Property विशेष

30 हजार पगारात म्हाडाचं घर मिळू शकतं का?

नमस्कार, मुंबई आणि पुण्यासारख्या शहरात स्वतःचं हक्काचं घर असावं, हे प्रत्येकाचं स्वप्न असतं. पण सध्याच्या महागाईच्या काळात जिथे सर्वसामान्यांचा पगार २५ ते ३० हजारांच्या घरात असतो, तिथे हे स्वप्न कसं पूर्ण होणार? हा प्रश्न अनेकांना सतावतो. पगार कमी असल्याने म्हाडाचं घर आपल्याला मिळूच शकत नाही, असा गैरसमज अनेकजण बाळगून असतात. पण आता चिंता करण्याची गरज नाही, कारण याच वर्गासाठी म्हाडाने एक मोठी संधी उपलब्ध करून दिली आहे. फक्त ३० हजार पगार असलेले लोक म्हाडाच्या कोणत्या कॅटेगरीत येतात आणि त्यांना घर कसं मिळू शकतं? पाहुयात यावरचा आमचा हा विशेष रिपोर्ट...

सध्या मुंबईत छोटंसं 1RK किंवा 1BHK घर भाड्याने घ्यायचं म्हटलं, तरी ८ ते १५ हजार रुपये सहज खर्च होतात. म्हणजेच ३० हजार रुपये पगार असणाऱ्यांचा अर्धा पगार केवळ घरभाड्यातच जातो. उरलेल्या पैशात महिन्याचा खर्च, प्रवास आणि इतर गोष्टी भागवताना बचत शून्यच उरते. अशा परिस्थितीत 'आपलं स्वतःचं घर कधी होणार?' हा प्रश्न निर्माण होतो.

पण कमी पगार असलेल्यांसाठीच म्हाडा खास योजना राबवते. सध्या म्हाडाच्या मुंबई मंडळाने तब्बल २ हजार ६४० घरांची नवीन लॉटरी सुरू केली आहे, ज्यात वेगवेगळ्या बजेटमधील घरे उपलब्ध आहेत. विशेष म्हणजे, म्हाडाच्या कोकण मंडळाची जाहिरातही लवकरच येण्याची शक्यता असून, यामध्ये अवघ्या २० लाखांपासून घरे मिळतील अशी माहिती आहे.

आता पाहूयात ३० हजार पगार असलेले लोक कोणत्या गटात येतात?

म्हाडाच्या लॉटरीत उत्पन्नानुसार चार गट (Categories) पाडण्यात आले आहेत:
EWS (अत्यल्प उत्पन्न गट): वार्षिक उत्पन्न ६ लाखांपर्यंत.
LIG (अल्प उत्पन्न गट): वार्षिक उत्पन्न ६ ते ९ लाखांपर्यंत.
MIG (मध्यम उत्पन्न गट): वार्षिक उत्पन्न ९ ते १२ लाखांपर्यंत.
HIG (उच्च उत्पन्न गट): वार्षिक उत्पन्न १२ लाखांहून अधिक.

जर तुमचा पगार महिन्याला ३०,००० रुपये असेल, तर तुमचं वार्षिक उत्पन्न ३ लाख ६०,००० रुपये होतं. म्हणजेच तुम्ही 'EWS' गटात अगदी सहज पात्र ठरता. म्हाडाच्या नियमानुसार, EWS गटातील अर्जदार फक्त EWS साठीच नाही, तर LIG गटासाठीही अर्ज करू शकतात. म्हणजेच कमी पगार असूनही तुमच्याकडे घर लागण्याचे दोन पर्याय (Chances) उपलब्ध असतात.

अर्ज करताना ही खबरदारी नक्की घ्या: म्हाडाच्या लॉटरीत अर्ज करताना काही नियम पाळणे अत्यंत गरजेचे आहे. जर तुम्ही विवाहित असाल, तर केवळ तुमचं नाही, तर तुमच्या जोडीदाराचं (Spouse) उत्पन्नही एकत्र मोजलं जातं. या प्रक्रियेत कोणतीही चुकीची माहिती दिल्यास किंवा माहिती लपवल्यास अर्ज थेट रद्द होऊ शकतो आणि भरलेली अनामत रक्कमही परत मिळत नाही. तसेच, उत्पन्नाचा भक्कम पुरावा म्हणून आयकर रिटर्न (ITR) किंवा तहसीलदाराचा दाखला देणे अनिवार्य आहे, इतर कोणतेही कागदपत्रे ग्राह्य धरली जात नाहीत.

तर मित्रांनो, 'माझा पगार कमी आहे, मला चान्स नाही' हा गैरसमज आताच मनातून काढून टाका आणि म्हाडाच्या या सुवर्णसंधीचा नक्की लाभ घ्या. म्हाडा, सिडको आणि प्रॉपर्टी क्षेत्रातील अशाच अचूक आणि महत्त्वाच्या अपडेट्ससाठी फोटोच्या खाली दिलेल्या subscribe या बटनावर क्लिक करून आपल्या "पाटील प्रॉपर्टी न्यूज" चॅनेलला आत्ताच सबस्क्राईब करा आणि भविष्यात म्हाडा सिडकोचे ताजे अपडेट मिळवण्यासाठी बेल आयकॉन दाबायला विसरू नका.

4 months ago (edited) | [YT] | 14