Antony Joy

ഇന്ന് ഞാൻ നന്നായി കരഞ്ഞു അതും രാവിലത്തന്നെ 🥹

സംഭവം എന്താണെന്ന് വെച്ചാൽ ഇന്നലെ പ്രിയ സുഹൃത്ത് സനിൻ്റെ സ്റ്റാറ്റസിൽ JCI കാരശ്ശേരി നടത്തുന്ന റീഡേഴ്സ് ക്ലബ്ബിനെക്കുറിച്ച് കണ്ടു,
എന്നാൽ ഒന്ന് കയറിക്കളയാം എന്ന് ഞാനും കരുതി.

ഗൂഗിൾ മീറ്റിംഗിൽ കയറിയപ്പോൾ How to win friends and influence people എന്ന പുസ്തകത്തെക്കുറിച്ചാണ് 20 ൽപരം ആളുകളുള്ള ഗ്രൂപ്പിൽ സംസാരം.

പുസ്തകാവതരണം കഴിഞ്ഞതോടെ പലരും എന്നെ ഗ്രൂപ്പിൽ കണ്ടതിൽ സന്തോഷം പ്രകടിക്കാൻ തുടങ്ങി 3 - 4 പേർ അവരുടെ മേശപ്പുറത്ത് നിന്നും ഒരു പുസ്തകം എടുത്തുയർത്തി കാണിച്ചു.

ഞാൻ എഴുതിയ ശ്രമിച്ചാൽ എനിക്കും സാധിക്കും എങ്കിൽ ശ്രമിക്കാം ല്ലേ? എന്ന പുസ്തകമായിരുന്നു അത്.

എൻ്റെ സന്തോഷത്തിന് അതിരില്ലായിരുന്നു.

അതിലൊരാൾ ജീവിതത്തിൽ മുഴുവനായി വായിച്ച ഏക പുസ്തകം എൻ്റേതാണെന്നും മറ്റൊരാൾ യാത്ര പോകുമ്പോൾ വായിക്കാൻ ഭാര്യ നൽകിയ രണ്ട് പുസ്തകത്തിലൊന്ന് എൻ്റെ പുസ്തകമാണെന്നും ഒക്കെ പറഞ്ഞപ്പോൾ നിങ്ങൾക്ക് ഈഹിക്കാവുന്നതിനുമപ്പുറമായിരുന്നു എൻ്റെ സന്തോഷം.

പങ്കെടുത്തവരിൽ പലരുടേയും വാക്കുകളിൽ തെളിഞ്ഞു നിന്ന സ്നേഹവും ഇഷ്ടവുമെല്ലാം എനിക്ക് നൽകിയ സന്തോഷം വർണ്ണനാതീതമാണ്.

എന്നെ ഗസ്റ്റ് ആയി വിളിച്ചിട്ടാണെങ്കിൽ ഗസ്റ്റ് ആയതിൻ്റെ പേരിൽ പൊക്കുന്നതാവാം എന്ന കണക്കിൽ അവർ പറഞ്ഞതിൽ നിന്നും കുറച്ചെങ്കിലും ഞാൻ കുറച്ചേനെ ഇതിപ്പോൾ ഞാൻ മുൻകൂട്ടി പറയാതെ, അവർ ക്ഷണിക്കാതെ മീറ്റിംഗിൽ കയറിച്ചെന്നപ്പോൾ അവർക്ക് എൻ്റെ ബുക്ക് എടുത്ത് വെച്ച് പ്ലാൻ ചെയ്യാനുള്ള ഒരവസരവുമില്ലല്ലോ, അതിനാൽ പറഞ്ഞത് മുഴുവനും ഞാൻ എടുത്ത് ട്ടോ.

ഇപ്പോഴത്തെ സാഹചര്യത്തിൽ, ഏറെ പ്രതിസന്ധികളിൽ പെട്ടിരിക്കുന്ന ഈ സമയത്ത് ഈ വാക്കുകൾക്ക് ഏറെ വിലയുണ്ട് എന്ന് ഞാൻ പറഞ്ഞപ്പോൾ തൊണ്ടയിടറിയത് അവർക്ക് മനസ്സിലായോ ആവോ നെറ്റിൻ്റെ പ്രശ്നമായിട്ടേ അവർ കരുതിക്കാണുകയുള്ളൂ ല്ലേ 💞

അങ്ങനെ 6.20 കഴിഞ്ഞപ്പോൾ ആ മീറ്റിംഗിൽ നിന്നിറങ്ങി ഞാൻ JCI കാലിക്കറ്റ് മെട്രോ സംഘടിക്കുന്ന മോർണിംഗ് വിസ്ഡം എന്ന പ്രോഗ്രാമിൽ കയറി. ശ്രീ. സുബൈർ പാണ്ടിക്കാടാണ് ഹൃദ്യമായ തരത്തിൽ ക്ലാസ്സ് നയിക്കുന്നത്.

പ്രോഗ്രം 6 മണിക്ക് തുടങ്ങിയതായതിനാൽ അവസാനത്തെ അൽപഭാഗം മാത്രമേ എനിക്ക് കേൾക്കാൻ കഴിഞ്ഞുള്ളൂ എങ്കിലും കേട്ടത്രയും അതിമനോഹരമായിരുന്നു.

എന്നെ ഞെട്ടിക്കാൻ ദൈവം ഇവിടെയും വിരുന്നൊരുക്കിയിരുന്നു പതിവ് പോലെ പ്രിയ സുഹൃത്തും JCI കാലിക്കറ്റ് മെട്രോ പ്രസിഡണ്ടുമായ ശ്രീമതി റസീന എന്നോടുള്ള സ്നേഹം പ്രകടിപ്പിച്ചു. ഈ മോർണിംഗ് വിസ്ഡത്തിൻ്റെ ആദ്യ ക്ലാസ്സ് എടുക്കാൻ തന്നെ വിളിച്ചതിൽ ഞാൻ എന്നും റസീനയോടും ടീമിനോടും കടപ്പെട്ടിരിക്കുന്നു എന്നത് കൂട്ടിച്ചേർക്കട്ടെ.

ഇതാണോ വിരുന്ന് എന്ന് ചോദിക്കാൻ വരട്ടെ ട്ടോ
റസീന എന്നെ പരിചയപ്പെടുത്തിയത് കേട്ടപ്പോൾ ഇന്നത്തെ പരിശീലകനായ സുബൈർ സാർ ചോദിച്ചു ആൻ്റണി ജോയ് സാർ ആണോ ജോയിൻ ചെയ്തത് എന്ന്
അതേ സാർ ഞാനാണ് എന്ന് മറുപടി കൊടുത്തപ്പോൾ ദാ വരുന്നു അവിടുന്നും എൻ്റെ പുസ്തകം.

പുസ്തകം ഉയർത്തിക്കാണിച്ചിട്ട് സാർ പറയുകയാണ് നല്ല പുസ്തകമാണ് ഞാൻ കാലടിയിൽ ടോബി അച്ചൻ്റെ സ്ഥാപനത്തിൽ നിന്നും വാങ്ങിയതാണെന്ന്.

ഇനി നിങ്ങൾതന്നെ പറ പ്രശ്നങ്ങളിൽപ്പെട്ട് ആകെക്കൂടി അടിപതറിയിരിക്കുന്ന എനിക്ക് ഇതിൽ കൂടുതൽ എന്താണ് ജീവിതം ധന്യമെന്ന് തോന്നാൻ ലഭിക്കേണ്ടത്?

സെഷനിൽ നിന്ന് പുറത്തിറങ്ങിയതോടെ അതുവരെ ഞാൻ കഷ്ടപ്പെട്ട് നിയന്ത്രിച്ച് നിർത്തിയ കണ്ണീർക്കണങ്ങൾ സന്തോഷത്താൽ താഴേക്ക് ചാല് തീർത്ത് ഒഴുകാൻ തുടങ്ങി, കുറേ നേരം ഞാൻ സന്തോഷത്താൽ കരഞ്ഞു.

അല്ല അതിനിടയിൽ പ്രശ്നങ്ങൾ ഉണ്ടെന്ന് പറഞ്ഞല്ലോ എന്താണത് എന്ന് ചോദിക്കാൻ നിങ്ങൾക്ക് തോന്നുന്നുണ്ടെന്നറിയാം നിങ്ങളുടെ സ്നേഹത്തിന് ഹൃദയപൂർവ്വം നന്ദി.
പ്രശ്നങ്ങൾ പരിഹരിച്ച ശേഷം ഞാൻ പറയാം. 2025 മെയ് 29 നും ജൂൺ 9 നും ഒരോ വീഡിയോ ചെയ്ത് Private ആക്കി യൂട്യൂബിൽ വെച്ചിട്ടുണ്ട് പ്രശ്നം തീരുമ്പോൾ പബ്ലിക്ക് ആക്കാം ട്ടോ.

ഇതെല്ലാം ഇപ്പോ എന്തിനാ എഴുതിയതെന്ന് ചോദിച്ചാൽ ഉത്തരമൊന്നേയുള്ളൂ കുടങ്ങിയെന്നും തകർന്നെന്നും തോന്നി നിരാശപെടുമ്പോൾ നമുക്ക് ഊഹിക്കാൻ പോലും കഴിയാത്ത തരത്തിൽ ദൈവം വഴി തുറക്കും, ശ്രമിച്ചു കൊണ്ടേയിരിക്കണം എന്ന് മാത്രം. നിരാശയോടെ ഞാൻ കിടന്നുറങ്ങിയിരുന്നെങ്കിൽ ഈ രണ്ട് സെഷനും അതിഗംഭീരമായ അനുഭവവും ഉർജ്ജവും ഞാൻ നഷ്ടമാക്കിയേനെ എന്നപോലെത്തന്നെ.

അല്ലാ അപ്പോ എങ്ങനെയാ
#ശ്രമിച്ചാൽ_എനിക്കും_സാധിക്കും_എങ്കിൽ_ശ്രമിക്കാം_ല്ലേ?

7 months ago | [YT] | 5