كورسات هندسية

فين الجماعة بتوع #حقوق_الإنسان والحيوان من رحمة النبي ﷺ؟
الجماعة اللي شاغلين بالهم بشعارات حقوق العمال وحقوق الإنسان والحيوان، وبيحاولوا يظهروا الدين كإنه مجرد قيود وحِمل تقيل على الناس..

تعالوا بس ثانية واحدة يا شوية .... شوفوا "نبي الرحمة ﷺ كان بيفكر فينا إزاي، وبيحس بتعب العامل المسكين قبل أي حد في الدنيا
من أكتر من 1400 سنة، وقبل ما تطلع قوانين "ساعات العمل" والمنظمات الدولية .... كان سيدنا النبي ﷺ بيحط دستور للرحمة والإنسانية
الحكاية وما فيها ....
سيدنا النبي ﷺ كان شايف أصحابه والعمال والناس اللي بتسعى على رزقها في أجواء الجزيرة العربية والشمس حارقة.. فما رضيش عليهم التعب، حتى في #الصلاة اللي هي أهم حاجة في الدين وفي الوجود!

قال النبي ﷺ (في الحديث اللي رواه البخاري ومسلم)
"إذا اشتدَّ الحرُّ فأبْرِدوا بالصلاةِ؛ فإنَّ شدةَ الحرِّ من فَيْحِ جهنَّمَ"

يعني إيه الكلام ده؟
بكل بساطة : لما الحر يشتد، ما تنزلوش تصلوا الظهر في وقت الذروة.. اهدوا واستنوا لما الجو يبرد شوية والحيطان يكون لها ظل يلطف الجو، وبعدين انزلوا صلوا براحتكم

تخيلوا العظمة والرحمة؟
النبي ﷺ مش عاوزك تروح المسجد وأنت بتنهج من الحر، أو تتهد طاقتك تحت الشمس

النبي ﷺ بيطبطب على العامل اللي شغال في موقعه أو الفلاح اللي في غيطه، وبيقوله "ارتاح.. ربنا مش عاوز يعذبك، ربنا عاوزك تعبده وأنت مستريح

ورونا في قوانينكم وفي شعاراتكم #رحمة" توازي رحمة نبي خاف على أمته من #ضربة_شمس فعدّل ليهم وقت العبادة رأفةً بهم في صلاة ممكن تاخد فقط عشر دقايق او اكثر قليلا لو واحد صلاته خاشعة

صلوا على من بُعث رحمةً للعالمين ❤️
#نبي_الرحمة #حقوق_العمال #سنة_نبوية #الإسلام_دين_اليسر

3 days ago | [YT] | 14

كورسات هندسية

وهم #الإدارة_بالتارجت..
إزاي تدمر كيانك وأنت "غاسل إيدك"!

من فترة، كنت بتناقش مع صديق شغال في كيان كبير له فروع كتير على مستوى الجمهورية، ولفت نظري نموذج إداري غريب ومخيف بيتم تطبيقه هناك، نموذج بيعتمد على سياسة "الغاية تبرر الوسيلة" بس بشياكة!

📌 إيه الحكاية؟
المدير العام بيعين مدراء الفروع بنظام "#التارجت" ونسبة من الدخل ..... لحد هنا والكلام يبدو طبيعي جداً في عالم البيزنس..

لكن الكارثة بتبدأ لما الفروع دي، عشان تقدر تحقق الأرقام الفلكية المطلوبة بتحرق الأسعار علشان تستحوذ على السوق، وبالتالي بتلجأ لأساليب ملتوية، فبركة في الشغل، وضرب في النتائج وتولع الجودة

ولما تيجي تتكلم عن دور الإدارة العليا في المهزلة دي، تلاقي الرد الجاهز والمستفز:
أنا مالي يا لمبي؟ أنا مابقولهمش يضربوا شغل ولا يغشوا.. أنا ليا تارجت ونتيجة، وهم مسؤولين عن شغلهم قدام ربنا وقدام القانون!
ماشي يا حدق

⚠️ ليه ده أفشل نموذج إداري ممكن تقابله؟
اللي بيحصل ده مش "تفويض صلاحيات" ولا "لامركزية في الإدارة"
ده ببساطة "هروب من المسؤولية" واستغلال سيء لفكرة التارجت.

الإدارة بالشكل ده بتخلق بيئة عمل سامة، وعيوبها قاتلة:

#تأثير_الدومينو (Domino Effect): المدير اللي فاكر إن كل فرع جزيرة منعزلة ده شخص واهم لإن أي مصيبة أو خطأ مهني هيحصل في فرع واحد، مش هيشوه سمعة الفرع ده بس، ده هينسف سمعة الكيان كله بفروعه بإدارته في السوق

#تدمير "اسم" الكيان: العميل لما بياخد خدمة سيئة أو مضروبة، مش بيقول "مدير الفرع الفلاني ضحك عليا"، العميل بيقول "الشركة الفلانية أو الكيان الفلاني نصابين". الاسم التجاري هو اللي بيدفع الثمن، وده ببساطة بنشوف في التقييمات اللي بتكون بنجمة واحدة علي جوجل ماب بسبب موظف استقبال او حتي كاشير وجهه عابس

وهنا خليني أقول لك إن القيادة مش بس أرقام و #كاش : الإدارة الحقيقية هي رقابة، وجودة، وامتثال للمعايير وده الفرق بين رؤية هدفها الجودة والاستمرارية وصناعة اسم لامع في السوق وبين رؤية إدارة انتهازية مستعدة تلمع جزمة العميل وتلحس البلاط وترخص نفسها في سبيل اقتناص فرصة رخيصة
لما الإدارة تغمض عينيها عن التجاوزات عشان "الدرج فيه فلوس"، فهي بتتحول لشريك أساسي في الفساد، ومسؤولة عنه أخلاقياً ومهنياً
مكسب سريع وخراب مستعجل: يمكن السياسة دي تنجح في ضرب المنافسين وتجيب فلوس سريعة في الأول، لكن بمجرد ما السوق يكتشف حقيقة الشغل المضروب، الكيان ده هيقع وقعة مفيش بعدها قومة.

#إدارة_الأعمال #القيادة #بيئة_العمل #جودة_العمل #أخطاء_إدارية

1 week ago | [YT] | 19

كورسات هندسية

من المحزن جداً لما نلاقي
مشروعات إنشائية وهندسية عملاقة سواء انتهت او لازالت تحت الإنشاء، مصروف عليها ملايين عشان تطلع "خمس نجوم"، وتلاقي المهندس مهتم بكل تفصيلة في المكاتب، لكن لما تيجي تسأل عن المصلى.. يودوك لغرفة ضيقة وكئيبة
ولو مبني قائم او برج غالبا هتكون في آخر "بدروم" (B2) أو جنب الكراجات!
بيوجعني قلبي لما أشوف المصلى بيتعامل كأنه "فضلة هندسية" أو (Dead Space)
مجرد مساحة متبقية مش عارفين نستغلها في إيه فعملناها مصلى. ليه بنرتضي لبيوت الله اللي مش بنرتضيه لمكاتبنا؟!!

في المقابل، مفيش أجمل من إنك تدخل مشروع تلاقي المسجد فيه هو "درة المكان"؛ نظيف، مرتب، واخد حقه في المساحة والإضاءة والتهوية، مكان فعلاً يليق بالوقوف بين يدي الله.

رسالتي لكل مطور عقاري أو مهندس تصميم أو مدير مشروع:
خلي المصلى في بداية أولوياتك، مش مجرد تحصيل حاصل في آخر الممر. اختيارك لمكان لائق وفخم للمصلى هو رسالة فخر وعزة بديننا، ودليل على التقوى اللي في قلوبكم.
زي ما ربنا سبحانه وتعالى قال:
(ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ)

Skip the Carousel

1 2

1 week ago | [YT] | 29

كورسات هندسية

لو بنحفر جنب عمارة قديمة أو في تربة ضعيفة او بجوار مباني مرتفعة ..
إزاي نحميها من الانهيار؟ 🏗️

(السر في الـ Diaphragm Wall)
تخيل معايا إننا في موقع مشروع جديد، ومطلوب مننا نحفر لعمق يوصل لـ 20 أو 30 متر تحت الأرض عشان نعمل جراجات أو محطة مترو

المشكلة إن الموقع ممكن يحون في نص البلد، ومحاط بعمارات ومباني وزنها تقيل جداً
لو بدأنا حفر بالطرق العادية، التراب هيهيل من تحت المباني دي، وممكن لا قدر الله تنهار وهتبقي مصيبة كبيرة

هنا بقى بيتدخل واحد من أهم وأقوى الحلول في الهندسة الجيوتقنية: وهو الـ "Diaphragm Wall" وده عبارة عن حائط لوحي أو جدار استنادي

خليني اقول لك عالسريع إيه هو الـ "ديافرام وول" وبننفذه إزاي؟
الموضوع أشبه بعملية جراحية دقيقة جداً في باطن الأرض، وبنعمله "قبل" ما نبدأ الحفر الفعلي للمشروع. وخطواته بتم كالتالي:

١. مرحلة الحفر بالـ Grab 🔻
بنجيب ماكينة حفر عملاقة متوصل بيها "Grab" وده عبارة عن كبشة حفر أو خطاف ضخم، وبتبدأ الكبشة دي تاكل في الأرض وتعمل خندق عميق جداً على حدود المشروع

2. السائل السحري (Bentonite Slurry) 🔻
أكيد بتسأل نفسك: إزاي بنحفر خندق بالعمق ده كله في التراب من غير ما جوانبه تنهار وإحنا شغالين؟
السر هنا في الـ "Bentonite slurry" وده سائل طيني لزج وكثافته عالية
وإحنا بنحفر، بنملا الخندق أول بأول بالسائل ده. البنتونايت بيعمل ضغط هيدروستاتيكي على جوانب الحفر، فبيسند التراب ويمنعه تماماً إنه يقع جوه الخندق

3. إنزال قفص الحديد (Steel Cage) 🔻
بعد ما بنوصل للعمق التصميمي المطلوب، بنكون مجهزين بره الـ "Steel cage" يعني قفص حديد التسليح)
بنرفعه بالونش وبننزله بالراحة جداً جوه الخندق اللي لسه مليان بسائل البنتونايت

4. صب الخرسانة (Tremie Pipe) 🔻
دي المرحلة الأهم. عشان نصب الخرسانة تحت البنتونايت من غير ما يختلطوا ببعض، وهنا بنستخدم "Tremie pipe" ودي ماسورة صب طويلة بتنزل لحد قاع الخندق

بنبدأ نضخ الخرسانة من تحت لفوق. وبما إن الخرسانة وزنها وكثافتها أكبر بكتير من البنتونايت، فبتبدأ تزقه وتطرده لفوق عشان تسحبه الطرمبات، وتحل الخرسانة مكانه.
النتيجة النهائية؟
بعد ما الخرسانة تتصلد، بنكون عملنا لوح خرساني مسلح قوي جداً تحت الأرض. بنكرر العملية دي ونعشق الألواح في بعضها لحد ما نقفل محيط المشروع بالكامل.
ساعتها بس.. نقدر ندخل الحفارات بتاعتنا ونبدأ نشيل التراب من قلب المشروع وإحنا مطمنين 100% إننا ساندين التربة بره، وكمان مانعين الـ "Groundwater" الماية الجوفية إنها تتسرب وتغرق الموقع.
👷‍♂️⚙️

شاركنا في التعليقات.. إيه أكتر مشكلة واجهتكم في سند جوانب الحفر في مشاريعكم؟

لو عندك صور أثناء التنفيذ شاركها معانا في التعليقات

#كورسات_هندسية #معلومة_هندسية #كبسولة_هندسية #خبرة_تنفيذ
#ديافرام_وول #سند_جوانب_الحفر #أساسات_عميقة #هندسة_جيوتقنية #تنفيذ_مشاريع
#DiaphragmWall #GeotechnicalEngineering #DeepFoundations #RetainingWalls

Skip the Carousel

1 2 3

3 weeks ago | [YT] | 23

كورسات هندسية

اللهم أهل علينا رمضان بالأمن والإيمان والسلامة والإسلام اللهم سلمنا إلى رمضان وسلم رمضان إلينا وتسلمه منها مقبولاً

كل عام وأنتم بخير أيها السادة الأعزاء

1 month ago | [YT] | 30

كورسات هندسية

فيديو مهم جدا علي القناة

https://youtu.be/DGdi1RWXn5w

1 month ago (edited) | [YT] | 10

كورسات هندسية

فيديو جديد علي القناة

كتير من الناس بيسألوا:
إزاي نعرف إذا كان حديد التسليح جوه الخرسانة بدأ يصدأ… من غير ما نكسر؟

في الفيديو ده بشرح جهاز Half-Cell Potential – Profometer PM8500 شرحًا عمليًا من أرض الموقع، وببساطة توضح الفكرة الكهروكيميائية للاختبار، وإزاي الجهاز بيقيس احتمالية تآكل حديد التسليح باستخدام القطب اليدوي Rod Electrode بدون عجلات.

هتشوف في الفيديو:

يعني إيه اختبار Half-Cell وإيه المقصود بالجهد الكهروكيميائي

تنفيذ القياس عمليًا وتسجيل القراءات

تفسير النتائج طبقًا لمعيار ASTM C876

أخطاء شائعة ناس كتير بتقع فيها وبتطلع بنتائج مضللة

الفيديو ده مهم لأي مهندس، فني، أو صاحب منشأ مهتم يفهم إمتى نقلق وإمتى نفحص ونختبر، بدل الاعتماد على التخمين.

الجهاز موجود في مختبر سمارت تك - Smart Tech
🎥 رابط الفيديو على يوتيوب في أول تعليق 👇
لو شايف المحتوى مفيد، شاركه مع اللي يهمه الموضوع.

3 months ago | [YT] | 9

كورسات هندسية

النجاح صعب، لكن طعمه الحلو يستحق أيها السادة
لله الحمد، إنجاز جديد في طريق تطوير الذات
الشهادة معتمدة من مكتب معايير التطوير المهني المستمر البريطاني (CPD Standards Office)

4 months ago | [YT] | 19

كورسات هندسية

الفيديو الجديد علي القناة الان
شاهدوه من هنا https://youtu.be/bnbPg-v9wkc

4 months ago | [YT] | 9

كورسات هندسية

يا جماعة، سواء كنت مهندس أو صاحب بيت بتبنيه
أكيد يهمك إن الخرسانة بتاعتك تكون قوية وتعيش العمر كله.

كتير مننا فاكر إن الخرسانة دي مجرد أسمنت ورمل وزلط/حصي ومياه...
بس الحقيقة إن فيه "مكون سري" بيغير اللعبة كلها: الإضافات الكيميائية.

طب إيه هي الإضافات دي أصلاً؟
ببساطة، دي مواد كيميائية بنضيفها بكميات صغيرة جداً على خلطة الخرسانة قبل أو وقت الخلط. تخيلها كده زي "بهارات" الأكل، كل نوع بيدي طعم وميزة مختلفة.

الهدف منها هو تحسين خواص معينة في الخرسانة سواء وهي لسه طرية أو بعد ما تجف وتتصلب.
طيب بتعمل إيه الإضافات دي في الخرسانة؟ (يعني بنستفيد منها إزاي؟)

الإضافات دي بتلعب أدوار كتير ومهمة جداً، زي مثلاً:بتخلي الخرسانة سهلة في الصب (زيادة قابلية التشغيل): أحياناً الخرسانة بتكون "ناشفة" وصعبة في التعامل معاها وتشكيلها. الإضافات دي بتخليها "طرية" وسلسة أكتر من غير ما نزود مياه كتير، وده بيضمن إنها توصل لكل حتة في الشدة الخشبية بسهولة.

•بتتحكم في سرعة الشك او سرعة التصلب:•في الجو الحر: بنحتاج نبطّأ عملية الشك عشان الخرسانة متنشفش بسرعة قبل ما نصبها ونفردها كويس. هنا بنستخدم "إضافات تأخير الشك".

•في الجو البرد: بنكون عايزين نسرّع عملية الشك عشان ننجز الشغل، فبنستخدم "إضافات تعجيل الشك".•بتقوي الخرسانة وتزود عمرها: فيه إضافات بتقلل كمية المياه في الخلطة، والقاعدة الهندسية بتقول "كل ما قلت المياه، زادت قوة الخرسانة ومتانتها".

ده بيخليها مقاومة أكتر لعوامل الزمن والمناخ الصعب.•بتحمي حديد التسليح: بعض الإضافات بتعمل طبقة حماية على الحديد عشان تمنع الصدأ والتآكل، وخصوصاً في المناطق الساحلية أو المعرضة للرطوبة.

•بتوفر في التكاليف: على الرغم من إن الإضافات دي ليها تكلفة، لكن استخدامها بيقلل من هدر المواد وبيحسن من جودة الخرسانة، وده بيوفر في تكاليف الصيانة على المدى الطويل.

•الخلاصة:الإضافات الكيميائية مش رفاهية، دي بقت جزء أساسي من تكنولوجيا الخرسانة الحديثة. هي العلم اللي بيخلينا نتحكم في سلوك الخرسانة ونطوّعها عشان تناسب احتياجات كل مشروع وظروفه، من أول بناء بيت صغير لحد بناء الكباري وناطحات السحاب.

شاركوني بآرائكم وتجاربكم... هل استخدمتوا الإضافات دي قبل كده في شغلكم؟
#مهندس_سيد_داود #هندسة #بناء #خرسانة #تشطيبات #معلومات_هندسية

5 months ago | [YT] | 14