Study with Gimi

නොවැම්බර් මාසෙ අන්තිම සති අන්තෙ..

🌧️ නොවැම්බර් 28, සිකුරාදා

මේ සති අන්තෙ පටන් ගත්තෙම රටට වුණු කරදර ගොඩක් එක්කමයී.. අපේම මිනිස්සු ගොඩාක් කරදර වලට මුහුණදෙනකොට අපිත් ගෙදරටම කොටු වෙලා හිටියෙ.

Exam කට උඩ තිබුණත්, කිසිම වැඩක් කරගන්න බැරුව හිරවෙන්න වුණා current එක පාන්දරම නැතිවුණු නිසා.. ඉස්සර වගේ නම් ඉටි පන්දමක් හරී ළඟට කරන් පාඩම් වැඩ ටික කරගන්න පුළුවන් වුණාට, දැන් දියුණු තාක්ෂණේ එක්ක හැම දෙයක්ම වගේ laptop එකේ තියෙන නිසා වැඩ කරගන්න laptop එකක් ඕනමයී...

කොහොමෙන් කොහොමහරී හවස් වෙද්දි email එකක් ඇවිත් තිබුණා exam cancel කියලා. ඒකෙන් හිතට පොඩි සහනෙකුත් දැනුණා. මොකද අර එකම ගැම්මෙන් පාඩම් කරන් ඇවිත් මෙහෙම එක පාර ඒක ලොකු drop එකක් වුණ නිසා මෙහෙම ආරංචියක් ලැබුණහම ඒක පොඩි සැනසීමක් වුණා.. මොකද මට විතරක් නෙමෙයිනේ හුඟාක් මේ විභාගෙට එන්න බැරි ළමයිනුත් ඉන්නවනේ..

ඉතින් ඒ වෙලාවෙ ඉඳලා ඔළුවෙ වැඩ කළේම මිනිස්සු වෙනුවෙන් මොනාමහරි කරන්නම ඕන කියන දේ. ඒත් Sweckව ගෙදර තනියම දාලා යන්නත් බෑ. ගෙදර මිදුලටමත් වතුර ඇවිත් තිබුණෙ. ඉස්තෝප්පුවට රැළි ගගහා තියෙද්දි ඒ අයිනට පුටුව තියාගෙන Sweck එක්ක ඉඳගෙන පොතක් කියෙව්වා මහ වැස්සෙ.

Husband ආපු ගමන් ටක්ගාලා එළියට ගිහින් ගෙදරට ඕන බඩු ටිකකුයි, Sweckට ඕන dog food ටිකකුයි අරගෙන ආවා.. මොකද අපි බඩගින්නෙ හිටියත් එයාව බඩගින්නෙ තියන්න බෑනෙ... ඒ වෙද්දිත් වැස්සයි, හුළඟයී හොඳටම..

මහ රෑ class එකෙන් දාල තිබ්බා කැමති, පුළුවන් අයට මේ පාරම exam කරන්න ඕන කියලා request කරන්න කියලා.. මං ඒ වෙලාව වෙද්දි ඒ වෙනුවෙන් මොකද කරන්නෙ කියලා හිත හිත හිටියෙ. හැබැයී ආයිමත් පාන්දර current ගිය නිසා මං හිතුවා මේ පාර මං කරන්නෙ නෑ කියලා. මොකද මට මේ පාර exam එකට හුඟාක් බාධා ආවා. එහෙම බාධා ඇවිත් වුණත් කරලා සාර්ථක වුණු දේවල් ඕන තරම්,, හැබැයී මෙදා පාර හිතට අමුතු හැඟීමක් දැනුණා.. ඒ නිසා අපි තීරණය කළා මේ පාර කරන්නෙ නෑ කියලා. මොකද ජීවිතේ හිතට දැනෙන ඒ අමුතු හැඟීම් හරියටම හරී..

පාන්දරත් සැරින් සැරේ ඇහැරිලා Sweck ගැන බැලුවා.. එළියෙ වතුර බැහැලා ගිහින්ද බැලුවා. දන්න දන්න අයට msg දදා එයාලා ගැන බැලුවා.. FB ගිහින් රටේ තත්ත්වෙ බැලුවා. ගෙදරට වෙලා හිටියා වුණත් හිත හරිම නොසන්සුන්..

🧹 නොවැම්බර් 29, සෙනසුරාදා

කිසිම අරමුණක් නැතුව ඇහැරිලා මොනාහරිම කරන්න ඕන අපේ මිනිස්සු වෙනුවෙන් කිය කිය හිත හිත ඉන්නකොටම office එකේ msg එකක් ආවා අපේ බොස්ගෙන්. Housekeeping department එකේ කට්ටිය මදි, hotel එක busy හුඟක්, පුළුවන් පහසු ළඟ අයට එන්න කියලා..

මටත් වඩා හැමදාමත් වගේ මේ වගේ දේවල් වලට මාව උනන්දු කරවන්නෙ මගෙ husband. එයා ඊට පස්සෙ කිව්වා මේ වෙලවෙ hotel එකට ඔයාල්ගෙ උදව් ඕනෙ, ඔයා දැන් මේ වැඩේ කරන්න කියලා. මාත් ඉතින් අලුත් experience එකක්නේ කියලා ටක්ගාලා office යන්න ඇඳගත්තා. Husband කිව්වා Sweck ගැන බයවෙන්න එපා,, මාව office දාලා ඇවිත් එයා Sweck එක්ක ඉන්නම් කියලා.. එතකොට මොනාහරි වුණොත් එයා Sweckව දාගෙන එනවනේ.. කොහොමත් අපේ බව්වාටත් යන්න තියෙනවා නම් වාහනේ දොර අරින්න විතරයී ඕන. එයා ක්ෂනිකෙන් වාහනේ ඇතුළෙ.

ඔය ඔක්කොමත් හිතලා, ඊට පස්සෙ තමයී කොහෙන්ද යන්නෙ කියලා හිතුවෙ. මොකද ජා ඇල ගොඩක් පැති යට වෙලා තිබුණු නිසා.. Husband කිව්වා බලමුකො බලලා කොහොමහරී මං ඔයාව දාන්නම් කියලා..

ඔන්න මං ආයිමත් housekeeping dep එකේ වැඩ කළා.. එක පාරක් කළේ rooms වල පාවිච්චි කරපු ඒවා අයින් කරන එක විතරයිනෙ,, ඔන්න මෙදා පාර bed එකක් හදන්නත් opportunity එකක් ලැබුණා..

එන්න පුළුවන් හැමෝම වගේ ඇවිත් තිබුණා.. Directorsලා, managersලා, executivesලා ඔය හැමෝම වගේම HR, L&D, Commercial, Finance department වල පුළුවන් හැමෝම මේ වැඩේට සහයෝගය දුන්නා. ඇත්තටම මටත් ලොකුම ලොකු සතුටක් දැනුණා කොහොමහරි මේ වැඩේට මේ වෙලාවෙ contribute කරන්න පුළුවන් වෙච්ච එකට..

මෙතන වැඩේ ඉවර වෙලා community kitchen එකට ගිහින් මගෙ හොඳම යාළුවෙක් එක්ක උදව් කරන්න හිතුවත්, ආයිමත් රෑ වතුර වැඩිවුණොත් ගෙදරට යන එක ඒ වෙලාවෙ හොඳ වෙයී කියලා හිතුණ නිසා බොස් එක්ක ගෙදර ගියා.. ජා ඇලින් මාව ගන්න මගේ හැමදේටම support කරන මගෙ husband ආවා..

ඒ වෙද්දිත් මුළු ජා ඇලම කළුවරේ.. එතකොට තමයී මතක් වුණේ ගෙදර ඉටිපන්දම් නෑනෙ නේද කියලා. කොහෙවත් ඉටි පන්දම් නෑ. ඒ නිසා පහන් තිර පැකට් එකක් අරන් ගෙදර ගියා.

කොහොමහරී අද දවසෙ අඩුම office එක වෙනුවෙන් හරි දෙයක් කළානෙ කියලා හිතට ලොකු සතුටක් දැනුණා..

ගෙදර ආවට පස්සෙ phones වලට signal නෑ, light නෑ,,, අවුරුදු ගාණකින් අතීතෙට ගියා වගේ හැඟීමක් තමයී දැනුණෙ. හෙට දවසෙ අනිවාරෙන්ම අපේ මිනිස්සු වෙනුවෙන් මොනාමහරී කරනවා කියලා හිතාගෙන තමයී අද දවස ඉවර කළේ..

👩🏻‍🍳 නොවැම්බර් 30, ඉරිදා

අද උදේ නැඟිටිනකොටත් current නෑ. පෙරේදා උයන්න කියලා ගෙනාපු බඩුත් තියෙන එකේ, සඳුදා ඉඳලා අපි දෙන්නම ගෙදරත් නැති එකේ තියෙන බඩු ඔක්කොම උයලා බත් පැකට් ටිකක් හදලා කාටහරී බෙදලා දෙමු කියලා අපි දෙන්නා තීරණය කළා..

චිකන් උයලා, ඉස්සො තෙල් දාලා, සොසේජස් තෙල් දාලා, පරිප්පු උයලා, ඇඹරැල්ලා මාළුවක් හැදුවා. බත් කීපෙකට චිකන් එක්ක. තවත් බත් කීපෙකට ඉස්සො එක්ක. තවත් බත් කීපෙකට සොසේජස් එක්ක.. 11.30 වෙද්දි බත් මුල් ටිකත් බැඳලා, රස බලන්නත් එක්කම අපි දෙන්නත් බත් එකක් බෙදාගෙන ටක්ගාලා බත් කටක් කෑවා. කොහොමහරී බත් පැකට් 20ක් හැදුවා. හරිම සතුටක් හිතට දැනුණෙ. මොකද තනියම 20කගෙ බඩ පුරවන්න උයාගන්න ලැබුණු එක ගැන..

බත් මුල් ටික කඳානෙ පල්ලියට භාරදෙන්න හිතාගෙන අපි එළියට බැස්සෙ. ඒ ගමන්ම ලේ දන් දෙන්නත් ගිහින්, මීගොඩ මිස්ලගෙ ගෙදරයී, කළුතර අම්මලගෙ දිහායිත් ගිහින්ම අද ගෙදර යන්න හිතුවා. මොකද මට හුඟක් වෙලාවට කළුතර යැවෙන්නෙම නෑනෙ.

ජා ඇල pass වෙලා කඳානට කිට්ටු වෙනකොට තමයී phone වලට signal ආවෙ. ගොඩක් දෙනෙක් අපි ගැන බලන්න message දාලා තිබුණා, calls අරන් තිබුණා. මුලින්ම කෑම ටික පල්ලියට දුන්නා.

ඊළඟට අපි කෙලින්ම ගියෙ නාරහේන්පිට blood bank එකට. පුදුමාකාර තරම් සතුටක් දැනුණෙ, building එකෙන් එළියටත් පෝලිමේ ලේ දෙන්න සෙනඟ හිටියා.. ගමන් ගොඩක් යන්න තිබ්බ නිසා අපි එතනින් ආවා. ඊළඟට ගියෙ අපේක්ෂා එකේ blood bank එකට. එතනත් ඒ වගේමයී... අපේ මිනිස්සු මොන තරම් පරිත්‍යාගශීලී ජාතියක්ද කියලා හිතට දැනුණා...

ඒ සතුටත් එක්කම අපි දෙන්නා අපේ ගමන් ටික යන්න පිටත් වුණා..

‼️ප.ලි.

අපි ජීවිතේ හෘද සාක්ෂියට අනුව ජීවත් වෙනකොට, සොබාදහමට අනුකූලව ජීවත් වෙනකොට,, පුළුවන් තරම් තමන්ගෙන් හොඳ දේවල් විතරක්ම සමාජෙට ලබලා දෙනකොට,,, ජීවිතේ සමහර දේවල් අත් අපිට අත් ඇරුණත්,, ඒ අත ඇරෙන දේට වඩා වැඩි දෙයක් අපේ ජීවිත වලට ලැබෙනවා. ඒ තමයී ජීවිතේ හැටී..

ඒ නිසා හැමවෙලේම හෘද සාක්ෂියට එකඟව හොඳ මනුස්සයෙක් විදිහට ජීවත්වෙන්න.. හොඳම දේ විතරක්ම අනිත් අයත් එක්ක බෙදාගන්න. පුළුවන් හැමවෙලේම සමාජෙට හොඳ දෙයක්ම විතරක් දෙන්න... විශ්වාස කරන්න සොබාදහම ඔයාට ආශිර්වාදයක්ම වේවී...

අපේ පුංචි රටේ හැම ජීවිතයක්ම සුවපත් වේවා කියලා අපි ප්‍රාර්ථනා කරමූ...

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #fyp #fypシ #positivelife #blessings #srilanka #PrayForSriLanka

Skip the Carousel

1 2 3 4 5 6

2 months ago | [YT] | 181

Study with Gimi

2025 නොවැම්බර් 22 ගිමීගේ ඩයරිය

-කණ්ණාඩි කතාව-

ඉස්සර මං යාළුවොන්ගෙ කණ්ණාඩි දාලා බලනවා.. අපේ යාළුවො අතර නිකන් කතා බහක් තිබුණා කණ්ණාඩි දාන ළමයින්ට මොළේ හොඳට තියෙනවා කියලා 🤓.. මං මේ කියන්නෙ මං සමුද්‍රදේවි එකේ ඉන්න කාලෙදි.

මගෙ 6,7 වසරෙ හොඳම යාළුවත් කණ්ණාඩි දැම්මා.. මට හොඳට මතකයී එයා එක සැරයක් frame එක අලුත් කරගෙන ආවා. රතු පාට ලස්සන frame එකක්. එයා ඒක දැම්මහම හරිම හැඩට තිබුණා. මං දැම්මහම ආච්චි කෙනෙක් වගේ කියලා කට්ටිය හිනත් වුණා.. ඇත්තටම එහෙම පේන්ත් ඇතී 🙈..

කොහොමෙන් කොහොමහරී පෙනීම හොඳට තිබුණු නිසා මට කණ්ණාඩි දාන්න අවස්ථාවක් ලැබුණෙ නෑ.. හැබැයී අවුරුදු 28න් ඒකට මට අවස්ථාවක් ලැබිලා.. 💔

ගිය සතියෙ මැද වගේ ඉඳලා වම් ඇහැ උඩ ගැහෙන්න වගේ/නටන්න වගේ (Twitching) වෙන්න ගත්තා. මං හිතුවෙ ටිකක් වැඩිපුර screen time නිසයී, නිදිමරපු නිසයී වෙන්න ඇතී කියලා. මං වේලසන නිදාගත්තත් හරි ගියෙ නෑ.. මොකද කලිනුත් එහෙම වුණහම ටිකක් වැඩිපුර නිදාගත්තහම හරි යනවා.. මේ පාර ඒකත් නෑ.. ඒ මදිවට ඇස් දැවිල්ලයී..

ඉතින් ඒ පාර දවස් 2ක් වගේ බලලා ගියා ඇස් පෙන්නන්න.. Vision එක check කරද්දි වම් ඇහෙන් යට අකුරු පේළියෙ පේන්නෙ නෑ 😶‍🌫️.. මදැයී ඉතින්.. ඊට පස්සෙ ඉතින් doctor ගාවට දැම්මා.. Doctor ඇහුවා දවසට screen time කොච්චරද කියලා,, මං ඉතින් කිව්වා සමහර දවස් වලට පැය 16ක් 17ක් වගේ වෙනවා කියලා 👩🏻‍💻.. Office එකෙත් වැඩ කරලා, ගෙදර ඇවිල්ලත් lap එකෙන් පාඩම් වැඩ කරද්දි ඇත්තටම ඒක වළක්වන්න බෑ..

Doctor ඊට පස්සෙ advices ගොඩාක් දුන්නා.. ඒ ටික මෙතනට එකතු කරන්නෙ ඔයත් ගොඩක් වෙලා screens පාවිච්චි කරන කෙනෙක් නම්, මට වුණු දේ ඔයාලට නොවෙන්නයී..

📍20 min rule

Screen එක දිහා බලන් ඉන්න හැම විනාඩි 20කට සැරයක්ම ඒකෙන් ඇස් 2 අයින් කරලා, දුර බලන්න. ඇහි පිල්ලම් ගහන්න හොඳට. විනාඩි 20කට සැරයක් බැරි නම්, විනාඩි 30කට සැරයක්වත්.

මටත් මේක වෙන්නෙ නෑ. මොකද වැඩක් පටන් ගත්තහම වෙලාව ගෙවෙන එක ගැන මට අවබෝධයක් නෑ. හැබැයී මං පුළුවන් තරම් හිතලා දැන් මේ දේ කරනවා..

📍ඇස් තෙමන්න.

පැයකට සැරයක්වත් ගිහින් ඇස් 2 සීතල වතුරෙන් තෙමාගෙන එන්න. මූණ සෝදනවා කියලා හිතන්නකො, ඒ සෝදලා ඇස් දෙක නිකන්ම වේලෙන්න දෙන්න. පිහදාන්න එපා..

📍වතුර ගොඩක් බොන්න.

මං දන්නෙ නෑ හැබැයී මං සාමාන්‍යයෙන් වතුර 3L අනිවාරෙන්ම දවසට බොනවා. ඒ බීලත් මගෙ ඇස් හුඟක් dry කියලා doctor කිව්වා. ඒකට හේතුව මං හිතන්නෙ මං ඇස් පිල්ලම් ගහන එක අඩු එක වෙන්න ඇතී..

📍මාස 6කට සැරයක්වත් ඇස් පරීක්ෂා කරගන්න..

මේ දේ නම් අපි කරන්නෙම නැති දෙයක්නෙ. ලෙඩක් වෙන්නම ඕනනෙ අපිට doctor කෙනෙක් ගාවට යන්න.. එහෙම නොවී පුළුවන් නම් මාස 6කට වතාවක්වත් ඇස් පරීක්ෂා කරගන්න.. මොකද ඇස් කියන්නෙ අපි ළඟ තියෙන වටිනම සම්පතක්නෙ..

📍අත් හෝදන්නෙ නැතුව ඇස් අල්ලන්න එපා..

මේක නොදැනුවත්වම අපිට වෙන දෙයක්.. අපි වැඩ කර කර ඉද්දි නොදැනුවත්වම අපි ඇස් පොඩි කරනවා.. ඉතින් එහෙම කරන එකෙන් වෙන්නෙ අපේ අත් වල තියෙන විසබීජ නිකන්ම ඇස් වලට යන එක. ඇස් කියන්නෙ හුඟක් සංවේදී ඉන්ද්‍රියයක් නිසා එතකොට ඉක්මනින්ම ලෙඩ වෙන්න බලනවලූ..

ඒ නිසා උත්සාහ කරන්න, අත් සෝදන්නෙ නැතුව ඇස් අල්ලන්නෙ නැතුව ඉන්න..

ඉතින් ඔන්න අන්තිමට, මං ළඟ ඔය පුරුදු තිබුණෙ නැති නිසා මටත් කණ්ණාඩි දාන්න වුණා.. ඔයාටත් තාම කණ්ණාඩි දාන්න වෙලා නැත්නම්, ඔයත් ගොඩාක් වෙලා screen, laptops පාවිච්චි කරන කෙනෙක් නම්,, අද ඉඳලවත් ඔයාලගෙ ඇස් වල නිරෝගිකම ගැන හිතන්න..

‼️ ප. ලි.

දන්න කෙනෙක් ඉන්නවා නම් පොඩ්ඩක් කියන්න, කණ්ණාඩි දැම්මා වුණත් මට ඇස් දන් දෙන්න පුළුවන් වෙයි නේද කියලා ???

මොකද මේ ගැන තියෙන මගේ ලොකුම worry එක ඒක. මං මැරුණහම ඇස් දන් දෙන්න අත්සන් කළේ 2019දී.. හැබැයී ඒත් මං දන්නෙ නෑ දැන් මගේ ඇස් වල පෙනීම ටිකක් දුර්වල වෙලා නිසා මට ඒක කරන්න පුළුවන් වේවිද කියලා..

ඒ කොහොම වුණත්, කාලෙකින් අලුත් වෙනසක්නෙ කියලා ඔන්න ඔහේ මං හිත හදාගත්තා 🤓.. ජීවිතේ ඔහොම තමයීනේ,, ඉඳලා හිටලා හරී හැඩරුවින් අපි පොඩ්ඩක් upgrade වෙන එකත් හොඳයිනේ කියලා අන්තිමේට මං හිත හදාගත්තා...

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #fyp #fypシ #diary

2 months ago | [YT] | 137

Study with Gimi

හීන වලට පාට ගේමු - 2025 හැමදේම ලෑස්තියී..

ඔයාලට මතක ඇතී නොවැම්බර් මාසෙ 8 වෙනිදා මං post එකක් දැම්මා හීන වලට පාට ගේමු මේ අවුරුද්දෙ project එක ගැන කියලා. ඉතින් ඒ post එක share කරලා පැය 24ක් යන්නත් කලින් ඒ හැමදේම දෙන්න Study with Gimi පවුලෙ ඔයාලා එක එක්කෙනා භාර ගත්තා..

ඉතින් ඒ භාරගත්ත බඩු ඔක්කොම අද වෙද්දි අපිට ලැබුණා.. මේ අවුරුද්දෙ පුංචි පැටව් 75ස් දෙනෙක්ගෙ හීන පාට කරන්න එකතු වුණු ඔයාලා හැමෝටම හුඟක් පින්.. මං මේ project එකේ කැමතිම දේ තමයී හැම කෙනෙක්ම වගේ පුංචිම දේකින් එකතු වුණු එක.. මොකද පාට පෙට්ටි 2ක්, මකන 10ක්, පොත් 2ක් වගේ පුංචි පුංචි තෑගි පවා අපිට ලැබුණා.. ඉතින් එහෙම හරි හැම කෙනෙක්ම එකතුවෙන එක කොයි තරම් නම් අපූරුද ???

තනියම අපිට කරන්න බැරි දෙයක්, අපි ගොඩක් දෙනෙක් එකතු වුණහම හරිම ලස්සනට කළහැකී.. මං හිතන්නෙ මේ ඒකට ජීවමාන සාක්ෂියක්..

මේ පුංචි පැටවුන්ට තෑගි එවනකොට මටත් සමහර අපේ පවුලෙ සාමාජිකයො පුංචි පුංචි තෑගි එවලා තිබුණා.. ලොකුම ලොකු chocolate එකක්, පුංචි කරාබු දෙකක්, සුවඳ ඉටිපන්දමක්, ලස්සනම ලස්සන note එකක්, ලස්සන key tag එකක් ඒ අතර තිබුණා.. ඉතින් ඒ හැමෝටම හුඟක් ස්තූතියී..

ඊළඟ අවුරුද්දෙත් මේ වගේම හීන පාට කරන project එකකින් අපි මුණ ගැහෙමූ.. ආයිමත් සැරයක් පුංචි පැටවුන්ගෙ හීන පාට කරන්න එකතු වුණු, එකතු වෙන්න ආසාවෙන් හිටපු ඔයාලා හැමෝටම හුඟක් ස්තූතියි,, හුඟක් පින් 🙏🏻💖

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#studywithgimi #gimhani_senarathne #Project2025

2 months ago | [YT] | 187

Study with Gimi

O/L විභාගෙට හොඳ result එකක් ගන්න එක ජීවිතේට වැදගත් වෙන්නෙ ඇයී ??

අපි ස්කෝලෙ යනකොට තරඟ විභාග 3කට මුහුණදෙනවා.

එතනින් පළවෙනි එක 5 වසරෙ ශිෂ්‍යත්වෙ. ඒ විභාගෙ ගැන අපිට ලොකුවට නොතේරුණ නිසා අපිව හොඳ ප්‍රතිඵලයක් ගන්න පොළඹවන්නෙ අපේ දෙමව්පියො, ගුරුවරු තමයී.. හැබැයී එදා 5 වසරෙ විභාගෙට හොඳ ලකුණක් ගත්ත නිසා මට නුගේගොඩ සමුද්‍ර දේවි බාලිකාවට යන්න පුළුවන් වුණා.. 5 වසර වෙනකන් මං හිටියෙ ගොඩගම සුභාරතී විද්‍යාලෙ, ඒක පුංචි ස්කෝලයක්.

ඊළඟට අපි මුහුණදෙන කඩඉම තමයී O/L කියන්නෙ. ඊටත් පස්සෙ A/L. ඉතින් මේ විභාග දෙක කරද්දි නම් ලොකු contribution එකක් එන්නෙ අපෙන්. ඒක මේ කඩඉම් දෙක පහු කරපු අය දන්නවා.

ඉතින් O/L විභාගෙ ගැන කතා කරනවා නම්,, මං මගෙ O/L අත්දැකීම ගැන මුලින් කතා කරලා ඉන්නම්.

මං O/L කළේ 2013. ඒ කරද්දි මට ලොකුම motivation එක වුණේ මං Commerce පන්ති ගියපු සර්. කොහොමත් මට A9ක් ගන්න ඕන වෙලා තිබුණා. හේතුව ඒ මගෙ අම්මගෙ හීනෙ නිසා. හැබැයී ඒකට මට මඟ පෙන්නුවෙ නිශාන්ත පෙරේරා සර්. ඉස්සර සර්ගෙ class එකට ගියහම සර් කියනවා ඇයි අපි O/L හොඳට කරන්න ඕන කියල, ඒ වගේම සර් අපිට කාල සටහනක් දෙනවා. සර් කියනවා මේ විදිහට වැඩ කළොත් අනිවාරෙන්ම A9ක් ගන්න පුළුවන් කියලා. මං සර්ගෙන් තව ඉගෙනගත්ත ලොකුම දෙයක් තමයී "විභාගෙකට පුළුවන් උපරිම මහන්සි වෙන්න. එන ප්‍රතිඵලේ මොකක් වුණත් හිස් මුඳුනින් භාරගන්න.." අදටත් මේ දේ මං practice කරනවා..

ඉතින් සර් කිව්වා වගේම මං O/L විභාගෙට මහන්සි වුණා. Short notes හැදුවා, පාඩම් කළා, past papers කළා, යාළුවොත් එක්ක short notes share කරගත්තා, ඉල්ලපු හැම යාළුවෙක්ටම short notes දුන්නා, master guide පොත් කළා.. ඔය හැමදේම කරලා මට A9ක් ලැබුණා..

දන්නවද ඒ A9 නිසා මට ලැබුණු පන්නරේ කොයිතරම්ද කියලා.. ඒක අසීමිතයී. අදටත් මට ඒ හැඟීම ඒ විදිහටම දැනෙනවා. ඒ ලැබුණු ප්‍රතිඵලේ නිසා මට මං ගැන පුදුම තරම් විශ්වාසයක් ඇති වුණා. මට විභාගයක් කරලා හොඳ ප්‍රතිඵලයක් ගන්න පුළුවන් කියන හැඟීම මගේ හිතේ තැන්පත් වුණා.. අදටත් මට විභාගෙකට පාඩම් කරද්දි මහන්සියි කියලා දැනෙන තැන් වලදි ඒ හැඟීම මතක් කරගන්නවා..

හිතන්න, ඒ හැඟීම දැනිලා දැනට අවුරුදු 11කට කිට්ටුයී.. තාමත් ඒ හැඟීම මට පන්නරයක් වෙනවා කියන්නෙ O/L result එක මගේ ජීවිතේ කොයිතරම් වටිනා දෙයක් ඉෂ්ට කරලද නේද ???

ඉතින් මේ ලිපිය O/L කරන නංගිලා මල්ලිලා වෙනුවෙන්..

මොකද දැන් සමාජෙ කිසිම පදනමක් නැති විවිධ කතා ගොඩනැගිලා තියෙනවා.. හැබැයී ඒ මොන දේටත් පදනම වෙන්නෙ ඔයාලගෙ අධ්‍යාපනය. O/L විභාගෙන් ඔයා ගන්න හොඳ ප්‍රතිඵලයකට පුළුවන් ජීවිතේ ඔයාව ලොකු දුරක් අරගෙන යන්න. ඇත්ත ඒ දේම නෙමෙයී තමයී ඔයගෙ ජීවිතේ තීරණය කරන්නෙ, ඒ වුණත් ඒ දේ ඔයා යන ගමනට ශක්තිමත් අඩිතාලමක් වෙනවා..

ඒ දේ මං අත් විඳිනවා. සමහර විට මේක කියවන මේ කඩඉම පහු කරපු ඔයාලත් අත්විඳිනවා ඇතී.. O/L කරන නංගිලා, මල්ලිලා වෙනුවෙන් ඔයාලගෙ ඒ අත්දැකීම් comment එකකින් එකතු කරන්න කියලා මං ඔයාලගෙන් ඉල්ලීමක් කරනවා.. මොකද ඒ වචන එයාලගෙ විභාගෙට හොඳින් සූදානම් වෙන්න මඟ පෙන්වීමක් වේවී..

ඉතින් නංගී මල්ලී මේ පුංචි දවස් ටික ඔයාලගෙ O/L exam එක වෙනුවෙන් මහන්සි වෙන්න. ජීවිතේ සමහර කඩඉම් තියෙනවා ජීවිත කාලෙටම හැරවුම් ලක්ෂ්‍යයක් වෙන.. ඒ නිසා ඔයාලගෙ අනාගතේ වෙනුවෙන් මේ විභාගෙට අවංකවම මහන්සිවෙන්න.. විශ්වාස කරන්න,, ඒ ප්‍රතිඵලය ඔයාලගෙ ජීවිත වලට හුඟක් හොඳ ආරම්භයක් ලබාදේවී..

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#studywithgimi #gimhani_senarathne #studytips #fyp #fypシ

2 months ago | [YT] | 53

Study with Gimi

ඇයි 'ඉගෙනීම' කියන දේ මේ තරම්ම වැදගත් ???

කෙනෙක්ට හිතෙන්න පුළුවන් ඉගෙනගන්න එක මේ තරමටම ජීවිතේට වැදගත්ද කියලා. මොකද මං හැමවෙලේම කියනවා, "ඉගෙනීම කියන්නෙ අපි වගේ මිනිස්සුන්ට ඉහළටම පියාඹන්න ලැබුණු අත්තටු" කියලා..

මං ඒකට අද හේතු කීපයක් කියන්නම්. ඒ වගේම ඉගෙනීම නිසා මට මගේ ජීවිතේ ලැබුණු මට දැනෙන විදිහට මං වරප්‍රසාද කියලා හිතන හේතු ටිකක් මං එකතු කරන්නම්.

බලන්න මේ හේතු, මේ වරප්‍රසාද ඔයාලගෙ ජීවිත වලටත් අදාළද කියලා.. ඒ වගේම මං පුංචි ඉල්ලීමක් කරනවා, ඔයාටත් මේ වගේ හේතු, වරප්‍රසාද තියෙනවා නම් මේ ලිපියට ඒ දේවල් එකතු කරන්න. සමහර විට ඒක කියවන තව නංගි කෙනෙක් හරි මල්ලි කෙනෙක් හරි ඒ වචන ටික කියවලා ඉගෙනීමේ වටිනාකම තේරුම් ගනීවි.. අනේ මාත් කොහොමහරි ඉගෙනගන්න ඕන කියලා හිතට ගනීවි.

මුලින්ම අපි හේතු බලමූ..

💁🏻‍♀️ මගෙ අම්මගෙ ලොකුම හීනෙ.

මේ තමයී ඉගෙනගන්න ඕන කියන සිතිවිල්ල මට ඇති කරපු motivation එක. අම්මට මං 8 වසරෙදි මේ ලෝකෙන් යන්න වුණාට, එතන ඉඳන් මං එයාගෙ ඒ හීනෙ හැබෑ කරන්න වෙනදටත් වඩා මහන්සි වුණා. හැම දවසකම මං ඒ වෙනුවෙන් වැඩ කළා. ජීවිතේ අධ්‍යාපන සුදුසුකම් එකින් එක එකතු කළා.. තාමත් කරන ගමන්..

💁🏻‍♀️ මගේ ජීවිතේ හීන හැබෑ කරගන්න තියෙන එකම තුරුම්පුව..

මං සාමාන්‍ය පවුලක ඉපදුණු ළමයෙක්. ඒ විතරක් නෙමෙයී පුංචි කාලෙම මට මගේ ජීවිතේ ගොඩනගාගන්න වගකීම මගෙ අතට ගන්න වුණා. ඉතින් මට පෙනුණු විදිහට මගේ ජීවිතේ හැම හීනයක්ම හැබෑ කරගන්න නම් මං උපයගන්න ඕන මුල්ම දේ විදිහට මට පෙනුණෙ අධ්‍යාපනය. මගෙ ඉගෙනීම..

මොකද මට තේරුණා, මගේ ජීවිතේ අනිත් හැමදේම මගේ ඉගෙනීම මං හරියට කළොත් ලබාගන්න පුළුවන් කියලා.

💁🏻‍♀️ දවසක මට passive income එකක් හදාගන්න ඕන නිසා..

මං තදින්ම විශ්වාස කරනවා ජීවිතේ මනුස්සයෙක්ට passive income එක්ක තිබිය යුතුමයී.. මං දන්නවා කවදරි මගේ ජීවිතේ ඒ දේට අඩිතාලම වෙන්නෙ මගේ මේ අධ්‍යාපනය, මගේ ඉගෙනීම..

දැන් අපි බලමු මට ලැබිලා තියෙන වරප්‍රසාද..

🌀 මගෙ වෘත්තියෙ මේ තරම් දුරක් මට එන්න පුළුවන් වුණේ ඒ නිසා..

ඔයාලා හැමෝම වගේ දන්නවනෙ මං දැන් work කරන්නෙ Cinnamon Life. Financial Planning Analyst විදිහට. එතකොට මට මේ ගමන මේ තරම් දුර එන්න උදව් වුණේ මගේ ඉගෙනීම. මේ ඉගෙනීම කියන්නෙ මගෙ අධ්‍යාපන සුදුසුකම්, ඒ වගේම මගෙ skills.

මොකද වෘත්තීය ජීවිතේ අපි යන දුර තීරණය කරන්න සෑහෙන්න බලපෑමක් කරන්න පුළුවන් ප්‍රධානම සාධකයක් තමයී skills කියන දේ.

🌀 මූල්‍යමය වශයෙන් යම්කිසි ස්ථාවරයක මං දැන් ඉන්නෙ මගෙ අධ්‍යාපනය නිසා.

මං පටන් ගත්ත තැන ඉඳලා මේ වෙනකන් මං ඇවිත් අද වෙද්දි financially මට independent වෙන්න මට පුළුවන් වුණේ මගේ ඉගෙනීම නිසා.. මං හොඳට ඉගෙනගත්තා නිසා, තාමත් ඉගෙනගන්න මහන්සිවෙන නිසා ඒ වෙනුවෙන් සතුටු වෙන්න පුළුවන් විදිහෙ මූල්‍යමය වටිනාකමක් මට දැන් ලැබිලා තියෙනවා..

ජීවිතේ ඉපැයීම් කිසිම දෙයක් නොතිබුණු පුංචි මට, මේ තරමට ඉපැයීමේ හැකියාවක් ලැබුණෙ මගෙ ඉගෙනීම නිසා.

ඒ නිසා මං මට ආස දේවල් ගන්නවා. මං කන්න කැමති දේවල් අරගන්නවා. මං ආදරේ කරන අය වෙනුවෙන් වියදම් කරනවා. පුංචි පුංචි පින්කම් කරනවා.. ඔය හැමදේම කරන්න මට මූල්‍ය ස්ථාවරත්වය කියන දේ මට දුන්නෙ මගේ අධ්‍යාපනය.

🌀 මට නිදහසේ මගේ කියන තැනක ජීවත්වෙන්න ලැබුණෙ ඒ නිසා..

මං කලින් කිව්වනෙ මට මූල්‍ය ස්ථාවරත්වය ලැබුණේ මගෙ ඉගෙනීම නිසා කියලා. අන්න ඒ නිසාම මට ලැබුණු වරප්‍රසාදයක් තමයී මේත්. මං තනියම ජීවත්වෙන්න පටන්ගත්තෙ මං A/L කරන කාලෙ ඉඳලා. ඒ දවස් වල ඒ ඇරෙන්න මට වෙන තෝරාගැනීමක් තිබ්බෙ නෑ.. ඉතින් ටිකෙන් ටික මං තනියම ජීවත්වෙන එකට ආදරේ කරන්න පටන් ගත්තා..

මං මගෙ wedding එක වෙනකොට අවුරුදු 10ක් වගේ කාලයක් තනියමම ජීවත්වෙලා.. දන්නෙම නැතුව ඇත්තටම මං පුදුම තරම් ඒ දේට ආදරේ කරලා..

මුලින් පුංචි පුංචි ගෙවල් වල ඉඳපු මටයී Sweckටයී මේ දැන් වෙද්දි මේ වගේ හොඳ පරිසරේක තියෙන ගෙදරක ජීවත්වෙන්න පුළුවන් වුණේ මගේ මේ ඉගෙනීම නිසා. මං දවසක මං ඒ ඉඳපු තැන් ගැන ඔයාලා එක්ක බෙදාගන්නම්. මං හිතනවා ඒ කතාව තව කෙනෙක්ට බලාපොරොත්තුවක් දේවි කියලා.

දැන් වුණත් මං ඉන්නෙ කුලී ගෙදරකනෙ කියලා කෙනෙක්ට හිතෙන්න පුළුවන්. හැබැයී මං ඉන්නෙ මගෙම වියදමින් මං ජීවත්වෙන තැනක. ඒ වගේම හුඟක් හොඳ, ලස්සන, ආරක්ෂිත පරිසරයක.

කියනවා නම් කියන්න තව දේවල් මහා ගොඩයී.. මට දැනෙන විදිහට මගේ ජීවිතේ මගේ වටා තියෙන හැම පුංචි දෙයක්ම මට ලැබුණේ මේ ඉගෙනීම නිසා කියලයී මට හිතෙන්නෙ, දැනෙන්නෙ. මොකද අම්මා නැති වුණාට පස්සෙ මගේ ජීවිතේ හැඩ කරපු ගුරුවරු පවා මගේ ජීවිතේට මුණගැහුණෙ මගෙ ඉගෙනීම නිසා..

ඉතින් විශ්වාස කරන්න,, ඉගෙනීමට පුළුවන් ඔයාගෙ ජීවිතේ වෙනස් කරන්න.. ඔයා මේ ඉන්න පුංචි තැනේ ඉඳලා හෙමින් හෙමින් සාර්ථකත්වයෙ හිනිපෙත්තටම ඔයාව අරගෙන යන්න ඔයාගෙ ඉගෙනීමට පුළුවන්..

අන්න ඒ නිසා විශ්වාසයෙන් ඉගෙනගන්න. ඉගෙනගන්න එකට ආදරේ කරන්න. ආස කරන්න. අකමැත්තෙන් නැතුව ආදරෙන් ඉගෙනගන්න.. දවසක ඒ ආදරේම ඔයාට ආශිර්වාදයක් වේවි... ඔයාට ලස්සන ජීවිතයක් ලබලා දේවී..

මේ ගැන ඔයාලගෙ ලස්සන වචන කියවන්න මං හරීම ආසාවෙන් බලන් ඉන්නවා..

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #fyp #fypシ #lifeinspiration #positivevibes #studytips

2 months ago | [YT] | 111

Study with Gimi

මිනිස්සුන්ගෙ හීන විවිධයී..

මිනිස්සුන්ගෙ හීන එකිනෙකාට හුඟාක් වෙනස්.. හිතන පතන විදිහ, සාර්ථකත්වය මනින මිනුම්, ජීවිතේ සතුටුවෙන විදිහ හුඟක් වෙනස්.. ඒ තමයී මිනිස්සුන්ගෙ හැටී.. එහෙම නැතුවත් බෑනෙ.. ලෝකෙ හැමෝම එක වගේ වුණොත් කෝ ඉතින් විවිධත්වයක්..

මේ ළඟදි මට message එකක් ආවා එක ගෑණු ළමයෙක්ගෙන්. මේ article එක ලියන්නෙ එයා වෙනුවෙන්.. එයා වගේ අත්දැකීම් වලට මුහුණදෙන තව අය ඉන්නවා නම්, ඒ අයට තව තවත් ශක්තිමත් වෙන්න උදව්වක් වෙන්න.. මං කැමතියී මේක කියවන වැඩිහිටියෙක් නම් මේ ගැන ඔයාලගෙ අදහස් කියවන්න.. ඒ වගේම මේ වගේ කිසිම දරුවෙක්ව මානසිකව පීඩාවට ලක් නොකරනවා නම්..

"අක්කෙ අපේ අම්මගෙන් මට පුදුම වදයක් තියෙන්නෙ. මට දැන් අවුරුදු 26ක්. මට බඳින්නම කියනවා. මට බඳින්න ඕන නෑ. මට හීන තියෙනවා. මගෙ හීන වෙනස්. මගෙ ජීවිතේ බැඳලා පවුලක් වෙන එක හීනයක් නෙමෙයී.. මගෙ අම්මා විඳපු සමහර දුක් මං දැක්කා.. මට ඕන නිදහසේ සතුටින් ජීවත්වෙන්න. ඒත් මගෙ අම්මා මේක තේරුම් ගන්නෙ නෑ.. අපි දෙන්නා කලින් හුඟක් හොඳින් හිටියා. දැන් අම්මයි මගෙයි අතර මේ නිසා ප්‍රශ්න හුඟයී. අපේ නෑදැයොත් එයාගෙ ඔළුවට විසබීජ දානවා.. ඇයි අක්කෙ අම්මට මං එක්ක කලින් වගේ හොඳට ඉන්න බැරි ?? ඇයි අක්කෙ මගෙ සාර්ථකත්වයන් දැකලා සතුටු වෙන්න බැරි ??"

මං ඇත්තටම ඒ message එක ඉස්සරහ නිරුත්තරයී. මට දෙන්න උත්තර නෑ. මං පස්සෙ හොඳට හිතලා ටිකක් වෙලාව අරන් එයාගෙ හිත ටිකක් strong වෙන්න, එයාගෙ හිත හදාගන්න පුළුවන් විදිහෙ උත්තරයක් දුන්නා. සමහර විට ඉක්මනින්ම එයා අම්මලා ඉන්න ගෙදරින් අයින් වෙලා ස්වාධීන විදිහට එයාගෙ ජීවිතේ පටන් ගනීවි (මේක කියවන කෙනෙක්ට හිතෙන්න පුළුවන් ඒක වැරදියි වගේ දෙයක්.. ඒත් ඒ ළමයගෙ පැත්තෙන් එයා අසීමිතව මානසිකව පීඩාවට ලක්වෙනවා. මං විශ්වාස කරනවා දෙමව්පියෙක්ට වුණත් දරුවෙක්ව අසීමිතව මානසිකව පීඩාවට ලක් කරන්න අයිතියක් නෑ කියලා..)

මං කිව්වනෙ මුලින්ම ජීවිතේ මිනිස්සුන්ට තියෙන්නෙ විවිධාකාර බලාපොරොත්තු. එක ළමයෙක් පුංචි කාලෙ ඉඳලා ලස්සන වෙඩින් එකක් අරන්, ලස්සන පවුලක් හදන එක ගැන හීන දකිනකොට,,, තවත් ළමයෙක් හීන දකින්නෙ කවදහරී මූල්‍යමය වශයෙන් එයාගෙ ජීවිතේ ස්ථාවර වෙන්න. රට රටවල් වල ඇවිදින්න. එයාගෙ හීන දැකපු වාහනේ අරගෙන පදින්න..

එතකොට හිතන්න විවාහ වුණු සමහර දෙන්නෙක් ළමයෙක් වෙනුවෙන් හීන දකිද්දි, විවාහ වුණු තවත් දෙන්නෙක් හීන දකින්නෙ ලෝකෙ වටේම travel කරලා වයසට ගියහම බැඳීම් අඩු කරලා නිදහසේ ඉන්න විදිහක්.. මිනිස්සුන්ගෙ තෝරාගැනීම් විවිධයී..

මේ හැමදේටම හුඟක් දුරට බලපාන්නෙ පුංචි කාලෙ එයාලා ලබන අත්දැකීම්. එයාලට දැනෙන විදිහ. ටික ටික වයසින් වැඩෙනකොට ඒ ලබපු අත්දැකීම්, මුහුණදීපු සිදුවීම් හැමදේමත් පාදක කරන් එයාලා තීරණය කරනවා එයාලා කොහොමද ජීවත්වෙන්න යන්නෙ කියන දේ..

මට නම් හිතෙන්නෙ දෙමව්පියො මේ දේ ගැන තේරුම් නොගැනීම නිසා වෙන ලොකුම හානිය තමයී ඔවුනොවුන් අතර තියෙන සම්බන්ධය බිඳිලා යන එක. දෙමව්පියන් ඔවුන්ගෙ කෝණයෙන් බලලා, ඔවුන්ගෙ ඒ කාලෙත් එක්ක හිතලා අවවාද ළමයින්ට දෙනවා. ඒ දුන්නත් මං හිතන්නෙ තෝරාගැනීමේ අයිතියක් ඔවුන්ට තිබිය යුතුයී..

මොකද විශේෂයෙන්ම දැන් ගැහැණු ළමයි ගන්නකො,, ඉස්සර හුඟක් වෙලාවට අපිට දකින්න ලැබුණෙ පවුල බලාගෙන, ළමයින්ගෙ යුතුකම් ඉටු කරගෙන, මහත්තයගෙ යුතුකම් ඉටු කරගෙන ජීවත්වෙන අම්මා කෙනෙක්. සම්පූර්ණයෙන්ම ගෙදර වෙනුවෙන්, තම පවුල වෙනුවෙන් කැපවුනු ගෘහණියක්..

දැන් මේ දේ හාත්පසින්ම වෙනස්. හුඟක් ගැහැණු අය තමන්ගෙ ස්වාමියා එක්කම පවුලේ මූල්‍ය ශක්තිය වෙනුවෙන් කරට කර වෙහෙසෙනවා.. එයාලටත් පවුල කියන දේට අමතරව පරිබාහිර ලෝකයක් තියෙනවා.. හුඟක් විඩෙක එයාලා සතු අධ්‍යාපන සුදුසුකම් හැමදේමත් නිසා එයාලා කිසිම විටෙක එයාලගෙ වෘත්තීය ජීවිතේ අත් හරින්නත් සූදානම් නෑ..

මගෙ අම්මා ගෘහණියක්. හැම පුංචි දේටම එයාට තාත්තගෙන් සල්ලි ඉල්ලන්න වුණා. සමහර වෙලාවට මං දැක්කා ඒක කරදරයක් වගේ හැඟීමක් තාත්තගෙ මූණෙ. හැබැයී එයා දුන්න. මට දැනුණ විදිහට අම්මා කැමති සමහර දේවල් එයාට ඒ නිසාම මඟ ඇරුණා.. මේ නිසාමද කොහෙද මගෙ අම්මා හරිම අපූරු උපදෙසක් මට දුන්නා "හොඳට ඉගෙනගන්න. කවදහරි ඉහළටම යන්න. ඔයා කැමති හැමදේම ඔයාටම එතකොට අරගන්න පුළුවන්. කවදහරි ස්වාධීන මනුස්සයෙක් වෙන්න".. මගේ අම්මා ලබපු අත්දැකීම් එක්ක ඔය තමයී මට ලැබුණු උපදෙස. මං හිතනවා ඒ දේ තමයී මගේ ජීවිතේ මේ තරම් දුරක් ගෙනාවෙත් කියලා.

ඉතින් පුළුවන් නම් දෙමව්පියොන්ගෙන් මං ආදරෙන් ඉල්ලන්නෙ දරුවො වැඩිහිටියෝ වුණාට පස්සෙ ඔවුන්ට අවැසි ලෙසින් ජීවත්වෙන්න ඉඩදෙන්න. වැරැද්දක් කරනවා නම් විතරක් අවවාදයක් දෙන්න.

බඳින හෝ නොබඳින තීරණය ඔවුන් 100%ක් ඔවුන් සතුයී. මොකද ඒ පුද්ගලයා සමඟ ජීවත්වෙන්නෙ ඔවුන්. ඒ වගේම ළමයි හදන හෝ නොහදන තීරණයත් 100%ක් ඔවුන් සතුයී. මොකද ඔවුන් ඔබේ ළමයින් වූ පමණින් ඔබට මුණුපුරු මිණිපිරියන් ලබාදීමේ වගකීම ඔවුන් සතු නොවේ. එය හුදෙක්ම ඔවුන්ගේ තෝරාගැනීමක්..

ඔයාටත් කවදාමහරී දවසක මේ වගේ තත්ත්වයකට මුහුණදෙන්න වුණොත්;

🔆 ඔයාගෙ අදහස එයාලට කියන්න. ඇයි ඔයා ඒ තීරණය ගත්තෙත් කියලා කියන්න. (ඔවුන් තේරුම් ගත්තොත් ඔයාට නිදහසේ ඉන්න පුළුවන් වේවී.. හුඟක් දුරට ඔවුන් තේරුම් ගන්න එකක් නෑ..)

🔆 මොන දේ ඒ සම්බන්ධයෙන් කිව්වත් නිහඬව ඉන්න. පුළුවන් තරම් ඔයාට කේන්තියක් එනවා නම් හිතෙන් මෛත්‍රී කරන්න. එතකොට ඔයාට කේන්ති යන එකක් නෑ.. කාලයක් යද්දි එයාලා වුණත් කියලා කියලා නතර කරගනීවී සමහර විට.

🔆 වැඩිහිටියන් වුණාට පස්සෙ, වෙනම ජීවත්වෙන්න. අවුරුදු 28ක් වෙනකොටවත් අවම ඔයා විවාහ වුණත්, අවිවාහක වුණත් වෙනම ජීවත්වෙන්න උත්සාහ ගන්න. ලංකාවෙ ආර්ථිකේ එක්ක ගෙයක් එක පාරින්ම හදන්න අපහසු වෙයී, හැබැයී rent එකට ඉන්න ඔයාට පුළුවන්. එහෙම නැත්නම් ටිකක් වැඩිපුර facilities තියෙන boarding කාමරයක් වුණත් ඔයාට ගන්න පුළුවන්.. එතකොට ඔයා ස්වාධීනයී කියන එක ටික ටික ඔයාට දැනෙන්න ගන්නවා..

🔆 ඔයාගෙ මානසික නිදහස රැකගන්න. මොනදේ වුණත් මං විශ්වාස කරන්නෙ මනුස්සයෙක්ගෙ ජීවිතේ අංක එක මානසික නිදහස. ඒ මනුස්සයා මනසින් නිදහස් වෙන තරමටම එයා සාර්ථකත්වයට යන ගමන සෑහෙන ගුණයකින් ඉක්මන් වෙනවා.. අන්න ඒ නිසා ඔයාගෙ මානසික නිදහස රැකගන්න...

ඉතින් මතක තියාගන්න මේ ජීවිතේ ඔයාගෙ. ඇත්ත ජීවිතේ දුන්නෙ අම්මා තාත්තා තමයී. ඒ වෙනුවෙන් ඔවුන්ට යුතුකම් ඉටු කරන්න. ලෙඩක් දුකක් වුණොත් හැකි පමණින් බලන්න, ඉඳලා හිටලා trip එකක් එක්ක යන්න, කන්න කැමතී කෑම බීම එයාලා වෙනුවෙන් ගෙනිහින් දෙන්න,, ඔය ඕනම දෙයක් කරන්න.. හැබැයී එයාලගෙ සතුට වෙනුවෙන් කියල ඔයාලගෙ සතුට පරදුවට තියන්න එපා.. මේ ජීවිතේ අයිති ඔයාට. ජීවත්වෙන්න ඕන කොහොමද කියලා තීරණය කරන්න ඕන ඔයයී..

හැමදාමත් වගේ මේ ගැන ඔයාලගෙ අදහස් කියවන්න මං හරීම ආසාවෙන් බලන් ඉන්නවා.. එකතු කරන්න ඔයාලගෙ අත්දැකීම්, අදහස් හැමදේම. සමහර විට තව කෙනෙක්ට ඔයාගෙ ඒ වචන කීපය මහමෙරක් තරම් වටීවි.

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #fyp #fypシ #positivevibes #Chat

3 months ago | [YT] | 96

Study with Gimi

මේ අවුරුද්දෙ අපි සෑහෙන්න trip ගියා.. 🧿😍.. මං ඇත්තටම travel කරන්න පුංචි කාලෙ ඉඳලා හීන මවපු කෙනෙක්. කොහොමෙන් කොහොමහරී ඒකත් ජීවිතේ හැබෑවක් වෙලා..

ඉතින් සාමාන්‍යයෙන් trip එකක් යද්දි, අනිවාර්‍යෙන්ම miss නොකර අරගෙන යන දේවල් ටිකක් මං ගාව තියෙනවා.. අර සිද්ධාලේප වල කියන්නෙ 'සෑම ගෙදරකම සිටිය යුතු වෙද මහත්තයා' කියලා.. අන්න ඒ වගේ මං ගමනක් යද්දි මේ දේවල් ටික අනිවාර්‍යෙන්ම මං ළඟ තියෙනවා..

මං අද මේ post එක ඔයාලා එක්ක බෙදාගන්නෙ, ඔයාලා කාටම හරිත් මේක කියවලා පුංචි දෙයක් හරි ඔයාලගෙ travels ලේසි කරගන්න පාවිච්චි කරගන්න පුළුවන් වෙයී කියලා හිතලයී..

🌸 මගෙ journal එක..

කෙනෙක්ට හිතෙන්න පුළුවන් ඇයි මේ journal එකක් යන යන හැම තැනකම අරන් යන්නෙ කියලා. ඒකට හේතුව තමයී ඒ ගමන ගැන ලස්සනටම අදහස් ටික තියෙන්නෙ ඒ දවසෙ නිසා.. ඒ කියන්නෙ ඒ දවසෙම රෑට මං ඒ ගමන ගැන මට දැනුණු දේ මගෙ journal එකේ ලියනවා..

තැන් තැන් වලට ගිය tickets එහෙම අලවනවා.. මං විශ්වාස කරන විදිහට දවස් ගාණකට පස්සෙ ගෙදර ඇවිත් එහෙම ලියනවට වඩා එදා දවසෙම ඒ අත්දැකීම ලියනකොට ඒක හරිම සුන්දරයී.. ඒ වගේම කිසිම experience එකක් miss වෙන්නෙ නෑ..

🌸 මගෙ pencil case එක..

මට ඉතින් journal එක ලියන්න පෑන් එහෙම ඕනනෙ. ඒ වගේම කතුරක්, පොඩි ගම් එකක් වගේ ඔය හැමදේමත් එක්ක මං pencil case එකත් අරගෙන යනවා..

🌸 Janet Pink Petals Deo එක

Janet pink petals deo එකෙන් මට දවසම fresh එකේ සුවඳට ඉන්න පුළුවන් වෙනවා.

සාමාන්‍යයෙන් trip එකක් ගියහම මං hotel room එකක් ඇතුළෙම ඉන්න කෙනෙක් නෙමෙයී.. මට හරිම අමාරුයී එකම තැනකට වෙලා ඉන්න. ඉතින් ඒ නිසා අපි trip එකක් යන්නෙ ගොඩක් තැන් වල ඇවිදින්න plan කරගෙන..

ඉතින් ඒ වගේ හුඟක් තැන් වල ඇවිදලත්, එක එක activities කරලත් දවසම fresh එකේ ඉන්න මට පුළුවන් වෙලා තියෙන්නෙ Janet pink petals deo එක නිසා..

ඒ වගේම ඒක ගාපු ගමන් එන light smell එකට මං පුදුම තරම් ආසයී..

🌸 මගෙ තොප්පිය..

ඔයාලා දැනටමත් Study with Gimi පවුලෙ සාමාජිකයෙක් නම් මේ තොප්පිය හුඟක් වතාවක් දැකලා ඇතී.. මගේ කැමතිම සහ ප්‍රියතම සහ එකම තොප්පිය.. ඕනම trip එකකදි මගෙ ඔළුවට හෙවණක් වෙන ගමන් සගයා..

🌸 මගෙ බෙහෙත් පසුම්බිය

මේ cute purse එක අපේ ගෙදර ownerගෙන් මට ලැබුණු gift එකක්.. ඉතින් මේකත් දැන් මං යන යන හැම තැනකම යනවා. මේක නම් හැබැයී trip විතරක් නෙමෙයී office පවා යනවා..

මේකෙ තියෙන්නෙ එදිනෙදා ජීවිතේ වුවමනා වෙන්න පුළුවන් බෙහෙත් කීපයක්. දන්නවද මං මෙහෙම එකක් හදාගන්න හේතුව.. මේක ජීවිතේට වටින අතුරු කතාවක් ඒ නිසා බෙදාගන්න හිතුවා..

'අපි කැලෑවල් වල යනවා.. යාල, විල්පත්තු වගේ ඒවගෙ. ඉතින් ඒ ගියහම ඇතුළෙ නැවතුණොත් ලොකුවට පහසුකම් නෑ. හැබැයී ඒ අත්දැකීම ගැන කියන්න ඒ තරම් වචන නෑ.. ඉතින් එක් සැරයක් ඕකෙ ගියපු එක්කෙන්ක්ට මොකෙක්ද මන්දා මැස්සෙක් කාලා, ඒ මැස්සා කාපු එක එයාට විස වෙලා වගේ වෙලා. වෙලාවට එයා ළඟ piriton එකක් තිබිලා. ඒක බීපු නිසා තමයී කැලෙන් එළියට ඇවිත් බෙහෙත් ගන්නකන් එයාගෙ ඒ විස control වෙලා තියෙන්නෙ.. ඉතින් ඔය කතාව අහපු දවසෙ ඉඳලා මං මගෙ මේ බෙහෙත් purse එක ළඟම තියාගන්නවා..'

🌸 Tooth paste සහ Tooth brush

මං braces දාලනෙ ඉන්නෙ. ඉතින් හැම වෙලේම දත් වල කෑම රැඳෙනවා. ඒක එහෙම වුණහම මට දැනෙන්නෙ මගෙ personality එකට ඒක හරි නෑ වගේ. අනිත් එක ඒක දකින කෙනෙක්ට වුණත් අප්පිරියයිනෙ.. ඒ නිසා කොහේ ගියත් මං ගාව මේ දෙක නම් නැතිවෙන්නෙ නෑ..

🌸 Office laptop එක

කෙනෙක්ට හිතෙන්න පුළුවන් 'trip යන්නත් office laptop අරන් යන්න මට පිස්සුද' කියලා.. ඔව් ඇත්ත මං නිවාඩු දාලා තමයී යන්නෙ.. හැබැයී හිතන්න office එකේ urgent වැඩක් එනවා කියලා.. මං ඒ දේ හරිම ආසාවෙන් කරනවා. මොකද ඒක මගෙ job එකට related දෙයක්. මං කවදාවත් ඒක කරදරයක් විදිහට හිතන්නෙ නෑ..

Annoy වෙන වෙලාවලුත් නැතුව නෙමෙයී,, ඒත් මං ඒ වෙලාවට මතක් කරගන්නවා මං මගෙ profession එකට කොයිතරම් ආදරෙයිද කියන එක.. එතකොට shape එකේ ඒක අඩු වෙනවා.. සාමාන්‍යයෙන් trip එකක් ගියහම එහෙම වැඩ එන්නෙ නෑ,,, ඒත් occasionally එන්න පුළුවන්..

🌸 කතා පොතක්..

මං කොහේ ගියත් කතා පොතක් කියන්නෙ මගේ ළඟ් හැමවෙලේම තියෙන දෙයක්. මොකද social media වල ඔහේ scroll down කර කර ඉන්නවට වඩා මං කැමතියී පුංචි හරි වෙලාවක් ලැබුණු ගමන් පොතක් කියවන්න.. ඉතින් ඒ නිසාම කොහෙ හරි යන එනකොට, අනිත් අය TV බලනකොට, එක්කො දවල් කාලෙ නිදියනවා නම්,,, මං කරන්නෙ මං ආසම දේ.. එක පොතක් ඉවර වෙන්න ළඟයී නම් මං තවත් පොතක් අරගෙන යනවා.. ඉතින් ඔයාටත් පුළුවන් කැමති නම් මේ දේ ජීවිතේ පුරුද්දක් කරගන්න...

ඉතින් ඔන්න මේ දේවල් 8 නම් මං කොහේ ගියත් අනිවාරෙන්ම මං ළඟ නම් තියෙනවා... ඔයාගෙ ළඟත් මේ වගේ නැතුවම බැරි දේවල් list එකක් තියෙනවද ???

හැමදාමත් වගේ ඔයාලගෙ අදහස්, අත්දැකීම් වලට අපේ comment තීරුව විවෘතයී...

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #positivevibes #fyp #fypシ #janet #janetpinkpetals #freshstart

Skip the Carousel

1 2 3 4 5 6 7 8

3 months ago | [YT] | 141

Study with Gimi

'11:11'

ඔයා law of attraction විශ්වාස කරනවද ??

මං නම් කරනවා.. මොකද සරලවම law of attraction කියන්නෙ positive thinking නිසා සහ අපි ස්තූතිවන්ත වෙනවා නම් අපිට ලැබෙන ආශිර්වාදයන් නිසා.. මං ඒ දේ අත් විඳලා තියෙනවා. ඒ කියන්නෙ අපි ස්තූතිවන්ත වෙන තරමට ඒ දේම පෙරළා අපිට ආශිර්වාදයක් වෙනවා..

ඉතින් 11:11 කියන්නෙ විශේෂ දවසක් කියලා සමහර තැන් වල සඳහන් වෙලා තියෙනවා. හැබැයී ඒ ගැන තහවුරු වුණු දේවල් නම් හෙව්වට මට හොයාගන්න බැරි වුණා. හැබැයි ඒත්,, 11:11 මේ තරම් සුභයී කියනවා නම් ඇයී අපි එදාට අපේ හීන වෙනුවෙන් වැඩක් නොගෙන ඉන්නෙ කියලා හිතුව නිසයී මේ article එක ඔයාලා වෙනුවෙන් බෙදාගන්නෙ..

මට දැනෙන විදිහට මං කියන්නම්, 11:11 ඇයී හීන දකින, ඒ හීන හැබෑ කරගන්න මහන්සිවෙන මනුස්සයෙක්ට විශේෂ වෙන්නෙ කියලා..

🧿 ඔයාගෙ ජීවිතේ තියෙන හොඳ සිතිවිලි මතක් කරගන්න හොඳ දවසක්

11:11 කියන්නෙ ඔයාගෙ ළඟ තියෙන හොඳ, powerful සිතිවිලි මතක් කරගන්න හොඳ දවසක්. හොඳ මොහොතක්. අද රෑ. 11.11ට හිතන්න ඔයාට ඇත්තටම ජීවිතේ ඕන මොනවද කියලා. ඔයාට කොයිතරම් නම් ඒ දේ ඕනද කියන එක ගැන හිතන්න.

🧿 අලුත් ආරම්භයක් පටන් ගන්න හොඳ දවසක්

ඒ කියන්නෙ ඔයා කාලයක් තිස්සෙ කරන්න හිත හිත හිටපු දෙයක් පටන් ගන්න හොඳම දවසක්. ඔයා ඉගෙනගන්න ආසාවෙන් හිටපු දෙයක්, පටන් ගන්න හිටපු business එකක්, අලුතෙන් job එකකට apply කරන්න,,, ඔය වගේ ඕනම අලුත් ආරම්භයකට හොඳ දවසක්.

🧿 විශ්ව ශක්තියත් එක්ක එකතු වෙන්න ලැබුණු අවස්ථාවක්

සමහර තැන් වල මං කියවලා තියෙනවා 11:11 කියන්නෙ ආත්මීය දොරකඩක් කියලා. ඒ කියන්නෙ විශ්වයත්, ඔයාගෙ සිතිවිලිත් එකට එකතු වෙන මොහොතක් කියලා. අන්න ඒ නිසාම කියනවා මේ දවසෙ කරන ප්‍රාර්ථනාවන් හරිම powerful කියලා.. ඒ නිසා විශ්වාසයෙන් ඔයාගෙ ජීවිතේ වෙනුවෙන් හොඳ ප්‍රාර්ථනාවක් කරන්න.. මෙතනදි 'විශ්වාසය' කියන දේ හරීම වැදගත්..

🧿 ආකර්ෂණ නීතිය practice කරන්න හොඳම දවසක්

මේ දවසෙ කරන ප්‍රාර්ථනා ගොඩක් බලවත්.. ඉතින් අපිට පුළුවන් විශ්වයට ඔයාට ඕන දේ ගැන, ඔයාගෙ හීන ගැන පුංචි ලිපියක් ලියන්න. ඒ වගේම ඔයාට දැන් ලැබිලා තියෙන දේවල් ගැන ස්තූතිවන්ත වෙන්න.. ඒ ලියද්දි ඒ දේ හරිම පැහැදිලිව ලියන්න.. විශ්වාසයෙන් ලියන්න.

ඉතින් සරලවම,, 11:11 කියන්නෙ විශ්වයත්, ඔයාගේ හදවතත් එකම frequency එකකින් එකතුවෙන මොහොතක් 🕊️..

නිකන් ගෙවෙන දවසක්,,, ඔයාට පුළුවන් ඔයාගෙ ජීවිතේට විශ්වාසයක් ලබලා දෙන දවසක් කරගන්න.. ඉතින් අනිවාරෙන්ම අද රෑ. 11.11ට ඔයාගෙ ජීවිතේ වෙනුවෙන් විශ්වාසයෙන්, ජීවිතේ වෙනස් කරවන විදිහෙ සුභ ප්‍රාර්ථනාවක් කරන්න...

මං ප්‍රාර්ථනා කරනවා ඔයාලා හැමකෙනෙක්ගෙම ජීවිතේ හැම සුභ ප්‍රාර්ථනාවක්ම සර්වප්‍රකාරයෙන් සාර්ථක වෙන්න කියලා...

හැමදාමත් වගේ ඔයාලගෙ අදහස්, අත්දැකීම් වලට අපේ comment තීරුව විවෘතයී... මං ආසාවෙන් බලන් ඉන්නවා ඔයාලගෙ රසවත් අත්දැකීම් කියවන්න...

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #positivevibes #positiveaffirmations #lawofattraction

3 months ago | [YT] | 121

Study with Gimi

ඔයාටත් පාඩම් කරන දේවල් අමතක වෙනවද???

විභාගයකට ලෑස්ති වෙනකොට හුඟක් දෙනෙක් මුහුණදෙන පොදු ප්‍රශ්නයක් තමයි මේ. කොච්චර පාඩම් කළත් මතක නැති වෙන එක. ඇත්තටම ඉතින් ඔයාලට විතරක් නම් නෙමෙයි, මටත් ඒ දේ එහෙම්ම වෙනවා. අපි හැමෝම සාමාන්‍ය මිනිස්සුනෙ.

හැබැයි පාඩම් කරන කාලෙදි, exam එකට ළං වෙද්දි, පාඩම් කරන ඒවා අමතක නොවී තියාගන්නත් ඕනනෙ..

ඉතින් ඒ වෙනුවෙන් මං try කරන tips කීපයක් තමයි මේ. ඔයාලටත් පුළුවන් ඔයාලගෙම විදිහට මේ tips ටික try කරලා බලන්න..

💁🏻‍♀️ හිතින් මතක් කරන්න.

ඔයාලා පාඩමක් පාඩම් කළාට පස්සෙ, එහෙම නැත්නම් පැයක් විතර පාඩම් කළාට පස්සෙ ඔයාලා පාඩම් කරපු දේවල් ටික ඔයාලා හිතින් මතක් කරන්න. ඔයාලගෙ ඔළුව ඇතුළෙ ඒ කොටසට අදාළව දළ සටහනක් ඇඳගන්න. මේ මේ දේවල් මං පාඩම් කළා වගේ summary එකක්.

මේක කොළේක ලියාගන්න වුණත් ඔයාලට පුළුවන්. ඒක එක එක්කෙනාට වෙනස් වෙන්න පුළුවන්. මොකද කෙනෙක් ඔළුවෙන් map එකක් හදාගන්නකොට, කෙනෙක් ඒකම කොළේක ලියලා map එකක් හදාගන්නවා වෙන්න පුළුවන්..

💁🏻‍♀️ Mind map පාවිච්චි කරන්න.

ඔයාලා කලින් මං කිව්ව exercise එක කොළේක ලියනවා කියන්නෙ ඒකෙන් හැදෙන්නෙ mind map එකක්. ඔයා ආයි ආයි විෂය කරුණු මතක් කරද්දි මේ mind map එක පාවිච්චි කරන්න ඔයාට පුළුවන්.

ඒ වගේම ඒ mind map එක ටික ටික ඔයාගෙ ඔළුවෙ පහසුවෙන් තැන්පත් වෙන්න පටන් ගන්නවා.. එතකොට ඔයාට හරිම ලේසියි ඔයාගෙ විෂයය කරුණු මතක් කරගන්න.

Mind map කියන එක ඔයාට confusing නම් ඔයාලට පුළුවන් ඒ ඒ පාඩමට අදාළව outline එකක් හදාගන්න. ඒ කියන්නෙ පාඩමේ අන්තර්ගතය point විදිහට ලියාගන්න එක.

💁🏻‍♀️ ඒ ඒ පාඩමෙන් එන්න පුළුවන් ප්‍රශ්න හඳුනාගන්න.

ඔයාලා කොයිතරම් පාඩම් කළත් වැඩක් නෑ, ඒ ඒ පාඩමෙන් එන්නෙ මොනවගේ ප්‍රශ්නද කියලා නොදැන. ඒ නිසා ඔයාලා පාඩමක් ඉවර කරපු ගමන් ඒ පාඩමෙන් එන්න පුළුවන් ප්‍රශ්න මොනාද කියන දේ අනිවාර්‍යෙන්ම බලන්න.

Past papers බලන්න, අභ්‍යාස කරන්න, නැත්නම් examiner කෙනෙක්ගෙ answer scripts questions එක්කම බලන්න. එතකොට ඔයාට ටික ටික ඔයාගෙ ඔළුවෙ තියෙන විෂයය කරුණු කොහොමද ප්‍රශ්නෙකට ගොනු කරගන්නෙ කියලා තේරෙන්න පටන් ගන්නවා.

💁🏻‍♀️ පාඩම් කරපු දේවල් test කරන්න.

ඔයා කොයිතරම් පාඩම් කළත් ඒ වගෙන් ප්‍රශ්න වලට උත්තර ලියන්න ගන්නකන්, ඔයා කොච්චරක් දුරට ඒ ගැන දන්නවද කියලා දැනගන්න විදිහක් නෑ.

ඒ නිසා වඩා වැදගත්ම දේ තමයි පාඩම් කරපු දේවල් ඇත්තටම ඔයාලගෙ ඔළුවෙ තියෙනවද කියලා තහවුරු කරගන්න එක. ඒකට ඔයාලට past papers, model papers කරන්න පුළුවන්. එහෙම නැත්නම් කාටහරි ඔයාලගෙන් ප්‍රශ්න අහන්න කියන්න පුළුවන්. තව ඔයාලට කාටහරි උගන්නන්නත් පුළුවන්.

මේකෙන් වෙන වටිනම දේ තමයි ඔයාට ඔයා ගැන තියෙන විශ්වාසය වැඩිවෙන එක. ඒ තමයී exam එකකට මුහුණදෙනකොට ඔයා ළඟ තියෙන වටිනම දේ.

💁🏻‍♀️ නිතරම මතක් කරන්න.

හිතන්න, ඔයාලා පළවෙනි පාඩම පාඩම් කළාට පස්සෙ දෙවෙනි පාඩමට ඔයාලා යනවා. ඉතින් ඒ දෙවෙනි පාඩම පාඩම් කරලා ඉවර වුණාට පස්සෙ ඔයාලට පුළුවන් පාඩම් දෙකම ආයිමත් මතක් කරන්න. තුන්වෙනි පාඩම පාඩම් කළාට පස්සෙ පාඩම් තුනම ආයි මතක් කරන්න.

එතකොට විෂයය කරුණු නිරන්තරයෙන්ම භාවිතා වෙන නිසා ඔයාලට අමතක වෙන්න තියෙන ඉඩකඩ අඩුයි.

💁🏻‍♀️ කට පාඩම් කරන්න එපා.

ගොඩක් අය කරන ලොකු වැරැද්දක් තමයී මේ කට පාඩම් කරන එක. එහෙම නැත්නම් පොතේ තියෙන දේ ඒ විදිහටම මතක තියාගන්න උත්සාහ කරන එක. ඒ වෙනුවට ඔයාට පුළුවන් විෂයය කරුණු අවබෝධ කරගන්න උත්සාහ ගන්න.

පොතේ තියෙන නිර්වචන වෙනුවට ඔයාලගෙම නිර්වචන හදාගන්න. එහෙම නැත්නම් ඔයාලට සමීප දෙයක් එක්ක මතක තියාගන්න උත්සාහ ගන්න. මොකද එතකොට ඒ වගේ දෙයක් ලේසියෙන් ඔයාලට අමතක වෙන්නෙ නෑ. ඒ වගේම මතකෙ තියෙන කාලයත් සාපේක්ෂව හුඟක් වැඩියී..

💁🏻‍♀️ ඔයාලගෙම විදියකට පාඩම් කරන්න.

හැමෝටම එකම විදිහට පාඩම් කරන්න බෑ. සමහර අයට හිතින් පාඩම් කළහැකි. තවත් අයට කෑ ගහලා කියවන්න ඕන. තවත් අයට short notes ඕන. තවත් අයට papers වලින් පාඩම් කරන්න පුළුවන්.

ඉතින් කවුරුත් කියන විදිහකට නැතුව ඔයාලට පුළුවන් ඔයාලගෙම විදිහට පාඩම් කරන්න. එතකොට ඒක ගොඩාක් ඵලදායී වෙනවා. ඒ නිසා තාමත් ඔයා ඔයාට ගැළපෙන පාඩම් කරන ක්‍රමය තාමත් හොයාගෙන නැත්නම් අදම එක එක විදි experiment කරලා ඔයාට ගැළපෙන ක්‍රමය හොයාගන්න.

💁🏻‍♀️ Brain excercises කරන්න.

භාවනා කරන්න, තව brain excercise game apps තියෙනවා ඩවුන්ලෝඩ් කරගන්න, card pack එකෙන් කරන්න පුළුවන් games තියෙනවා, YouTube එකේ වීඩියෝස් තියෙනවා..

ඉතින් ඔයාලාට ඕනකමක් වගේම පුළුවන්කමකුත් තියෙනවා නම් මේ දේවල් වලිනුත් ඔයාලගෙ මතක ශක්තිය වැඩි දියුණු කරගන්න පුළුවන් (මේ ගැනත් මම ඉස්සරහට post එකක් share කරන්නම්).

මේ තියෙන්නෙ ඔයාලට පාඩම් කරන දේවල් මතකෙ ටිකක් කල් තියාගන්න උදව් වෙන හරිම සරල tips 08ක්. ඉතින් ඔයාලත් try කරලා බලන්න.. ඒ වගේම මේ වගේ ඔයාලත් පාවිච්චි කරන tips comment එකකින් අපි හැමෝමත් එක්ක බෙදාගන්න...

මං හරිම ආසයී ඔයාලගෙ අත්දැකීම් comment තීරුවෙ හරිම අපූරුවට share වෙනවා දකින්න. ඒ වගේම මං හරිම ආසයී එක එක අයගෙ වටිනා අත්දැකීම් වලින්, තව කෙනෙක්ට මඟ පෙන්වීමක් ලැබෙන අදහස් වලින් මේ comment තීරුව පිරෙනවා දකින්න.

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#gimhani_senarathne #studywithgimi #positivevibes #fypシ #fyp #studytips

3 months ago | [YT] | 63

Study with Gimi

01.11.2025 Life එකට join වෙලා හරියටම අවුරුද්දක්...

හරියටම ගිය අවුරුද්දෙ අද වගේ දවසක මං මගේ වෘත්තීය ජීවිතේ ලොකු පියවරක් තිබ්බා. ඒක plan කරපු දෙයක් නෙමෙයී, හදිස්සියෙ වුණු දෙයක්. හැබැයී ඒ work place එක මං හීන මවපු, මටත් වඩා මගෙ husband මං එතන කවදහරී work කරයී කියලා හීන මවපු තැනක්.. ඒ නිසාම ඒ තැනට මං ගියා. ඒ තැන මං හිතුවටත් වඩා හරිම ආදරෙන් මාව පිළිගත්තා.

එතනට ඇතුළු වුණු මොහොතෙ ඉඳලා එතන තියෙන හැම දෙයක්ම admire කරන්න මං පටන් ගත්තා. සාමාන්‍යයෙන් කොහොමත් මං හැම පුංචි දේකටම grateful වෙන බව ඇත්ත,, ඒත් මං මෙතන තියෙන හැම පුංචි දේකම ලස්සන දකින්න, ඒ දේවල් අගය කරන්න, ඒ ලස්සන දේවල් ගැන හැම කෙනෙක් එක්කම බෙදාගන්න පටන් ගත්තා..

මං දන්නවා ඒ හැම දෙයක් නිසාම මගෙ වටේ ඉන්න හුඟක් දෙනෙක් පවා එයාලට ඒ ලැබෙන හැම දෙයක් ගැනම ස්තූතිවන්ත වෙන්න පටන් ගත්තා කියලා. ඒ වගේම එයාලත් ඒ දේවල් වල ලස්සන දකින්න පටන් ගත්තා කියලා.. ඒ වගේම මං දන්නවා මගේ මේ කතා කියවන හුඟාක් දෙනෙක් Cinnamon Life එකේ කවදහරි දවසක work කරන්න හීන මවනවා කියලා.

🔴 Tip; ඒ හැමෝටම මං කියන්නෙ, හැම වෙලේම Cinnamon Life එකේ Linkedin එක බලන්න. Vacancy එකක් තිබ්බොත් අනිවාරෙන්ම උත්සාහ කරලා බලන්න. ඔයා ඒ කරන උත්සාහය අනිවාරෙන්ම ඔයාගෙ වෘත්තීය ජීවිතේ ලොකු turning point එකක් වෙයී. හරියටම මගේ ජීවිතේ වුණා වගේ..

මං Life එකට join වෙද්දි මට හරිම අපූරු උපදෙස් කීපයක් ලැබුණා. ඒවා උපදෙස් වලටත් වඩා මගේ විශ්වාසය ගොඩනගපු මායාකාරී වචන කිව්වොත් මං හිතන්නෙ මං වැරදි නෑ..

1️⃣ මගෙ කලින් බොස් කෙනෙක් මට හරිම අපූරු උපදෙසක් ජීවිතේට දුන්නා,,

"ගිමී ඔයා යන යන තැන සතුට බෙදන කෙනෙක්. ඔයා හැමෝගෙම ආදරේ දිනාගන්න කෙනෙක්. ගොඩක් දක්ෂ කෙනෙක්. හැබැයී මතක තියාගන්න ඔයා යන්නෙ ලංකාවෙ ලොකුම conglomerate එකට. එතන ඉන්න හැමෝම වගේ එක වගේ දක්ෂයී. ඔයාට ලොකු competition එකක් තියෙයි.

හැබැයී ඔයා ඔයා විදිහටම ඉන්න. ඔයාගෙ ඔය qualities ඒ විදිහටම maintain කරන්න. accuracy කියන එක 100% තියාගන්න උත්සාහ කරන්න. ඔයා කරන වැඩ වල පිළිවෙල ගැන හිතන්න. Unique වෙන්න. ලොකු පොඩි හැමෝමත් එක්ක කතා කරන්න.

මට විශ්වාසයී ඒ group එක ඇතුළෙ ඔයා ඔයාගෙ ගමන හරි ලස්සනට යයී.. අවුරුද්දක් යද්දි ඔයා ඒ අඩිතාලම දාගනියී. මං විශ්වාස කරනවා අවුරුදු 3ක් යද්දි ඔයා ඒ group එක ඇතුළෙ ලොකු පෙරළියක් කරයී..

ඒ වගේම කවදහරි දවසක එතන ඉන්න බෑ කියලා හිතුණොත්, මට කතා කරන්න. මෙතන ඔයා වෙනුවෙන් හැමදාම විවෘතයී..."

ඔය මං Life එකට join වෙන්න කලින් මං අහපු ලස්සනම වචන ටිකක්. ඒ වචන මට කවදාවත් මගේ ජීවිතේ අමතක වෙන එකක් නෑ. ඒ වගේම ඒ වචන හැමදාටම මට ජීවත් වෙන්න, මගේ career එකේ ගොඩනැගෙන්න ශක්තියක් වේවි.

2️⃣ ඒත් එක්කම, මාව මේ විදිහට නිර්මාණය කරපු කෙනා, ජීවිතේ මං වැටුණු කාලෙදි මාව වැටෙන්න නොදී මාව බලාගත්ත මගෙ ගුරුවරයා එදා කිව්වේ,,

"ගහක් රූස්ස විදිහට හැදෙන්න, ගහක් ශක්තිමත්ව හැදෙන්න ඒ ගහට හොඳ සාරවත් පොළොවක් ඕන. මං තදින්ම විශ්වාස කරනවා JKH එක ඔයාට රූස්ස ගහක් විදිහට වැඩෙන්න තරම් හොඳ පොළොවක් වේවි කියලා... ඔයා හුඟක් දක්ෂ කෙනෙක්. ඔයා විශේෂ කෙනෙක්.. මේ දේ ඔයාගෙ අනාගතේ වෙනුවෙන් අපි කරමූ.."

3️⃣ මගෙ 1st work place එකේ බොස් කෙනෙක් කිව්වා,

මං අපේ department එකට ගිය මුල්ම දවසෙ සෑහෙනට බය වුණා. මොකද opening එකෙන් පස්සෙ තිබ්බ 1st month end එක නිසා කට්ටිය රෑ එළි වෙනකන් ඉඳලා ඒක ඉවර කළේ. කොහොමත් මං interview එකේදිත් දන්නවා budget කාලෙට මට night හුඟක් කරන්න වෙනවා කියලා. ඒත් මං දන්නෙ නෑ මට බය හිතුණා..

මට හිතුණෙ මට මෙතැන හිටියොත් මගෙ exams ටික ඉවර කරගන්න බැරි වෙයී, මට කියලා life එකක් නැති වෙයී වගේ දෙයක්. ඇත්තටම මං හුඟක් බය වුණා. මට මේ දේ කරන්න පුළුවන් වෙයිද කියලා හිතුණා..

එදා මං කතා කළේ මගෙ පළවෙනි work place එකේ Director Financeට. මට හිතුණා එයා තමයී මේ වෙලාවෙ මට advice එකක් ගන්න හොඳම කෙනා කියලා. එයා එදා මගෙ කතාව හරිම සාවධානව අහන් ඉඳලා කිව්වෙ,

"ගිම්හානි, ඔයාට ලැබිලා තියෙන්නෙ හරිම rare opportunity එකක්. හිතන්න ලක්ෂ ගාණක් ඔයාගෙ වයස ළමයී කැම්පස් වලින් out වෙලා job එකක් ගන්න පොරකනවා. ඒ අතරින් වැඩිපුරම ඉන්නෙත් ගෑණු ළමයී. ඒ හැමෝම අතරිනුත් ඔයාට ඔය job එක ලැබුණා. ලංකාවෙ ලොකුම investment එකේ Financial Planning Analyst වෙන්න ඔයාට අවස්ථාව ලැබිලා. හුඟක් අය හීන මවන දෙයක් ඔයා හැබෑ කරන් ඉන්නෙ. අමාරු තැන් එයී, ඒත් අල්ලන් ඉන්න. ජීවිතේ කිසිම දෙයක් ලේසියෙන් ලැබෙන්නෙ නෑ. ඔයා ටික කාලයක් ඔය දේ අල්ලගෙන හිටියොත් ඔයා ජීවිතේ දිනුම්.. ඔයාගෙ immediate බොස් එක්ක ඔයාට දැනෙන විදිහ කතා කරන්න. කතා කරලා ඔළුව නිරවුල් කරගන්න.. අනිවාරෙන්ම ඔයාගෙ වෘත්තීය ජීවිතේ ලැබුණු වටිනාම අවස්ථාව මේක වෙයී.. ඔයාට පුළුවන් හරියට ඔය දේ කරන්න..."

එදා ඒ වචන තදින්ම මගෙ හිතට වැදුණා. අදටත් ඒ වචන වලට මං ස්තූතිවන්ත වෙනවා. මොකද ඒ ලැබුණු උපදෙස නිසා මං ජීවිතේ මහා හුඟක් දේවල් ඉගෙනගෙන, වෘත්තීය ජීවිතේ සුන්දර මිනිස්සු මට මුණ ගැහිලා,, හරිම අපූරු culture එකක් මට experience කරන්න ලැබිලා..

ඉතින් ජීවිතේ කියන්නෙ පුදුමාකාර දෙයක්. මේ අවුරුද්ද හරිම වේගෙන් ගෙවුණා.. හැබැයී මං මහා හුඟක් දේවල් ජීවිතේ ඉගෙනගත්තා.. මගේ වෘත්තීය ජීවිතේ ම හිතනවා මං හුඟක් significant දේවල් මේ අවුරුද්දෙ කළා.. Life එක නිසා මේ අවුරුද්දෙ මට ලැබුණු, මං අත් විඳපු දේවල් කියනවා නම්,,

✨ මට විවිධ රටවල් වල මිනිස්සු එක්ක වැඩ කරන්න පුළුවන් වුණා. ලංකාව ඇතුළෙ එහෙම අවස්ථාවක් ලැබෙනවා කියන්නෙ එක්‍තරා විදිහකට ඒක ලොකු ආශිර්වාදයක්.

✨ English කතා කරන්න වුණා නිතර දෙවේලෙ. මොට වේගෙන ආපු මගේ spoken english ටික ටික හැදෙන්න ගත්තා.

✨ මගේ skill එක 100% Life එකෙන් utilize කළා. එයාලා මට perform කරන්න අවස්ථාව හදලා දුන්නා. සරලවම මට play කරන්න ground එක හදලා දුන්නා. ඒ නිසාම මගෙ thinking කියන දේ සෑහෙන දුරකට polish වුණා..

✨ Blank excel sheet එකකින් පටන් අරන්, system එකක් වගේ Hotel budgeting sheet එකක් හදන්න පුළුවන් තරමෙ දැනුමක් මට ලබලා දුන්නා. ඒකට ඕන අධ්‍යාපනය මට දුන්නා. මාව appreciate කරලා මාව encourage කළා.. ඉතින් මං ඒ දේ කළා. Cinnamon Life එකේ පළවෙනි budget එකෙන්ම මං system එකක් හැදුවා excel වලින්.

✨ Excel models හදන්න මාව පෙළඹෙව්වා. මං ඒ පැත්තෙන් දැන් සෑහෙන්න ඉස්සරහින් ඉන්නවා මං හිතන්නෙ ගිය අවුරුද්දට වඩා..

✨ ඔයා finance කෙනෙක් නම් දන්නවා numbers වල meanings දැනගන්න එක් ඒ කියන්නෙ numbers read කරන්න දැනගන්න එක කොයි තරම් නම් වටිනවද කියලා. මං ඒ දේ ඉගෙනගත්තා. මං ඒ දේ ටික ටික ගොඩනගාගත්තෙ මෙතනින්. මට දැන් numbers දැනෙනවා.

✨ Networking. ජීවිතේ අපි ඉස්සරහට යද්දි වැදගත්ම සහ අත්‍යාවශ්‍යම දෙයක් තමයී මේ.. මං හිතනවා පොඩ්ඩක් පොඩ්ඩක් මං networking කියන දේ මෙතනින් හදාගත්තා.

✨ සුන්දර මිනිස්සු ජීවිතේට මුණ ගස්සපු තැනක්.. ජීවිත කාලෙටම පවතින විදිහෙ යාළුකම් හදලා දීපු තැනක්..

✨ Office එකේ මගේ වටේ හිටපු හැමෝටම මං සතුට බෙදුවා. විශ්වාසය කියන එක පුළුවන් විදිහට එයාලගෙ හිත් වල ඇති කළා. ඉගෙනගන්න, එයාලගෙ qualifications ඉවර කරන්න එයාලව පෙළඹෙව්වා. Positivity කියන එක පුළුවන් උපරිමෙන් බෙදාගත්තා.. (මං හිතනවා මං එහෙම කළා,, හැබැයී මං දන්නෙ නෑ එයාලට එහෙම දැනුණද කියලා.. ඒත් මට අපේ team එකේ හතර දෙනෙක් එහෙම කියලා තියෙනවා.. මං හිතන්නෙ මං එහෙම කරන්න ඇතී 🙈..)

✨ Maldives, Hikka Tranz, Grand, Lake, Red, Lodge ඇරෙන්න හැම Cinnamon hotel එකකටම යන්න පුළුවන් වුණා..

✨ Hotel එකක වැඩ කරන එක මොන වගේද කියලා සමාජෙ ඉන්න හුඟක් අය එක්ක බෙදාගන්න මට පුළුවන් වුණා..

✨ මං ලියන මේ වචන අගය කරන පිරිසක් මට මගෙ office එක ඇතුළෙ මුණ ගැහුණා..

✨ Exam කරගන්න බැරි වෙයි කියලා එදා රෑ බය වුණු මට, exams කරගන්න ලොකු push එකක් මගෙ office එකෙන් මට ලැබුණා.. ලොකු motivation එකක් මට ලැබුණා.. මං කොහොමහරී මේ ටික කරන්න ඕන කියන හැඟීම මට ලැබුණා..

✨ මට career එකේ ලොකු ගමනක් යන්න පුළුවන් කියන විශ්වාසය ආයිමත් පාරක් මගේ ජීවිතේ ලබා දුන්නා.. ඒ දුර ඒ පාර මට පෙන්නලා දුන්නා..

ඉතින්,,, ලියනවා නම් දේවල් තව ගොඩයී... මේ summary එකක් විතරයී...

මට මේ හැමදේම කියලා ඔයාලට කියන්න ඕන වුණේ හරිම පුංචි දෙයක්... ජීවිතේ ලැබෙන අවස්ථාවන් ගන්න.. ඒවා miss කරන්න එපා. සමහර වෙලාවට ඒව හරිම භයානක විදිහට ඔයාට පෙනෙයී.. හැබැයී විශ්වාස කරන්න ඒ තමයී ඔයාගෙ ජීවිතේ ලස්සනම කරන අවස්ථාවන්...

ඉතින් විශ්වාස කරන්න. ඔයාටත් පුළුවන් ඔයාගෙ ජීවිතේ සාර්ථකත්වයෙ හිනි පෙත්තටම ටිකෙන් ටික යන්න.. ඒ වෙනුවෙන් හීන දකින්න. මහන්සි වෙන්න. කැපවෙන්න. ඔයාගෙ කාලය ආයෝජනය කරන්න.. ඔයා කරන දේවල් ඔයාගෙ හෘද සාක්ෂියට එකඟව හරියටම කරන්න.

ඒ වගේම වෘත්තීය ජීවිතේ කවදහරි හිනිපෙත්තටම යන එක ඔයාගෙ හීනයක් නම්,, ඉහළටම ඉගෙනගන්න. Academics වගේම professional qualificationsත් හදාගන්න එතනින් ඔයාගෙ සුදුසුකම් වලින් 40%ක් සම්පූර්ණ වෙනවා. ඉතිරි 60% skills සහ experience කියන දෙකෙන් fill කරගන්න. මොකද ඔයාට ජීවිතේ paper qualifications වලින් විතරක් වෘත්තීය ගමනක් යන්න බෑ...

මේ හැමදේමත් එක්ක ඔයා කරන දේ හරියට කළොත්, අවංකව කළොත් සොබාදහමේ පිහිටත් එක්කම ඔයාට හුඟක් දුර ගමනක් අනිවාරෙන්ම යන්න පුළුවන් වේවී...

මම ඔයාලගෙ ආදරණීය ගිමී....

හීන වෙනුවෙන් කැප වෙන ඔයාට ජයෙන් ජය💪..

©️ Study with Gimi

#studywithgimi #gimhanisenarathne #officelife #begrateful #blessings #Cinnamonlife #positivevibes #anniversary #fyp

Skip the Carousel

1 2

3 months ago | [YT] | 173