Tramp daha sonra Xameneyini və İranın idarəetmə sistemini pisləyərək deyib: "Bu adam xəstə bir adamdır və ölkəsini düzgün idarə etməli və insanları öldürməyi dayandırmalıdır. Onun ölkəsi zəif liderliyə görə bütün dünyada yaşamaq üçün ən pis yerdir."

1 month ago (edited) | [YT] | 26

Azad Iran

Məşhur satirik jurnal Rza Pəhləvinin karikaturasını dərc edib

Fransanın məşhur “Charlie Hebdo” həftəlik satirik jurnalı keçmiş İran şahının oğlu Rza Pəhləvinin İranda hakimiyyətə gəlmək iddialarına özünəməxsus münasibət bildirib.

Jurnal son sayının ilk səhifəsində Rza Pəhləvinin karikaturasını dərc edərək yazıb:

“Şahın oğlu da molla kimi axmaqdır!”

Aşağı hissədə isə Rza Pəhləvinin dilindən yazılıb:

“Amma mənim papağım daha gülməlidir!”

1 month ago (edited) | [YT] | 29

Azad Iran

Omanın Xarici İşlər naziri İrana mesaj çatdırıb?

Yanvarın 10-da İranda kütləvi etirazların qızğın çağında Omanın Xarici İşlər naziri Bədr əl-Busəidi Tehrana səfər edib. O, iranlı həmkarı Abbas Əraqçi ilə görüşüb və onunla birgə mətbuat konfransı keçirib.

Səfər çərçivəsində Oman Xarici İşlər naziri İran prezidenti Məsud Pezeşkian ilə də görüşüb. Pezeşkian görüş zamanı İrandakı etiraz aksiyalarının arxasında ABŞ və İsrailin dayandığını vurğulayaraq deyib:

“ABŞ İran İslam Respublikasının bəzi digər ölkələr kimi olduğunu düşünərək, müəyyən qrup insanları xaos və iğtişaş yaratmağa təhrik edir, halbuki İran əhalisi öz ölkəsini və mövcud quruluşu əvvəlkindən daha güclü şəkildə dəstəkləyəcəkdir”.

Oman Xarici İşlər naziri öz növbəsində İranın Oman üçün mühüm strateji tərəfdaş olduğunu qeyd edərək deyib: “Oman İranla dostluğuna sadiqdir və İran xalqının problem və çətinliklərini həll etmək üçün hər cür kömək göstərməyə hazırdır”.

Qeyd edək ki, səfərdən bir gün əvvəl jurnalistlər Abbas Əraqçiyə Omanın baş diplomatının İrana hansısa mesajı çatdırmaq üçün Tehrana gedəcəyi barədə sual vermiş, o isə: “Mən bilmirəm, Oman Xarici İşlər naziri özü ilə bir mesaj gətirəcək, ya yox; sabaha qədər səbir etmək lazımdır” – deyə, bildirmişdi.

Əksər təhlilçilər indiyədək Omanın ABŞ-İran təmaslarında vasitəçi rolunu nəzərə alaraq, Xarici İşlər naziri Bədr əl-Busəidinin məhz indiki məqamda Tehrana səfərinin təsadüfi olmadığını və aparılan danışıqların yalnız ikitərəfli əlaqələrlə məhdudlaşmadığını düşünürlər.

Skip the Carousel

1 2

1 month ago (edited) | [YT] | 30

Azad Iran

İran saytının baş redaktoru Azərbaycanı hədələyib

İranın “Səd-onlayn” saytının baş redaktoru yanvarın 2-də dərc etdiyi məqaləsində Azərbaycanın ünvanına təhdid xarakterli iddialar qələmə alıb. “Bakı diqqətli olsun: şirin quyruğu ilə oynamaq zarafat deyil” başlıqlı yazıda Azərbaycan mediasının İranda baş verən kütləvi etiraz aksiyalarını işıqlandırmasından qəzəbli şəkildə bəhs olunub və Azərbaycan mətbuatı bu mövzuda “təxribat xarakterli” materiallar dərc etməkdə və “İran İslam Respublikasının imicini ləkələməyə çalışmaqda” ittiham edilib.

Yazıda iddia olunub ki, guya Azərbaycan mediasında İrandakı “dağınıq daxili etirazlar koordinasiyalı şəkildə şişirdilərək təhlil edilir və düşməncəsinə bir tonda etirazların səbəbi olaraq idarəetmədəki səhvlər və ya xarici iqtisadi təzyiq deyil, bilavasitə İranın təhlükəsizliyinin və regional qüdrətinin sütunu olan İslam İnqilabının Keşikçiləri Korpusu (“Sepah”) göstərilir”.

Baş redaktorun iddiasına görə, “bu təbliğat xətti təsadüfi deyil, çünki açıq şəkildə Türkiyə və İsrail mediası xəttində fəaliyyət göstərən Azərbaycan mətbuatı uzun müddətdir ki, İranın şimalında “müqavimət oxu”nun mövqeyini zəiflətməyə və ictimai rəydə süni narazılıq yaratmağa yönəlmiş bir layihə həyata keçirir”.

“Lakin onların səhv hesablaması bundadır ki, onlar İranın strateji səbir potensialını düzgün dərk etmirlər” – deyə, baş redaktor əlavə edib.

Yazının müəllifi daha sonra hədələyici tona keçərək yazıb: “Kiçik bir ölkə olan Azərbaycan Respublikası media oyunları və əsassız təxribatlar yoluna davam edərsə, onun zahiri müttəfiqləri bir gün onu bu oyunun bədəlini ödəməyə məcbur edə bilərlər”.

Baş redaktor məqaləyə aşağıdakı “xəbərdarlıq” ilə yekun vurub: “Şirin quyruğu ilə oynamayın. Bakının İranın daxili işlərinə hər hansı bir media və ya təhlükəsizlik müdaxiləsi cavabsız qalmayacaq. Tarix göstərir ki, İranın qüdrəti ilə zarafat edən hər kəs sonda özü tarixə qovuşub”.

Beləliklə, 12 günlük müharibə dövründə olduğu kimi, ölkəni etiraz aksiyalarının bürüdüyü hazırkı gərgin günlərdə belə, İran mediası anti-Azərbaycan təbliğatından əl çəkmir. Qəribə burasıdır ki, bütün dünyanın İslam Respublikası rejiminin xalq etirazları sayəsində tarixə qovuşacağından bəhs etdiyi bir şəraitdə, İranın media rəhbəri başqalarını bu cür aqibətlə “qorxutmağa” çalışır!

1 month ago (edited) | [YT] | 31

Azad Iran

Sizcə, İrandakı kütləvi etirazlar nə ilə nəticələnəcək?

1 month ago | [YT] | 12