ARS Traveler - Invidious

ഈ ചെറുപ്പക്കാരൻ മരിച്ചതോ? അതോ കൊന്നതോ?

ഒരു വർഷം ശരാശരി ആയിരം മനുഷ്യരാണ് കേരളത്തിലെ റോഡുകളിൽ കൂടി നടന്ന് പോകുമ്പോൾ വാഹനമിടിച്ച് മരിക്കുന്നത്.

രണ്ട് വാഹനങ്ങൾ തമ്മിൽ കൂട്ടിയിടച്ചുണ്ടാകുന്ന മരണങ്ങൾ വാഹന അപകട മരണങ്ങളാണ്, എന്നാൽ റോഡിലൂടെ നടക്കുന്നവനെ വണ്ടിയിടിച്ച് കൊല്ലുന്നത് വാഹന അപകടത്തിൽ പെടുമോ? വാഹനങ്ങൾ പോകുന്ന റോഡിലൂടെ നടക്കാൻ നമ്മൾ നിർബന്ധിതരാകുന്നത് എങ്ങനെയാണ്?

നമ്മുടെ നാട്ടിലെ റോഡുകൾ ഉണ്ടായത് എപ്പോഴാണ്?

50 വയസ്സ് പ്രായമുള്ളവരോട് ചോദിച്ച് നോക്കൂ. ഇന്ന് കാണുന്ന പല റോഡുകളും മനുഷ്യർ നടക്കുന്ന ഇടവഴികളായിരുന്നു, സ്റ്റേറ്റ് ഹൈവേകൾ പലതും ചെമ്മൺ പാതകളായിരുന്നു. 100 വർഷം പിന്നോട്ട് പോയാൽ നമ്മുടെ നാഷണൽ ഹൈവേകളും അങ്ങനെ തന്നെയായിരുന്നു. മനുഷ്യർ നടന്നിരുന്ന വഴികൾ കാളവണ്ടികൾക്കും കുതിര വണ്ടികൾക്കും വേണ്ടി ചെറുതായി വീതി കൂട്ടി. 1938 ലാണ് കേരളത്തിലെ ആദ്യത്തെ ബസ് സർവീസ് തുടങ്ങിയത്. പിന്നീട് വാഹനങ്ങൾ കൂടിക്കൂടി വന്നു. റോഡുകളും വികസിച്ചു തുടങ്ങി, ഇപ്പോൾ നമ്മൾ ആറുവരി നാഷണൽ ഹൈവേയിൽ എത്തി നിൽക്കുന്നു.

നിങ്ങളുടെ നാട്ടിലെ റോഡ് ഒന്ന് സങ്കല്പിക്കുക. ആരാണ് റോഡ് ഏറ്റവും കൂടുതൽ ഉപയോഗിക്കുന്നത്?
ദിവസവും അങ്ങാടിയിലേക്കും സ്കൂളിലേക്കും കോളേജിലേക്കും ജോലിക്കുമൊക്കെ നടന്നു പോകുന്ന മനുഷ്യർ.

പൊതു വഴി ഏറ്റവും കൂടുതൽ ഉപയോഗിക്കുന്നവർക്ക് അർഹിക്കുന്ന പരിഗണന വേണ്ടേ?
എന്തെ അതില്ലാതെ പോകുന്നത്?

സർക്കാരിന്റെ കയ്യിൽ എവിടെ പണം എന്ന ചോദ്യമല്ലേ നിങ്ങളുടെ മനസ്സിൽ ആദ്യം ഉയർന്നു വരുന്നത്?

അറിയുക, പണമില്ലാത്തതല്ല നമ്മുടെ പ്രശ്നം.
കഴിഞ്ഞ പത്ത് വർഷങ്ങളായി റോഡിന് ഫണ്ട് അനുവദിക്കണമെങ്കിൽ സുരക്ഷാ മാനദണ്ഡങ്ങൾ പാലിച്ച് നിർമ്മാണം നടത്തണം. അതിൽ ഏറ്റവും പ്രധാനം ഫുട്പാത്താണ്. അതിനുള്ള ഫണ്ട് അനുവദിക്കുന്നുണ്ട്.

ഈ ഫണ്ട് പോകുന്ന വഴി മനസ്സിലാക്കാൻ മൂന്ന് ഉദാഹരണങ്ങൾ പറയാം.

നിർമാണം പൂർത്തിയായി കൊണ്ടിരിക്കുന്ന നമ്മുടെ ആറുവരിപ്പാതയുണ്ടല്ലോ, DPR പ്രകാരം സർവീസ് റോഡിനേക്കാൾ ഉയരത്തിൽ ഫുട്പാത്തുകൾ വേണം അതിലൂടെ നടക്കുന്നവരെ വാഹനങ്ങൾ ഇടിക്കില്ല എന്ന് ഉറപ്പു വരുത്താൻ സർവീസ് റോഡിനും ഫുട്പാത്തിനും ഇടക്ക് ഇരുമ്പ് മറകൾ വേണം. പക്ഷേ നമ്മൾ കാണുന്നത്
സർവീസ് റോഡിനോട് ചേർന്ന് ഫുട്ട്പാത്ത് നിർമ്മിച്ചതാണ്. റോഡിലൂടെ പോകുന്ന ഏത് വാഹനവും ഫുട്ട്പാത്തിലേക്ക് കയറിവരും. ഓവർടേക്ക് ചെയ്യണമെങ്കിൽ ഫുട്പാത്തിലേക്ക് കയറിയെ പറ്റൂ…

പണം ഇല്ലാത്തത് കൊണ്ടാണ് ഫുട്പാത്ത് ഉയർത്താത്തത്, ഇരുമ്പ് മറകൾ നിർമ്മിക്കാത്തത് എന്ന് നിങ്ങൾ കരുതുന്നുണ്ടോ?

കോഴിക്കോട് വെങ്ങളം റീച്ചിൽ 1838 കോടിയാണ് സർക്കാർ ഹൈവേ നിർമ്മാണത്തിന് അനുവദിച്ചത്, പണി കരാറെടുത്ത അദാനി ആ ജോലി 971 കോടിക്ക് വാഗഡ് എന്ന കമ്പനിക്ക് മറിച്ചു കൊടുത്തു എന്ന വാർത്ത നമ്മളൊക്കെ കണ്ടതാണ്. ഒരു നിർമ്മാണക്കമ്പനി 25 ശതമാനം ലാഭമെടുത്താൽ നമുക്ക് മനസിലാക്കാം, 1000 കോടിയുടെ കരാർ 750 കോടിക്ക് പൂർത്തിയാക്കി 250 കോടി ലാഭമെടുക്കാം ലോകത്ത് എല്ലായിടത്തും അങ്ങനെയാണ് നടന്നു വരുന്നത്.

നമ്മുടെ കൺമുന്നിൽ പക്ഷേ 2000 കോടിക്ക് കരാർ എടുത്തവൻ 200 കോടിക്ക് പണി തീർത്ത് 90 ശതമാനവും ലാഭമെടുക്കുകയല്ല മോഷ്ടിക്കുകയാണ്. നമുക്ക് ആർക്കെങ്കിലും പരാതിയുണ്ടോ? ഫുട്പാത്തിനുള്ള ഫണ്ട് വെട്ടിച്ചതിന്റെ ഇര വണ്ടിയിടിച്ച് മരിക്കുന്ന നിങ്ങളോ നിങ്ങളുടെ മക്കളോ ആയിരിക്കും എന്ന് ചിന്തിക്കാൻ കഴിയുന്നുണ്ടോ?

പാലിയേക്കരയിൽ ടോൾ കൊടുക്കുന്നവർ ചിന്തിക്കാറുണ്ടോ, 312.5 കോടിക്ക് കരാർ കൊടുത്ത ജോലിയാണത്. ഡിപിആർ പ്രകാരം ജോലി പൂർത്തിയാകാത്തതിന് നിർമാണ കമ്പനിക്കെതിരെ കേസും സിബിഐ അന്വേഷണവുമുണ്ട്. അതെ സമയം അവർ ടോൾ പിരിക്കുന്നുമുണ്ട്! 312 കോടിയുടെ കരാറിൽ 200 കോടി വെട്ടിച്ചു എന്ന ആരോപണം നേരിടുന്ന റോഡിൽ 2300 കോടി പിരിച്ച് കഴിഞ്ഞു, ഇപ്പോഴും പിരിവ് തുടരുകയാണ്. നിങ്ങൾക്ക് വല്ല പരാതിയും തോന്നിയിട്ടുണ്ടോ? പ്രതികരിക്കണം എന്ന് തോന്നിയിട്ടുണ്ടോ?

എന്റെ വീടിന് മുന്നിലൂടെ കടന്നു പോകുന്ന കൊയിലാണ്ടി-എടവണ്ണ സ്റ്റേറ്റ് ഹൈവേ കേരള സർക്കാറിന്റെ പ്രോജക്ടാണ്. DPR പ്രകാരം ഫുട്ട്പാത്ത് ഉണ്ടാവണം. മുക്കത്തിനും അരീക്കോടിനും ഇടയിൽ നാല് കിലോമീറ്ററിൽ DPR പ്രകാരമുള്ള നിർമാണം കാണാം. വേറെയെവിടെയും ഉപയോഗ പ്രദമായ ഫുട്പാത്തില്ല. കരാറെടുത്ത കമ്പനിക്ക് കാശ് മുഴുവനും കേരള സർക്കാർ കൊടുത്തിട്ടുമുണ്ട്.
പക്ഷേ ആ റോഡിന് ഇരുവശവും ജീവിക്കുന്ന മനുഷ്യർക്ക് പരാതിയില്ല! എത്രയോ പേരുടെ ജീവൻ റോഡിൽ പൊലിഞ്ഞിരിക്കുന്നു, ആരെയും അതൊന്നും ചിന്തിപ്പിക്കുന്നില്ല.

കക്ഷി രാഷ്ട്രീയത്തിന്റെ അന്ധത ബാധിച്ച സമൂഹമാണ് നമ്മൾ, നമ്മൾ തന്നെയാണ് ഈ യുവാവിനെ കൊന്നത്, ഓരോ ദിവസവും കൊന്നുകൊണ്ടിരിക്കുന്നത്. അത് മനസ്സിലാകണമെങ്കിൽ തലച്ചോറ് അവനവന്റെ തലയിൽ തന്നെ ഉണ്ടാകണം. എകെജി സെന്ററിലോ, ഇന്ദിരാ ഭവനിലോ, മാരാർജി ഭവനിലോ, സിഎച്ച് സെന്ററിലോ മറ്റോ തലച്ചോറ് പണയം വെച്ചവർക്ക് പലതും മനസ്സിലാവില്ല.

മാപ്പ് സഹോദരാ…
ബാഷ്പാഞ്ജലികൾ 🌹🤲🤲🤲

കടപ്പാട്