迪里熱吧
迪里熱吧，英文名叫「Dele Tottenham Hotspur Fans Bar」，咁點解叫「迪里熱吧」呢？係咪同迪麗熱巴有關㗎呢？又係咪同Dele Alli有關呢？甚至乎係咪有李佳芯呢？其實冇嘅，起呢個名就純粹攞個諧音，本身諗叫「熱狗吧」、「熱吧」，咁諗諗下我哋又有迪里．阿里，就不如叫「迪里熱吧」啦，咁同埋你都知好多時睇波會睇到「Dele」㗎啦，最多唔「No more」㗎啫，所以你大概明個名點嚟就得㗎啦，唔駛太深究嘅。
「迪里熱吧」顧名思義就係一個熱刺fans嘅集中地啦，都係俾球迷（唔一定熱刺嘅）吹下水，又俾我發洩下嘅地方。咁現階段當然未有實體店啦，但如果有日真係可以有個地方大家聚下，都咪話唔夢幻。又因為呢個page個人喜好極重，所以唔好期待有乜理性分析呀，專業評論呀，客觀報導之類，講得衰啲我係一言堂嚟，唔啱聽真係會封，所以先小人後君子，唔好攪事。但又咁，我應該好少會講其他球會嘅，但對住嗰啲好鍾意去人哋地方挑起罵戰嘅____球迷（自行填充），我係唔會留情的。
香港做熱刺球迷係孤獨嘅，信我啦，特別係喺一班無知嘅講波佬唔知扮知咁去成日有意無意咁踩低熱刺嘅大環境下，啲人會覺得你捧熱刺好似係笑話咁。又咁講，人都係會有「勝利球迷」嘅本質嘅，熱刺呢隊波成日俾人笑獎盃櫃吉咗好多年，你EQ低啲根本唔會撐得耐，所以呢，攪呢個page嘅目的都係，如果大家同我一樣感到孤獨，然後想放開啲酸民，又對呢隊會睇到「迪里」嘅波有愛，歡迎大家一齊喺呢度圍爐取下暖啦。
迪里熱吧
做少少文字紀錄，回程途中，巴士過咗冇跟去球場，人太多加夜啲仲有嘢做，但心情好興奮，呢種感覺真係好正，係一吐烏氣嘅感覺，係釋懷嘅感覺。
5:30開始，3:00鬆啲就到，食少少嘢就去球場，但行到附近就已經過唔到，喺遠少少嘅位置等開始，算企到邊。喺等巡遊開始期間，同隔離一個老球迷傾咗陣謁，有啲感觸。
老人家仲好健壯，帶住個孫仔，佢話佢1968年已經捧熱刺，嗰年佢11歲，所有大大小小嘅賽事佢都經歷過，包括71年捧歐洲冠軍，同時亦經歷19年嘅歐聯失敗。佢話今次贏波好大意義，因為熱刺已經唔係佢初初捧嗰隊成日贏波嘅球隊，今次捧盃，希望改變到一啲嘢，包括心態同信心。
佢又問我，支持唔支Ange留低，我話我支持佢起碼多一年。我同佢講我哋經歷過名教頭失敗嘅時間，要重建，要時間，至少呢個教練嗰種「要贏」嘅信念好值得留任，佢認同，佢重同我講佢好欣賞Ange賽前搵球員家人拍片鼓勵球員作賽嘅計劃，好成功。同埋我哋都好認同球隊好多年輕人，要時間成長，而打得好嘅話，就會係新嘅黃金一代。
雖然大家都好贊同黃金一代好似Kane、Walker、Eriksen、Dele等等捧唔到盃好可惜，但要向前走，就寄望新一班球員好似Gray同Bergvall可以成長同撐起隊波。
講真，我一直知熱刺唔係細會，只係外界睇少佢，但經過今次入場睇直播同巡遊，我更加覺得熱刺真係好勁，而呢種連結到社區同足球嘅魅力，唔係每一支球隊都做得到。
終於，享受咗呢幾日，享受自己係冠軍，感受到個社區幾愛呢支球隊，同時呢支球隊對北倫敦有幾大影響力，作為暫住北倫敦嘅居民，同時又係長年熱刺球迷，真係無憾。
大家繼續enjoy！之後再update大家接落嚟嘅動向。
4 months ago | [YT] | 18
View 0 replies
迪里熱吧
【賽後報告】#熱刺 主場迎戰 #曼城 以1:0落敗，輪換下上半場攻勢較少，輸嗰球波仍然係Danso犯錯導致，左中堅位置要佢習慣仍然有待磨鍊。但下半場傾力反撲值得加許，可惜久攻不下，臨完場前Haaland入球被判手球在先，最後一擊Sarr亦頂高未能破網，最終以1:0完場。
確實今場波明顯見到球証尺度不一，對方多次犯規不作判罰，或者並沒有以黃牌警告，反之我哋有收嘅幾張黃牌，除咗Maddison嘅技術性犯規，其他都係無辜。或者一如我所講，Levy應該要俾返足PGMOL保護費，唔係場場都咁，真係好惡打。
講返場波，後防一對正選兩閘上半場表現一般，到下半場壓前打先有返啲表現，尤其Udogie被換出前搶到個波殺入禁區嗰下，真係好需要呢種決心。Porro同Johnson嘅合作明顯唔夠Kulu好，上半場特別係Johnson，好似迷失咁，到下半場先至有返啲攻擊力。而一對中堅繼續表現不俗，除咗Danso失誤導致嘅輸波，其他時間佢都打得好好，希望佢可以快啲適應。
中場Bentancur係我覺得全場打得最好嗰個，佢同Bergvall嘅合作係近期嘅最佳組合，Maddison表現亦開始回勇，事實上今場波上下半場表現有好大分別，特別係Odobert，下半場有多次突破對手，亦有入球機會，可惜未能把握。
Tel同Johnson明顯冇乜化學作用，孫隊長後備入替有下近射但被演出神勇嘅Ederson救出，Spence後備入替持續有好表現，唯有Werner仍然迷失，我真心寧願用Scarlett都唔想再見到佢。
今場輸波未能令球隊於聯賽榜上攀升，而我覺得球隊傷兵逐漸回歸後，表現係越嚟越好，而且球隊十分年輕，持續發展會係好事。輸波唔值得高興但只能話唔失禮，加油，下場再戰。 #迪里熱吧
7 months ago | [YT] | 5
View 0 replies
迪里熱吧
【賽後報告】聯賽主場出擊對 #曼聯 賽事，憑Maddison上半場補中得手小勝1:0，歷史性首次聯賽雙殺對手，同時亦令 #熱刺 升上聯賽榜12位。
事實上，比賽主導權在熱刺，雖然陣容仍然不整，但有幾個傷癒復出嘅主力球員，令我哋嘅陣容有更多調配空間，包括正選門將Vicario同中場Maddison，後備則有傷出近半嘅Odobert同Johnson列陣。
上半場一直控制比賽節奏，呢個係我最樂見嘅成長，12分鐘Bergvall射門被對手門將擋出不遠，Maddison後上補中領先1:0。得手後對方有幾次反擊但都被後防瓦解。到下半場對手加強壓力，但Vicario連同Spence、Danso、Davies同Porro等後防都有出色表現，我哋嘅反擊亦未能得手，最後1:0保持勝局全取3分。
今場波繼續有新加盟嘅Tel同Danso出賽，Danso融入球隊進度良好，如果VDV復出兩個高效率後衛應該會係最好嘅選擇。Tel仍然搵緊自己嘅位置，但見到佢同孫隊長嘅配搭係越嚟越好，可惜把握比較差，今場波未能取後入球。
中場Bentancur同Bergvall亦係越打越有默契，要挑剔可能係轉邊速率比較低，同埋放直線同一啲風險球比較少。Kulu今場都係做苦工比較多，後備Johnson同孫隊長狀態都係一般。
今場波MOTM仍然係近況甚好嘅Spence，助攻助守表現出色，另一名有好表現嘅係Porro，右路助攻力極強。今場波基本上表現未算十分出色，尤其係把握力同處理一啲反擊嘅情況，如果可以做好啲，應該贏3、4球都係冇問題。
希望球隊狀態會越嚟越好，同時希望傷兵問題會逐漸解決，下場將作客 #葉士域治，繼續努力。 #迪里熱吧
7 months ago | [YT] | 6
View 0 replies