RFA Khmer

ព្រលានយន្តហោះអន្តរជាតិភ្នំពេញថ្មីនឹងបើកទទួលជើងហោះហើរពីថ្ងៃស្អែក
---
ព្រលានយន្តហោះអន្តរជាតិភ្នំពេញថ្មី ដែលស្ថិតនៅខេត្តកណ្ដាល នឹងចាប់ផ្ដើមបើកស្វាគមន៍ទទួលយន្តហោះដឹកអ្នកដំណើរចុះចតជាផ្លូវការចាប់ពីថ្ងៃទី០៩ ខែកញ្ញានេះ ខណៈរដ្ឋាភិបាលសង្ឃឹមថា ព្រលានយន្តហោះថ្មីនេះ នឹងជួយជំរុញវិស័យទេសចរណ៍ និងកំណើនសេដ្ឋកិច្ចជាតិ។

ទំព័រហ្វេសប៊ុកលោក ហ៊ុន ម៉ាណែត បានចុះផ្សាយថា ការបើកដំណើរការយន្តហោះអន្តរជាតិភ្នំពេញថ្មីដើម្បីតភ្ជាប់កម្ពុជាទៅកាន់ពិភពលោក នឹងជួយគាំទ្រសេដ្ឋកិច្ចជាតិ ទេសចរណ៍ ធុរកិច្ចសាកល និងគោលនយោបាយរបស់រដ្ឋាភិបាលក្នុងការក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។

ការបើកដំណើរការជាផ្លូវការនេះបានធ្វើឡើង បន្ទាប់ពីព្រលានយន្តហោះអន្តរជាតិភ្នំពេញថ្មី បានចាប់ផ្ដើមសាងសង់កាលពីឆ្នាំ២០១៩ លើផ្ទៃដី២.៦០០ហិកតារ ស្ថិតនៅក្រុងតាខ្មៅនិងស្រុកកណ្ដាលស្ទឹង ខេត្តកណ្ដាល និងដីខ្លះស្ថិតក្នុងស្រុកបាទី ខេត្តតាកែវ ដែលមានចម្ងាយប្រហែល២០គីឡូម៉ែត្រពីទិសខាងត្បូងនៃទីក្រុងភ្នំពេញ។

ព្រលានយន្តហោះនេះ ត្រូវបានសាងសង់ក្នុងទំហំទឹកប្រាក់ ១.៥០០ លានដុល្លារ ដែលជាការវិនិយោគរួមគ្នារវាងរដ្ឋាភិបាល និងក្រុមហ៊ុនវិនិយោគទុនអាណិកជនកម្ពុជា (OCIC) របស់ឧកញ៉ា ពុង ខៀវសែ។ ក្នុងនោះទឹកប្រាក់ ១.១០០ លានដុល្លារ គឺរដ្ឋាភិបាលបានខ្ចីពីធនាគារបរទេស និង២៨០លានដុល្លារទៀត ត្រូវបានវិនិយោគដោយក្រុមហ៊ុនលោក ពុង ខៀវសែ។

ព្រលានយន្តហោះនេះ ត្រូវបានសាងសង់ដោយក្រុមហ៊ុនសំណង់រដ្ឋចិន ឆាយណា ខនស្ដ្រាក់សិន ត្សឺដ អ៊ីនជីននៀរីង ប្យ៊ូរ៉ូ គ្រុប (China Construction Third Engineering Bureau Group) និងរចនាប័ថ្មឡើងដោយក្រុមស្ថាបត្យករក្រុមហ៊ុន ហ្វឹស័រ ផាតណ័រ (Foster+Partners) ជាក្រុមហ៊ុនខាងស្ថាបត្យកម្មដ៏ធំបំផុតនៅក្នុងប្រទេសអង់គ្លេស។ ក្រុមហ៊ុននេះបានបង្ហោះលើគេហទំព័ររបស់ខ្លួនថា ព្រលានយន្តហោះអន្តរជាតិភ្នំពេញថ្មី ត្រូវបានរចនាឡើងដើម្បីបំផុតគំនិតពីអរិយធម៌ដ៏ចំណាស់មួយនៅលើពិភពលោក និងដើម្បីផ្ដល់នូវកម្រិតខ្ពស់នៃបទពិសោធន៍ និងស្ដង់ដារថ្មីប្រកបដោយនិរន្តរភាពសម្រាប់អ្នកដំណើរ។

រដ្ឋាភិបាលបានប្រកាសថា ព្រលានយន្តហោះអន្តរជាតិភ្នំពេញថ្មីនេះ អាចទទួលការចុះចតពីយន្តហោះឆ្លងទ្វីបដឹកអ្នកដំណើរធំបំផុតរបស់ពិភពលោក ដូចជាយន្តហោះប្រភេទ អ៊ែរប៊ឺស អេ៣៨០-៨០០ (Airbus A380-800) និងយន្តហោះប្រភេទ ប៊ូអ៊ីង ៧៤៧-៨០០ (Boeing 747-800) ហើយក្នុងដំណាក់កាលដំបូង អាចទទួលអ្នកដំណើរ ១៣ លាននាក់ក្នុងមួយឆ្នាំ ហើយនឹងឈានទៅទទួលអ្នកដំណើរ ៣០ លាននាក់ក្នុងមួយឆ្នាំនៅឆ្នាំ២០៣០ និងឈានទៅទទួលអ្នកដំណើរ ៥០ លាននាក់ក្នុងមួយឆ្នាំ នៅឆ្នាំ២០៥០។

លេខាធិការដ្ឋានអាកាសចរណ៍ស៊ីវិលបានបង្ហោះលើហ្វេសប៊ុកថា ក្រោយពីបើកប្រតិបត្តិការនៅថ្ងៃទី០៩ ខែកញ្ញា រដ្ឋាភិបាលនឹងធ្វើពិធីសម្ពោធបើកឱ្យប្រើប្រាស់ជាផ្លូវការនៅថ្ងៃទី២០ ខែតុលា ខាងមុខ ក្រោមអធិបតីលោកនាយករដ្ឋមន្ត្រី ហ៊ុន ម៉ាណែត៕

រូបភាព៖ AFP
---
#វិទ្យុអាស៊ីសេរី #កម្ពុជា #ហ៊ុនម៉ាណែត #ហ៊ុនសែន #ខេត្តកណ្តាល #ក្រុមហ៊ុនព្រលានយន្តហោះថ្មី #ពុងឃាវសែ
#RFAKhmer #Cambodia #HunManet #HunSen #Kandal #OCIC #PungKheavSe

Skip the Carousel

1 2 3 4 5

30 minutes ago | [YT] | 16

RFA Khmer

លោក ហ៊ុន ម៉ាណែត ជួបពិភាក្សាជាមួយមេដឹកនាំចិន ខណៈចិនគាំទ្របទឈប់បាញ់កម្ពុជា-ថៃ
---
លោកនាយករដ្ឋមន្ត្រី ហ៊ុន ម៉ាណែត បានជួបពិភាក្សាជាមួយប្រធានាធិបតីចិនលោក ស៊ី ជីនពីង (Xi Jinping) នៅថ្ងៃទី៣០ ខែសីហា ផ្ដោតលើការពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ ខណៈចិនគាំទ្របទឈប់បាញ់កម្ពុជា-ថៃ។

ទំព័រហ្វេសប៊ុកលោក ហ៊ុន ម៉ាណែត បានចុះផ្សាយថា ប្រទេសចិនបន្តគាំទ្រកម្ពុជាដើម្បីពង្រឹងសមត្ថភាពអភិវឌ្ឍន៍ដោយម្ចាស់ការខ្លួនឯង និងការការពារអធិបតេយ្យភាពរបស់កម្ពុជា។ បន្ថែមពីនេះ ចិនក៏បានគាំទ្របទឈប់បាញ់រវាងកម្ពុជា-ថៃ និងគាំទ្រការបង្កើតក្រុមអ្នកសង្កេតការណ៍អាស៊ាន (AOT) ដឹកនាំដោយប្រទេសម៉ាឡេស៊ីឱ្យបានឆាប់។

សារព័ត៌មានចិន Xinhua បានចុះផ្សាយដែរថា នៅក្នុងជំនួបជាមួយនាយករដ្ឋមន្ត្រីកម្ពុជា ប្រធានាធិបតីចិនបានលើកឡើងពីការប្រឈមនៃការប្រែប្រួលស្ថានភាពអន្តរជាតិ ហើយថា កម្ពុជានិងចិន ជាមិត្តដែកថែប គួរតែរួបរួមគ្នាឱ្យបានជិតស្និទ្ធបំផុតសម្រាប់ការជោគជ័យទៅវិញទៅមក ដើម្បីសុខុមាលភាពនៃប្រជាជនទាំងពីរ និងចូលរួមចំណែកវិបុលភាព ស្ថិរភាព និងសន្ដិភាពក្នុងតំបន់។

ជំនួបពិភាក្សាជាមួយមេដឹកនាំចិននេះ បានធ្វើឡើងខណៈលោក ហ៊ុន ម៉ាណែត បានដឹកនាំគណៈប្រតិភូទៅចូលរួមកិច្ចប្រជុំកំពូលនៃអង្គការសហប្រតិបត្តិការសៀងហៃ នៅទីក្រុងធានជីន (Tianjin) ប្រទេសចិន ពីថ្ងៃទី៣០ ខែសីហា ដល់ថ្ងៃទី១ ខែកញ្ញា។

អង្គការសហប្រតិបត្តិការសៀងហៃ ជាអង្គការនយោបាយ សេដ្ឋកិច្ច និងសន្ដិសុខអន្តរជាតិមួយ បង្កើតឡើងនៅក្នុងឆ្នាំ២០០១ ដោយប្រទេសចិន (China) ប្រទេសរុស្ស៊ី (Russia) និងប្រទេសដែលមានព្រំដែនជាមួយគ្នាចំនួន៣ផ្សេងទៀត ដើម្បីដោះស្រាយជម្លោះព្រំដែន ក្រោយចប់សង្គ្រាមត្រជាក់ និងក្រោយការដួលរលំនៃសហភាពសូវៀត ខណៈកម្ពុជាជាប្រទេសដៃគូកិច្ចពិភាក្សាមួយនៃអង្គការនេះ។

កាលពីថ្ងៃទី២២ ខែសីហា អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានថ្លែងថា ស្ថានទូតចិនប្រចាំកម្ពុជាបានត្រៀមខ្លួន ធ្វើជាអ្នកសង្កេតការណ៍ឃ្លាំមើលបទឈប់បាញ់ ខណៈប្រទេសថៃបានបដិសេធការដាក់ពង្រាយអ្នកសង្កេតការណ៍អន្តរជាតិ ដែលមិនមែនជាសមាជិកអាស៊ាន ពីព្រោះចាត់ទុកថា ជាការជ្រៀតជ្រែកពីខាងក្រៅ៕

រូបភាពពីហ្វេសប៊ុកលោក ហ៊ុន ម៉ាណែត

---
#វិទ្យុអាស៊ីសេរី #កម្ពុជា #ចិន #ឥទ្ធិពលចិន #ហ៊ុនសែន #ហ៊ុនម៉ាណែត #ស៊ីជីនពីង #មិត្តដែកថែប
#RFAKhmer #Cambodia #China #HunSen #HunManet #XiJinping #Ironclad

Skip the Carousel

1 2 3 4

1 week ago (edited) | [YT] | 898

RFA Khmer

កម្ពុជាស្នើអាមេរិកជួយជំរុញឱ្យបទឈប់បាញ់កម្ពុជា-ថៃអនុវត្តប្រកបដោយប្រសិទ្ធភាព
---
កម្ពុជាបានស្នើទៅប្រធានាធិបតីសហរដ្ឋអាមេរិក ឱ្យបន្តជួយជំរុញការអនុវត្តបទឈប់បាញ់រវាងកម្ពុជា-ថៃឱ្យមានប្រសិទ្ធភាព អំឡុងពេលក្រុមសមាជិកសភាសហរដ្ឋអាមេរិកមកបំពេញទស្សនកិច្ចនៅកម្ពុជា។

ប្រធានរដ្ឋសភាអ្នកស្រី ឃួន សុដារី បានស្នើទៅប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បន្តជួយលើកកម្ពស់ការអនុវត្តបទឈប់បាញ់រវាងកម្ពុជា-ថៃ ឱ្យមានប្រសិទ្ធភាពខ្ពស់ និងជួយស្វែងរកដំណោះស្រាយជម្លោះព្រំដែនដោយសន្ដិវិធី។ ការស្នើនេះ ធ្វើឡើងនៅក្នុងជំនួបជាមួយសមាជិកសភាប្រចាំរដ្ឋតិចសាស់ (Texas) អ្នកស្រី បេត វ៉ាន់ ដាយ (Beth Van Duyne) នៅវិមានរដ្ឋសភាថ្ងៃទី ២៨ ខែសីហា។

ទំព័រហ្វេសប៊ុករដ្ឋសភាបានចុះផ្សាយថា បន្ទាប់ពីបញ្ចប់ដំណើរទស្សនកិច្ចទៅកាន់ប្រទេសថៃ អ្នកស្រី បេត វ៉ាន ដាយ បានដឹកនាំសមាជិកសភាមកពីគណបក្សសាធារណរដ្ឋនិងគណបក្សប្រជាធិបតេយ្យ មកបំពេញទស្សនកិច្ចកម្ពុជា ដើម្បីលើកកម្ពស់ចំណងមិត្តភាពកិច្ចសហប្រតិបត្តិការប្រទេសទាំងពីរលើគ្រប់វិស័យ រាប់ចាប់តាំងពីសេដ្ឋកិច្ចពាណិជ្ជកម្ម អប់រំ បច្ចេកវិទ្យា និងសុខសន្ដិភាពជាដើម។

នៅក្នុងជំនួបនោះ អ្នកស្រី ឃួន សុដារី បានអរគុណប្រធានាធិបតីសហរដ្ឋអាមេរិក រួមទាំងប្រធានប្ដូរវេនអាស៊ានលោកនាយករដ្ឋមន្ត្រីម៉ាឡេស៊ី អាន់វ៉ា អីប្រាហ៊ីម (Anwar Ibrahim) និងប្រទេសចិន ដែលបានជួយសម្របសម្រួលឱ្យមានបទឈប់បាញ់កាលពីថ្ងៃទី ២៨ ខែកក្កដា ប៉ុន្តែអ្នកស្រីថា បទឈប់បាញ់នេះ កំពុងស្ថិតនៅក្នុងភាពផុយស្រួយនៅឡើយ និងចង់ឱ្យសហរដ្ឋអាមេរិកចូលរួមសង្កេតការណ៍។

ក្រៅពីជំនួបជាមួយប្រធានរដ្ឋសភាកម្ពុជា ក្រុមសមាជិកសភាអាមេរិក ក៏បានជួបពិភាក្សាជាមួយលោកនាយករដ្ឋមន្ត្រី ហ៊ុន ម៉ាណែត នៅវិមានសន្ដិភាព។ កាលពីថ្ងៃទី២៧ ខែសីហា លោក ហ៊ុន ម៉ាណែត បានបង្ហោះលើហ្វេសប៊ុកថា លោកទទួលបានលិខិតឆ្លើយតបពីប្រធានាធិបតីសហរដ្ឋអាមេរិកលោក ដូណាល់ ត្រាំ ដែលអរគុណចំពោះលិខិតរបស់លោកគាំទ្រលោក ដូណាល់ ត្រាំ ជាបេក្ខភាពពានរង្វាន់សន្ដិភាពពិភពលោក (Nobel Peace Prize)។

នៅក្នុងលិខិតនោះ លោក ដូណាល់ ត្រាំ បានលើកឡើងថា លោកមានមោទនភាពដែលបានក្លាយជាផ្នែកមួយនៃកិច្ចព្រមព្រៀងបទឈប់បាញ់រវាងកម្ពុជា-ថៃ ដែលបានជួយអាយុជីវិតមនុស្សរាប់ពាន់ ហើយបច្ចុប្បន្ននេះ កម្ពុជានិងសហរដ្ឋអាមេរិកអាចផ្ដោតលើភាពរុងរឿងនៃប្រទេសទាំងពីរ។

ទោះយ៉ាងណា ក្រសួងការពារជាតិកម្ពុជាបានលើកឡើងថា យោធាថៃបានបំពានលើលក្ខខណ្ឌបទឈប់បាញ់ជាបន្តបន្ទាប់ ដូចជាការពង្រាយកម្លាំងទ័ពនិងរាយបន្លាលួសបំពានចូលទឹកដីកម្ពុជា ការបណ្ដេញពលរដ្ឋខ្មែរចេញពីផ្ទះសម្បែងដើម្បីរាយបន្លាលួសនិងដាក់កង់ឡាន ការឈូសឆាយធ្វើផ្លូវ ការជីកធ្វើលេណដ្ឋាន និងការគំរាមប្រើកម្លាំងវាយដណ្ដើមប្រាសាទតាក្របីជាដើម៕

រូបភាពពីហ្វេសប៊ុករដ្ឋសភា និងលោក ហ៊ុន ម៉ាណែត

---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3 4

1 week ago | [YT] | 728

RFA Khmer

សង្គមស៊ីវិលដាក់ញត្តិស្នើក្រុមប្រទេសហត្ថលេខីកិច្ចព្រមព្រៀងសន្ដិភាពក្រុងប៉ារីសជួយការពារបូរណភាពទឹកដីកម្ពុជា
---
ក្រុមអង្គការសង្គមស៊ីវិលបាននាំគ្នាដាក់ញត្តិទៅបណ្ដាស្ថានទូតនៃក្រុមប្រទេសម្ចាស់ហត្ថលេខីកិច្ចព្រមព្រៀងសន្ដិភាពក្រុងប៉ារីសទាំង១៨ប្រទេស ឱ្យបន្តរក្សាការប្ដេជ្ញាចិត្ត និងចាត់វិធានការសម្របសម្រួលជាបន្ទាន់ ក្នុងការកោះប្រជុំពិគ្រោះយោបល់គ្នា ដើម្បីទប់ស្កាត់ការរំលោភបំពានលើបូរណភាពទឹកដីកម្ពុជា ពីសំណាក់យោធាថៃ។

ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាលោក រស់ សុដ្ឋា បានប្រាប់វិទ្យុអាស៊ីសេរីថា ក្រុមអង្គការ សមាគម និងសហជីពចំនួន១០៦ស្ថាប័ន បានគាំទ្រការដាក់ញត្តិទៅបណ្ដាប្រទេសហត្ថលេខីកិច្ចព្រមព្រៀងសន្ដិភាពទីក្រុងប៉ារីស។

លោកបានបន្តថា នៅថ្ងៃទី២០ ខែសីហា ញត្តិបានដាក់ទៅដល់ស្ថាប័ននិងស្ថានទូតចំនួន១០ប្រទេស រួមមានស្ថានទូតបារាំង (France) អង់គ្លេស (England) អាល្លីម៉ង់ (Germany) សហរដ្ឋអាមេរិក (USA) ចិន (China) ឥណ្ឌា (India) អូស្ដ្រាលី(Australia) ឥណ្ឌូនេស៊ី (Indonesia) សិង្ហបុរី (Singapore) និងទីស្ដីការគណៈរដ្ឋមន្ត្រី ហើយនឹងបន្តដាក់ទៅប្រទេសចំនួន៩ទៀត រួមមានស្ថានទូតប្រទេសថៃ (Thai-land) វៀតណាម (Vietnam) ឡាវ (Loa) ម៉ាឡេស៊ី (Malaysia) និងជប៉ុន (Japan) ជាដើម រួមទាំងអង្គការសហប្រជាជាតិ នៅថ្ងៃទី ២១ ខែសីហា។

លោក រស់ សុថា៖ «គ្រប់ស្ថានទូតទាំងអស់បានសន្យាថា បន្តយកបញ្ហានេះ និងបញ្ជូនសាររបស់យើងគឺញត្តិនេះ ទៅតំណាងឱ្យប្រទេស គឺមាននាយករដ្ឋមន្ត្រី ប្រធានាធិបតីនិងព្រះមហាក្សត្រនៃសមាជិកហត្ថលេខីកិច្ចព្រមព្រៀងសន្ដិភាពក្រុងប៉ារីស ដើម្បីលោកពិចារណាលើសេចក្ដីស្នើរបស់ពួកយើង»។

សេចក្ដីប្រកាសព័ត៌មានរបស់ក្រុមអង្គការសង្គមស៊ីវិលបានលើកឡើងថា ការប៉ះទង្គិចគ្នាដោយអាវុធបង្កឡើងដោយយោធាថៃ កាលពីពេលថ្មីៗនេះ បានធ្វើឱ្យមនុស្សស្លាប់និងរបួសជាច្រើននាក់ បង្ខំឱ្យមនុស្សរាប់ម៉ឺននាក់ភៀសខ្លួន សាលារៀនបិទទ្វារ និងប៉ះពាល់តំបន់បេតិកភណ្ឌវប្បធម៌ ដែលជាទង្វើបំពានច្បាប់អន្តរជាតិ និងគំរាមកំហែងដល់ស្ថិរភាពនិងសន្ដិភាពក្នុងតំបន់។

មាត្រា៥ នៃកិច្ចព្រមព្រៀងសន្ដិភាពក្រុងប៉ារីសចែងថា ក្នុងករណីមានការរំលោភ ឬការគំរាមកំហែងរំលោភលើអធិបតេយ្យភាព ឯករាជ្យ បូរណភាព និងការមិនអាចរំលោភបាននៃដែនដីនៃកម្ពុជា បណ្ដាភាគីក្នុងកិច្ចព្រមព្រៀងទាំងនេះ ត្រូវពិគ្រោះជាបន្ទាន់ ដើម្បីអនុម័តរាល់វិធានការសមស្រប ដើម្បីធានាការគោរពដល់ការប្ដេជ្ញាចិត្តទាំងនេះ និងដោះស្រាយរាល់ការរំលោភទាំងនោះតាមមធ្យោបាយសន្តិវិធី។

ការដាក់ញត្តិរបស់អង្គការសង្គមស៊ីវិលទាំងនេះ បានធ្វើឡើងបន្ទាប់ពីរដ្ឋាភិបាលកម្ពុជាបានដាក់លិខិតទៅអង្គការសហប្រជាជាតិកាលពីថ្ងៃទី ១១ ខែសីហាថា កិច្ចព្រមព្រៀងឈប់បាញ់កម្ពុជា-ថៃ កំពុងស្ថិតក្នុងភាពផុយស្រួយធ្ងន់ធ្ងរ បន្ទាប់ពីទាហានថៃបន្តរំលោភចូលដែនអធិបតេយ្យភាព និងបូរណភាពទឹកដីកម្ពុជាដោយដាក់ពង្រាយកម្លាំងបន្ថែម និងបញ្ជូនគ្រឿងចក្រឈូសឆាយធ្វើផ្លូវ ជីកលេណដ្ឋាន រាយបន្លាលួស និងរុះរើផ្ទះសម្បែងពលរដ្ឋខ្មែរជាដើម៕

រូបភាព៖ ពលរដ្ឋនិង AFP

---
#វិទ្យុអាស៊ីសេរី #កម្ពុជា #ថៃ #វៀតណាម #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #Vietnam #HunManet #HunSen #BorderConflict

Skip the Carousel

1 2 3 4 5

2 weeks ago | [YT] | 868

RFA Khmer

តុលាការខេត្តកំពង់ស្ពឺសម្រេចផ្តន្ទាទោសលោក សុខ ស៊ុនណារ៉េត រយៈពេល៤ឆ្នាំ
---
តុលាការខេត្តកំពង់ស្ពឺនៅថ្ងៃទី០៦ ខែសីហា បានសម្រេចផ្ដន្ទាទោសឪពុកអ្នកអត្ថាធិប្បាយនយោបាយ លោក ស៊ន តារា គឺលោក សុខ ស៊ុនណារ៉េត ដាក់ពន្ធនាគាររយៈពេល៤ឆ្នាំ រឹបអូសយករថយន្តនិងទូរស័ព្ទដៃរបស់លោក ពាក់ព័ន្ធនឹងបទរក្សាទុកដោយខុសច្បាប់នូវសារធាតុញៀន។ សាច់ញាតិនិងមន្ត្រីសិទ្ធិមនុស្សបានចាត់ទុកការសម្រេចរបស់តុលាការ ថាជាការធ្វើបាបលើមន្ត្រីយោធាស្លូតត្រង់ខណៈប្រទេសជាតិកំពុងមានជម្លោះព្រំដែនជាមួយថៃ។

ការប្រកាសសាលក្រមនេះបានធ្វើឡើង បន្ទាប់ពីតុលាការបានបើកសវនាការកាលពីថ្ងៃទី០៩ ខែកក្កដា ពាក់ព័ន្ធនឹងរឿងគ្រឿងញៀន ដែលសមត្ថកិច្ចបានអះអាងថា រកឃើញក្នុងរថយន្តរបស់លោក សុខ ស៊ុនណារ៉េត។

កូនប្រុសរបស់លោក សុខ ស៊ុនណារ៉េត គឺលោក ស៊ន សារ៉ាត់ បានប្រាប់វិទ្យុអាស៊ីសេរីថា លោកនឹងប្ដឹងទៅសាលាឧទ្ធរណ៍ ដើម្បីប្រឆាំងការសម្រេចរបស់សាលាដំបូងខេត្តកំពង់ស្ពឺនេះ។

លោក ស៊ន សារ៉ាត់៖ «វាជារឿងអយុត្តិធម៌ ដែលគេបានដាក់ទណ្ឌកម្មលើមនុស្សស្លូតត្រង់ និងគ្មានកំហុសបែបនេះ»។

លោក សុខ ស៊ុនណារ៉េត អាយុ៦៦ ជាមន្ត្រីទាហានសឹករងកំពង់ស្ពឺ និងបានចូលនិវត្តន៍នៅឆ្នាំ២០២២។ លោកត្រូវបានមន្ត្រីកងរាជអាវុធហត្ថចាប់ខ្លួនគឺក្រោយលោក ហ៊ុន សែន ព្រមានដកតំណែង ចេញពីក្របខណ្ឌការងាររដ្ឋ បើលោក ស៊ន តារា បន្តរិះគន់លោក ហ៊ុន សែន តទៅទៀត។

លោកត្រូវបានបញ្ជូនទៅឃុំនៅពន្ធនាគារ តាំងពីថ្ងៃទី១៣ ខែវិច្ឆិកា ឆ្នាំ២០២៤ បន្ទាប់ពីសមត្ថកិច្ចអះអាងថា បានរកឃើញគ្រឿងញៀនក្នុងរថយន្តរបស់លោក ប៉ុន្តែលោកបដិសេធនៅចំពោះមុខសមត្ថកិច្ច និងតុលាការជាបន្តបន្ទាប់។

ជុំវិញបញ្ហានេះ មន្ត្រីជាន់ខ្ពស់សមាគមការពារសិទ្ធិមនុស្ស លោក យី សុខសាន្ត បានយល់ឃើញថា តុលាការគួរតែបើកការស៊ើបសង្កេតឱ្យសាធារណជន និងសាច់ញាតិអស់មន្ទិលសង្ស័យ ហើយតុលាការមិនគួរកាត់ទោសលោក សុខ ស៊ុនណារ៉េត ដោយគ្រាន់តែសំអាងតាមសមត្ថកិច្ចដែលអះអាងថា បានរកឃើញគ្រឿងញៀនក្នុងរថយន្តរបស់លោកឡើយ។

លោក យី សុខសាន្ត៖ «ហាក់ដូចជាតុលាការកាត់ទោសគាត់ដោយអយុត្តិធម៌ ធ្វើបាបផ្លូវចិត្តគាត់ នៅពេលចង់បានអ្វីមួយដែលគាត់មិនបានធ្វើតាម ហើយធ្វើទុក្ខបុកម្នេញផ្លូវចិត្តគាត់ នៅពេលគាត់ចូលនិវត្តន៍ហើយ មិនឱ្យគាត់មានក្ដីសុខ»។

លោក ស៊ន តារា បានសរសេរលើហ្វេសប៊ុកនៅថ្ងៃទី០៦ ខែសីហាថា ការដាក់គុកឪពុក៤ឆ្នាំធ្វើជាចំណាប់ខ្មាំង នឹងបំបាក់ទឹកចិត្តកងទ័ពដទៃទៀតដែលបានបម្រើជាតិ ស្របពេលកំពុងប្រឈមនឹងការឈ្លានពានពីប្រទេសថៃ។ លោកបានអំពាវនាវឱ្យសហគមន៍អន្តរជាតិ ជួយអន្តរាគមន៍ដើម្បីឱ្យដោះលែងឪពុកលោកមានសេរីភាពឡើងវិញ៕

រូបភាពពីហ្វេសប៊ុកលោក ស៊ន តារា និងពលរដ្ឋផ្ដល់ឱ្យ
---
#វិទ្យុអាស៊ីសេរី #កម្ពុជា #ហ៊ុនសែន #ហ៊ុនម៉ាណែត #តុលាការកំពូល #សុខស៊ុនណារ៉េត #ស៊នតារា
#RFAKhmer #Cambodia #HunSen #HunManet #SupremeCourt #SokSunnareth #SornDara

Skip the Carousel

1 2 3

1 month ago | [YT] | 1,916

RFA Khmer

ថៃបញ្ជូនកម្លាំងចូលរាយបន្លាលួសបំពានលើទឹកដីកម្ពុជា និងរំលោភបទឈប់បាញ់
---
អ្នកនាំពាក្យក្រសួងការពារជាតិកម្ពុជាបានអះអាងថា ថៃបានបញ្ជូនកម្លាំងប្រដាប់ដោយមានអាវុធគ្រប់ដៃ និងគ្រឿងចក្រ ចូលរាយបន្លាលួសចូលមកទឹកដីកម្ពុជានៅច្រកអានសេះ និងតំបន់ផ្សេងទៀត ដែលជាទង្វើរំលោភលើបទឈប់បាញ់គ្នា និងកំពុងគំរាមកំហែងដល់សន្ដិភាពនៅតាមបណ្ដោយព្រំដែនប្រទេសទាំងពីរ។

អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានថ្លែងនៅក្នុងសន្និសីទសារព័ត៌មានថា ករណីយោធាថៃចូលរាយបន្លាលួសនេះ បានកើតឡើងនៅម៉ោង ១១ព្រឹកថ្ងៃទី០៤ ខែសីហា និងបើទោះបីជា កងកម្លាំងកម្ពុជាចេញទៅរារាំងហាមឃាត់យ៉ាងណាក៏ដោយ។ អ្នកស្រីបន្តថា ទីតាំងដែលកម្លាំងថៃចូលមកហ៊ុមព័ទ្ធទាំងនោះ ជាតំបន់ដែលក្រុមអនុព័ន្ធយោធាស្ថានទូតបរទេសនៅកម្ពុជា បានចុះទៅពិនិត្យកាលពីថ្ងៃទី៣០ ខែកក្កដា។

អ្នកស្រី ម៉ាលី សុជាតា៖ «កម្ពុជាសូមអំពាវនាវដល់សហគមន៍អន្តរជាតិ ជាពិសេសប្រទេសដៃគូ ដែលបានខិតខំប្រឹងប្រែងជួយឱ្យសម្រេចបានបទឈប់បាញ់ដ៏លំបាកមួយនេះ ហើយសុទ្ធតែមានបំណងចង់ឃើញបទឈប់បាញ់មួយនេះ ដោយពេញលេញនិងប្រកបដោយប្រសិទ្ធភាព ទាមទារឱ្យភាគីថៃបញ្ឈប់ទង្វើឈ្លានពានរបស់ខ្លួនជាបន្ទាន់ និងគោរពឱ្យបានម៉ឺងម៉ាត់នូវច្បាប់អន្តរជាតិ ជាពិសេសអធិបតេយ្យ និងបូរណភាពទឹកដីកម្ពុជា»។

បណ្ដាញសារព័ត៌មានក្នុងស្រុកបានចុះផ្សាយដែរថា ភាគីថៃ បានចល័តទ័ព និងបញ្ជូនគ្រឿងចក្រចូលក្នុងតំបន់អានសេះ ដើម្បីឈូសឆាយធ្វើផ្លូវ និងកាយធ្វើលេណដ្ឋានថ្មី។ ភាគីកម្ពុជាចោទប្រកាន់ថា សកម្មភាពនេះ ផ្ទុយពីខ្លឹមសារនៃកិច្ចប្រជុំរវាងមេបញ្ជការភូមិភាគនៃប្រទេសទាំងពីរកាលពីថ្ងៃទី២៩ ខែកក្កដា ដែលបានសម្រេចគ្នាអនុវត្តបទឈប់បាញ់ឱ្យបានពេញលេញ ដោយមិនត្រូវបង្កើនកងទ័ព និងភាពតានតឹង អាចធ្វើឱ្យមានការប្រឈមមុខដាក់គ្នានៅតាមព្រំដែនឡើយ។

ការធ្វើសកម្មភាពបង្កហេតុរបស់កងទ័ពថៃជាថ្មីនេះ បានកើតឡើង ស្របពេលក្រុមលេខាធិការគណៈកម្មាធិការព្រំដែនទូទៅកម្ពុជានិងថៃ (GBC) កំពុងជួបប្រជុំនៅក្នុងប្រទេសម៉ាឡេស៊ី ពីថ្ងៃទី៤ ដល់ថ្ងៃទី៦ ខែសីហា និងមុនកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ ដែលត្រូវធ្វើឡើងនៅថ្ងៃទី០៧ ខែសីហា ហើយនឹងមានអ្នកតំណាងម៉ាឡេស៊ី ចិន និងអាមេរិក ធ្វើជាសង្កេតការណ៍។

កាលពីថ្ងៃទី២៩ ខែកក្កដា កងទ័ពថៃក៏បានបំពានលើបទឈប់បាញ់គ្នាដែរ ដោយបានប្រើរថក្រោះនិងកម្លាំងថ្មើរជើងបាញ់ប្រហារមកលើលេណដ្ឋានកងទ័ពខ្មែរ នៅតំបន់ជាំតែ ភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ និងបានប្រើប្រាស់កលល្បិចបក់ដៃហៅនិយាយស្វាគមន៍គ្នា ដើម្បីភ្ជង់ព័ទ្ធចាប់កងទ័ពជួរមុខកម្ពុជា ២០នាក់ ក្នុងនោះមានម្នាក់រត់រួច។

ក្នុងចំណោមកងទ័ពខ្មែរ១៩នាក់នោះ ថៃបានប្រគល់ឱ្យកម្ពុជាវិញបាន៣រូប ក្នុងនោះស្លាប់ម្នាក់ និងពីរនាក់ទៀត បានរងរបួសធ្ងន់ និងមានបញ្ហាស្មារតី ដែលកម្ពុជាសង្ស័យថា ដោយសារការធ្វើទារុណកម្មធ្ងន់ធ្ងរដើម្បីសួរចម្លើយ។

លោកនាយករដ្ឋមន្ត្រី ហ៊ុន ម៉ាណែត បានសរសេរបង្ហោះលើហ្វេសប៊ុកនៅថ្ងៃទី០៤ ខែសីហាថា ចំពោះកងទ័ពកម្ពុជានៅសល់១៦នាក់ ដែលថៃមិនព្រមដោះលែងនោះ គឺក្រសួងការពារជាតិកម្ពុជាបានធ្វើការងារជាប់ប្រចាំជាមួយភាគីថៃដើម្បីឱ្យដោះលែងវិញ ហើយរដ្ឋាភិបាលក៏បានស្នើទៅគណៈកម្មាធិការអន្តរជាតិកាកបាទក្រហម (ICRC) ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) និងគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) ដើម្បីឱ្យជួយអន្តរាគមន៍បន្ថែមលើរឿងនេះ៕

រូបភាពពីហ្វេសប៊ុកលោក នេត្រ ភក្ដ្រា
---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3

1 month ago | [YT] | 775

RFA Khmer

ថៃប្រគល់ទាហានខ្មែរតែពីរនាក់ និងទុក១៦នាក់ទៀតដើម្បីសួរចម្លើយ
---
នៅម៉ោងជាង១០ ព្រឹកថ្ងៃទី០១ ខែសីហា ទាហានថៃបានដឹកទាហានខ្មែរតែពីរនាក់ប៉ុណ្ណោះ មកប្រគល់ឱ្យភាគីកម្ពុជានៅចក្រព្រំដែនអូរស្មាច់ ខណៈម្នាក់មានរបួសធ្ងន់ និងម្នាក់ទៀតមានបញ្ហាស្មារតី និងបន្តទុកទាហានខ្មែរ១៦នាក់ទៀត ដើម្បីសួរចម្លើយ។ រដ្ឋាភិបាលកម្ពុជាបានប្រកាសថា ទាហានខ្មែរទាំងនោះ មិនមែនជាឈ្លើយសឹកដែលថៃត្រូវបន្តឃាត់ទុកសម្រាប់ធ្វើទារុណកម្មសួរចម្លើយឡើយ ពីព្រោះពួកគេត្រូវបានទាហានថៃប្រើកលល្បិចចាប់ខ្លួន នៅក្រោយពីមានកិច្ចព្រមព្រៀងឈប់បាញ់។

រូបភាព៖ AKP

---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3 4 5

1 month ago | [YT] | 4,021

RFA Khmer

កងទ័ពជួរមុខកម្ពុជាទទួលស្គាល់ថា ទាហានថៃពិតជាប្រើល្បិចបក់ដៃហៅទាហានខ្មែរ២០នាក់ទៅចាប់ដៃ ហើយបានភ្ជង់ព័ទ្ធចាប់ខ្លួន
---
មេទ័ពកម្ពុជាបានទទួលស្គាល់ថា កងទ័ពថៃបានបើកការបាញ់ប្រហារមកលើលេណដ្ឋានកងទ័ពខ្មែរ និងបន្ទាប់មកបានប្រើប្រាស់កលល្បិចព័ទ្ធចាប់ខ្លួនកងទ័ពខ្មែរ២០នាក់ អំឡុងពេលកំពុងមានកិច្ចព្រមព្រៀងបទឈប់បាញ់គ្នា។ មន្ត្រីក្រសួងការពារជាតិកម្ពុជាបានបញ្ជាក់ថា កម្ពុជាកំពុងតវ៉ាទៅកងទ័ពថៃ ឱ្យដោះលែងកងទ័ពខ្មែរទាំងនោះវិញជាបន្ទាន់។

មេបញ្ជាការតំបន់ប្រតិបត្តិការសឹករងព្រះវិហារលោក ច័ន្ទ សុភ័ត្រា បានលើកឡើងថា កាលពីថ្ងៃទី២៩ ខែកក្កដា កងទ័ពថៃប្រហែល៣០នាក់ បានប្រើប្រាស់រថក្រោះ និងកម្លាំងថ្មើរជើង បាញ់ស្រោចមកលើលេណដ្ឋានកងទ័ពកម្ពុជានៅចំណុចជាំតែ ក្នុងភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ ប៉ុន្តែលោកបានបញ្ជាមិនឱ្យកងទ័ពខ្មែរបាញ់តបតឡើយ។

មេទ័ពរូបនេះបានបន្តថា ក្រោយមក ទាហានថៃបានចូលមកកាន់តែជិតលេណដ្ឋាន និងបង្ខំឱ្យទាហានខ្មែរដកថយក្រោយ ប៉ុន្តែភ្លាមៗនោះ បែរជាស្រែកហៅ និងបក់ដៃឱ្យទាហានខ្មែរ២០នាក់ត្រឡប់មកវិញ ដើម្បីសុំចាប់ដៃស្វាគមន៍ និងសុំចរចាដោយញញឹមរាក់ទាក់ ហើយប្រើល្បិចសុំថតរូបជុំគ្នាទុកជាអនុស្សាវរីយ៍ ដើម្បីឱ្យកម្លាំងបង្កប់របស់ខ្លួននៅក្នុងព្រៃខាងក្រោយ ចេញមកព័ទ្ធនិងភ្ជង់ចាប់ខ្លួនកងទ័ពខ្មែរទាំងនោះ។ លោកបានបញ្ជាក់ទៀតថា កងទ័ពខ្មែរម្នាក់បានរត់គេចខ្លួនរួច ប៉ុន្តែពីរនាក់ទៀត អាចត្រូវបានកងទ័ពថៃបាញ់សម្លាប់។

លោក ច័ន្ទ សុភ័ត្រា៖ «ឥឡូវ ខ្ញុំសួរឯកឧត្តមអស់លោក ដែលជាសេនានុព័ន្ធតាមបណ្ដាប្រទេស តើអស់លោកឈឺចាប់ទេ នៅពេលយើងមានបទបញ្ជាឈប់បាញ់ហើយ ទីបំផុតភាគីថៃ ប្រើល្បិចកលថោកទាបបំផុត ភ្ជង់មកលើកម្លាំងរបស់ខ្ញុំ តើអស់លោកឈឺចាប់ទេ នៅពេលគេធ្វើអំពើអាក្រក់លើយើង ទាំងដែលយើងបញ្ចេញកាយវិការស្មោះត្រង់ជាមួយគេ (កងទ័ពថៃ)»។

លោក ច័ន្ទ សុភ័ត្រា បានប្រាប់ដំណឹងនេះ ទៅបណ្ដាអនុព័ន្ធយោធាស្ថានទូតនៃបណ្ដាប្រទេសមហាអំណាចនិងអាស៊ាន១៣ប្រទេស រួមមានសហរដ្ឋអាមេរិក(US) ចិន (China) បារាំង (France) កូរ៉េខាងត្បូង (South Korea) ជប៉ុន (Japan) និងម៉ាឡេស៊ី (Malaysia) ជាដើម ដែលបានចុះពិនិត្យស្ថានភាពនៃការអនុវត្តបទឈប់បាញ់គ្នា រវាងកងទ័ពខ្មែរនិងថៃ នៅតំបន់សមរភូមិនៃចក្រអានសេះ នៅថ្ងៃទី៣០ ខែកក្កដា។ កម្ពុជាបានអញ្ជើញបណ្ដាអនុព័ន្ធយោធានៃស្ថានទូតបរទេស ទៅពិនិត្យស្ថានភាពជាក់ស្ដែងតាមព្រំដែនដើម្បីបង្ហាញពីសុឆន្ទៈពិតប្រាកដរបស់កម្ពុជា ក្នុងការគោរពតាមបទឈប់បាញ់គ្នាជាមួយកងទ័ពថៃ។

សារព័ត៌មានថៃ Khaosod បានចុះផ្សាយកាលពីថ្ងៃទី២៩ ខែកក្កដាថា កងទ័ពភូមិភាគ២ថៃ បានព័ទ្ធចាប់ខ្លួនទាហានខ្មែរ១៨នាក់ ក្នុងនោះ បាញ់ស្លាប់អស់២នាក់។

ជុំវិញបញ្ហានេះ អគ្គនាយករងនៃអគ្គនាយកដ្ឋាន នយោបាយ និងកិច្ចការបរទេស ក្រសួងការពារជាតិលោក ផាត វិបុលសុភ័ក្ត្រ បានលើកឡើងដែរថា ភាគីកម្ពុជាបានសហការជាមួយមេបញ្ជាការកងទ័ពម៉ាឡេស៊ី តវ៉ាទៅភាគីយោធាថៃ ឱ្យដោះលែងកងទ័ពខ្មែរជាបន្ទាន់។

លោក ផាត វិបុលសុភ័ក្ដ្រ ក៏បានប្រាប់ទៅបណ្ដាអនុព័ន្ធយោធាបរទេសថា ចាប់តាំងពីមានកិច្ចព្រមព្រៀងនៅម៉ោង១២ថ្ងៃ ទី២៨ ខែកក្កដាមក ទាហានថៃ ជាអ្នករំលោភលើកិច្ចព្រមព្រៀងនេះ ដូចជាការចល័តទ័ពចូលមកភាគីខ្មែរបង្កហេតុ ប៉ុន្តែភាគីថៃបែរជាផ្សព្វផ្សាយព័ត៌មានមិនពិត ថាកម្ពុជានៅបន្តផ្ទុះអាវុធនៅតាមព្រំដែន៕

---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3 4 5

1 month ago (edited) | [YT] | 7,250

RFA Khmer

ទ័ពជួរមុខកម្ពុជានិងថៃជួបគ្នាដើម្បីបង្កើតទំនាក់ទំនងឡើងវិញ ក្រោយមានបទឈប់បាញ់
---
ក្រុមមេបញ្ជាការភូមិភាគកម្ពុជានិងថៃ ដែលជាទ័ពជួរនៅតាមព្រំដែន បានជួបចរចាគ្នាដើម្បីកសាងទំនាក់ទងគ្នាឡើងវិញ និងព្រមព្រៀងគ្នាអនុវត្តបទឈប់បាញ់ឱ្យបានពេញលេញ តាមស្មារតីនៃកិច្ចព្រមព្រៀងស្ដីពីបទឈប់បាញ់គ្នា ដែលសម្រេចឡើងដោយនាយករដ្ឋមន្រ្តីប្រទេសទាំងពីរ តាមការសម្របសម្រួលរបស់ប្រធានអាស៊ាន។

ស្ថានភាពនៅតាមព្រំដែនកម្ពុជានិងថៃ បានស្ងប់ស្ងាត់លែងឭសំឡេងគ្រាប់ផ្លោងនៅថ្ងៃទី២៩ ខែកក្កដា ខណៈបណ្ដាមេបញ្ជាការទ័ពជួរមុខកម្ពុជានិងថៃ ក្នុងនោះរួមមាន មេបញ្ជាការយោធភូមិភាគទី៤កម្ពុជាលោក ពៅ ហេង និងមេបញ្ជាការយោធភូមិភាគ២ថៃ លោក ប៊ុនស៊ីង ផាកខ្លាង (Boonsin Padklang) បានជួបចរចាគ្នាដើម្បីអនុវត្តតាមបទឈប់បាញ់ នៅច្រកទ្វារអន្តរជាតិអូស្មាច់ ខេត្តឧត្តរមានជ័យ និងខេត្តសុរិន្ទ។

អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានលើកឡើងនៅក្នុងសន្និសីទសារព័ត៌មានថា លទ្ធផលនៃកិច្ចប្រជុំកងទ័ពភូមិភាគកម្ពុជា-ថៃ គឺភាគីទាំងពីរបានព្រមព្រៀងគ្នា គោរពបទឈប់បាញ់ ឈប់បង្កើនទ័ព ភ្ជាប់ទំនាក់ទំនង និងផ្លាស់ប្ដូរព័ត៌មានគ្នាទៅវិញទៅមក និងឆ្លងយោបល់ថ្នាក់លើប្រសិនបើមានបញ្ហាណាមួយ។ អ្នកស្រីបានបន្តថា កិច្ចព្រមព្រៀងឈប់បាញ់បានចងនូវលក្ខខណ្ឌមួយដើម្បីឱ្យកងទ័ពប្រទេសទាំងពីរអនុវត្ត។

អ្នកស្រី ម៉ាលី សុជាតា៖ «លក្ខខណ្ឌទាំងអស់នោះ រួមមានទី១ ឈប់បាញ់គ្នា ទី២ មិនឱ្យមានការចល័តទ័ពឬបន្ថែមទ័ព ទី៣ កងទ័ពនៃភាគីទាំងពីរត្រូវរក្សានៅទីតាំងដដែលរាប់ចាប់តាំងពីម៉ោង ២៤និង០០នាទី ម៉ោងនៅក្នុងតំបន់នៅថ្ងៃទី២៨ ខែកក្កដា ឆ្នាំ២០២៥ និងទី៤ ត្រូវបង្កើតក្រុមការងារទំនាក់ទំនង ដើម្បីធ្វើការជាមួយគ្នា»។

រដ្ឋមន្ត្រីក្រសួងការបរទេសកម្ពុជាលោក ទៀ ស៊ីហា ក៏បានសរសេរបង្ហោះលើហ្វេសប៊ុកថា កងទ័ពកម្ពុជាបានអត់ធ្មត់អនុវត្តតាមកិច្ចព្រមព្រៀងឈប់បាញ់គ្នាតាំងពីម៉ោង១២យប់ ហើយលោកក៏បានហៅទូរស័ព្ទទៅរដ្ឋមន្ត្រីការពារជាតិស្ដីទីរបស់ថៃ ដើម្បីច្រាលចោលការលើកឡើងពីភាគីថៃ ដែលចោទថាកងទ័ពកម្ពុជាមិនបានអនុវត្តតាមកិច្ចព្រមព្រៀងនេះ។

លោក ទៀ សីហា បានបញ្ជាក់ទៀតថា ក្រសួងការពារជាតិនឹងដឹកនាំបណ្ដាអង្គទូត និងអនុព័ន្ធយោធាបរទេសប្រចាំកម្ពុជា ចុះទៅឃ្លាំមើលទីតាំងនិងសភាពការណ៍ជាក់ស្ដែងតាមព្រំដែន ដើម្បីបង្ហាញពីឆន្ទៈយ៉ាងម៉ឺងម៉ាត់របស់កងទ័ពកម្ពុជាក្នុងការអនុវត្តកិច្ចព្រមព្រៀងឈប់បាញ់គ្នា។

ប្រធានសហរដ្ឋអាមេរិកលោក ដូណាល់ ត្រាំ (Donald Trump) បានសរសេរបង្ហោះលើបណ្ដាញសង្គម TruthSocial ថា លោកបានហៅទូរស័ព្ទជាថ្មីទៅនាយករដ្ឋមន្ត្រីកម្ពុជាលោក ហ៊ុន ម៉ាណែត និងនាយករដ្ឋមន្ត្រីស្ដីទីថៃ លោក ភូមិថាំ វេឆាយ៉ាឆៃ (Phumtham Wechayachai) ដើម្បីអបអរសាទរដែលមេដឹកនាំប្រទេសទាំងពីរ ឈានដល់កិច្ចព្រមព្រៀងឈប់បាញ់គ្នាដើម្បីទទួលសន្ដិភាព តាមសំណើរបស់លោក។ លោក ត្រាំ បានបន្តថា លោកបានបញ្ជាឱ្យមន្ត្រីអាមេរិកចាប់ផ្ដើមចរចារឿងពន្ធពាណិជ្ជកម្មជាមួយកម្ពុជានិងថៃឡើងវិញ តាមការសន្យារបស់លោក។

ក្រៅពីប្រធានាធិបតីសហរដ្ឋអាមេរិក បណ្ដាប្រទេសធំៗ ជាច្រើនផ្សេងទៀត រួមមានចិន ជប៉ុន អង់គ្លេស បារាំង និងសហភាពអឺរ៉ុបបានចេញសារបន្តបន្ទាប់ សាទរចំពោះការសម្រេចបានកិច្ចព្រមព្រៀងឈប់បាញ់គ្នារវាងកម្ពុជា និងថៃ តាមការសម្របសម្រួលពីប្រធានប្ដូរវេនអាស៊ានគឺលោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim)។

បណ្ដាញសារព័ត៌មានក្នុងស្រុកបានចុះផ្សាយថា អគ្គមេបញ្ជាការកងទ័ពម៉ាឡេស៊ីលោក ម៉ូដ នីហ្សាម ប៊ីន ចាហ្វា (Mohd Nizam bin Jaffar) បានធ្វើដំណើរមកដល់កម្ពុជានៅថ្ងៃទី២៩ ខែកក្កដានេះ ដើម្បីជួបជាមួយអគ្គមេបញ្ជាការកងយោធពលខេមរភូមិន្ទលោក វង្ស ពិសេន ដើម្បីពិភាក្សាលើកិច្ចព្រមព្រៀងបទឈប់បាញ់ និងការស្ដារស្ថិរភាពឡើងវិញរវាងកម្ពុជានិងថៃ។

ជម្លោះប្រដាប់អាវុធតាមព្រំដែនរវាងកម្ពុជានិងថៃរយៈពេល៥ថ្ងៃ គឺចាប់ពីថ្ងៃទី២៤ដល់ថ្ងៃទី២៨ខែកក្កដា បានបណ្ដាលឱ្យជនស៊ីវិលនិងកងទ័ពប្រទេសទាំងសងខាង ស្លាប់និងរបួសជាច្រើននាក់ ក្នុងនោះ បានធ្វើឱ្យពលរដ្ឋរាប់ម៉ឺននាក់ បានចាកចោលពីផ្ទះសម្បែងដើម្បីគេចចេញពីគ្រាប់ផ្លោង ខណៈកងទ័ពថៃ បានប្រើប្រាស់ធន់ធ្ងន់បំពានច្បាប់អន្តរជាតិ ដូចជា គ្រាប់បែកចង្កោម ផ្សែងគីមី និងការប្រើប្រាស់យន្តហោះចម្បាំង F-16 វាយប្រហារមកលើតំបន់ប្រាសាទព្រះវិហារជាសម្បត្តិបេតិកភណ្ឌពិភពលោកជាដើម។

លោកនាយករដ្ឋមន្ត្រី ហ៊ុន ម៉ាណែត បានសរសេរបង្ហោះលើហ្វេសប៊ុកថា រដ្ឋាភិបាលនឹងរៀបចំគោលនយោបាយសម្រាប់គាំទ្រយុទ្ធជនរបួស និងក្រុមគ្រួសារយុទ្ធជនពលីឱ្យបានសមរម្យ៕


អានព័ត៌មានលើគេហទំព័រ៖ www.rfa.org/khmer/society/2025/07/29/cambodia-thai…
រូបភាពពី៖ ទទក និងមន្ទីរព័ត៌មានខេត្តកណ្ដាល និងត្បូងឃ្មុំ

---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3 4 5

1 month ago | [YT] | 519

RFA Khmer

កម្ពុជានិងថៃបានព្រមព្រៀងអនុវត្តបទឈប់បាញ់គ្នាចាប់ពីពាក់កណ្ដាលយប់នេះ
---
មេដឹកនាំកម្ពុជានិងថៃ បានព្រមព្រៀងគ្នាអនុវត្តបទឈប់បាញ់គ្នាភ្លាមៗ និងគ្មានលក្ខខណ្ឌ នៅក្នុងកិច្ចប្រជុំ ដែលរៀបចំឡើងដោយប្រទេសម៉ាឡេស៊ី និងសហការរៀបចំដោយសហរដ្ឋអាមេរិក និងប្រទេសចិន។

ប្រធានប្ដូរវេនអាស៊ានលោកនាយករដ្ឋមន្រ្តី អាន់វ៉ា អ៊ីប្រាហ៊ីម (Anwar Ibrahim) បានប្រកាសនៅក្រោយកិច្ចប្រជុំថា បទឈប់បាញ់គ្នានេះ នឹងចូលជាធរមានចាប់ពីពាក់កណ្ដាលយប់នេះទៅ គឺពីម៉ោង១២យប់។ លោកបានបន្តថា នេះជាជំហានដំបូងដ៏សំខាន់មួយ ដើម្បីបន្ធូរបន្ថយជម្លោះ និងស្ដារឡើងវិញនៃសន្ដិភាព និងសន្ដិសុខ។ លោក អាន់វ៉ា អ៊ីប្រាហ៊ីម បានបន្ថែមទៀតថា ក្រុមសង្កេតការណ៍មួយ នឹងត្រូវបញ្ជូនទៅកាន់ប្រទេសកម្ពុជា និងថៃ ដើម្បីស្ដារបណ្ដាញទំនាក់ទំនងរវាងប្រទេសទាំងពីរឡើងវិញ។

លោក ហ៊ុន ម៉ាណែត បានប្រកាសលើហ្វេសប៊ុកដែរថា នេះគឺជាលទ្ធផលដ៏ត្រចេះត្រចង់ ដែលលោកនិងនាយករដ្ឋមន្ត្រីស្ដីទីថៃ បានឯកភាពលើ៣ចំណុច គឺទី១ ការឈប់បាញ់ចាប់ពីម៉ោង១២យប់នេះ ទី២ កម្ពុជានិងថៃនឹងរៀបចំកិច្ចប្រជុំក្រៅផ្លូវការថ្នាក់មេបញ្ជាការកងទ័ពភូមិភាគជាមួយបណ្ដាសេនានុព័ន្ធនិងអនុព័ន្ធយោធា ដឹកនាំដោយប្រធានអាស៊ាននៅថ្ងៃទី២៩ ខែកក្កដា បើមានការឯកភាពគ្នាពីភាគីទាំងពីរ និងទី៣ កិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នឹងធ្វើឡើងនៅថ្ងៃទី៤ ខែសីហា ដែលកម្ពុជាធ្វើជាម្ចាស់ផ្ទុះ។

លោក ហ៊ុន ម៉ាណែត ក៏បានអរគុណនាយករដ្ឋមន្ត្រីម៉ាឡេស៊ី ដែលបានផ្ដួចផ្ដើម និងធ្វើជាម្ចាស់ផ្ទះនៃកិច្ចប្រជុំ រួមទាំងអរគុណប្រធានាធិបតីសហរដ្ឋអាមេរិកលោក ដូណាល់ ត្រាំ ដែលបានគាំទ្រឱ្យកម្ពុជានិងថៃជួបចរចាដើម្បីសម្រេចអនុវត្តបទឈប់បាញ់គ្នាភ្លាមៗ ហើយនិងការលើកទឹកចិត្តគាំទ្រពីប្រទេសចិន។

លោក ហ៊ុន ម៉ាណែត សង្ឃឹមថា កិច្ចព្រមព្រៀងឈប់បាញ់គ្នានេះ នឹងជាមូលដ្ឋានសំខាន់សម្រាប់កសាងទំនុកចិត្តរវាងគ្នា និងការកែលម្អស្ថានការឱ្យប្រសើរឡើងវិញ ដើម្បីឈានទៅរកភាពប្រក្រតីនៅពេលអនាគត។

ចំណែកនាយករដ្ឋមន្ត្រីស្ដីទីប្រទេសថៃលោក ភូមិថាំ វេឆាយ៉ាឆៃ (Phumtham Wechayachai) បាននិយាយនៅក្នុងសន្និសីទសារព័ត៌មានថា នេះជាលទ្ធផលដែលប្រទេសថៃតែងមានបំណងប្រាថ្នាចង់បានដំណោះស្រាយដោយសន្ដិវិធី ហើយលោកសង្ឃឹមថា កិច្ចព្រមព្រៀងឈប់បាញ់គ្នានេះ នឹងត្រូវអនុវត្តដោយជោគជ័យនិងស្មោះត្រង់។

កិច្ចព្រមព្រៀងបទឈប់បាញ់នេះ បានធ្វើឡើងតាមសំណើរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ដែលបាននិយាយទូរស័ព្ទជាមួយលោកនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីស្ដីទីលោក លោក ភូមិថាំ វេឆាយ៉ាឆៃ ដោយតម្រូវឱ្យមានបទឈប់បាញ់គ្នា បើកម្ពុជានិងថៃចង់បានកិច្ចព្រមព្រៀងពាណិជ្ជកម្មថ្មីជាមួយសហរដ្ឋអាមេរិក។ សហរដ្ឋអាមេរិកបានដំឡើងពន្ធលើកម្ពុជានិងថៃចំនួន៣៦%ដូចគ្នា ហើយកម្ពុជានិងថៃ កំពុងព្យាយាមសុំចរចាដើម្បីឱ្យសហរដ្ឋអាមេរិកបញ្ចុះអត្រាពន្ធនេះបន្ថែមទៀត៕

រូបភាព៖ AFP

---
#វិទ្យុអាស៊ីសេរី #កម្ពុជា #ថៃ #ហ៊ុនម៉ាណែត #ហ៊ុនសែន #ជម្លោះព្រំដែន
#RFAKhmer #Cambodia #Thailland #HunManet #HunSen #BorderConflict

Skip the Carousel

1 2 3 4

1 month ago (edited) | [YT] | 519