'Mahamevnawa' is a group of monasteries founded by Most Ven. Kiribathgoda Gnanananda Thera (Pinwath Loku Swamin Wahanse). Our goal is to teach people the original teachings of the Buddha based on the Tripitaka.
මහමෙව්නාව භාවනා අසපුව
චතුරාර්ය සත්යාවබෝධයට ධර්ම දේශනා
ගෞතම බුදු සසුන තුළ සනාතන රැකවරණය ලබමු.
This channel includes:
🌷 Sermons of Kiribathgoda Gnanananda Thera
🌷 Guided meditation instructions in Sinhala
🌷 Poems (Vandana Kavi) recited by Kiribathgoda Gnanananda Thera, highlighting the qualities of the Buddha, Dhamma, and Sangha
🌷 Chantings of the Paritta and Sutta
🌷 Events conducted by Mahamevnawa Monastery
You may subscribe to this channel if you wish to learn the original teachings of the Buddha for the realization of the Four Noble Truths, which help liberate us from all kinds of suffering.
Contact Info
Mahamevnawa Bhawana Asapuwa
Waduwawa, YatigalOluwa.
Polgahawela,
Sri Lanka
Phone: +94 37 22 44 602 / +94 37 729 4993
WhatsApp: +94742974674
Mahamevnawa
2 days ago | [YT] | 577
View 18 replies
Mahamevnawa
ඒ සත්සර මුසු ළයාන්විත ගී නද පැතිරී යන විට සිද්ධාර්ථයන්ට දැනුනේ කටු කොහොල් පිරී ගිය වනයකට පැමිණි ලෙසකිනි. ඒ හඬ සවනේ වැදෙනා විට කටු ඇනෙන්නාක් සේ විය. සිද්ධාර්ථයන් තම සිත දෙස බලා සිටියේ ය. වෙනදා නන්දා ගේ ගී ඇසීමෙන් සිත පිනායයි. එහෙත් අද එය මොරගෑමක් ලෙසිනි ඇසෙන්නේ. සිත එහි නොඇලේ. ඒ ගීතය ද නිමා විය. ඔවුහු අත් පොළමින් කිකිණි සිනා නැගූහ. එහෙත් නිමේෂයෙකින් සියල්ල අතීතයට ඇදී ගිය අයුරු සිද්ධාර්ථයන් බලා සිටියේය. ගලා යයි හැම මොහොතම. ගඟුලක් වැන්න. හමා යයි හැම මොහොතම. පවනක් වැන්න. එවිට මියගිය අතීතය පමණක් සිත වැළඳගෙන සිටී. සර්පයෙක් වෙලී ගියා සේ. එවිට යළි යළිත් රස විඳින්නට ම සිතේ. සිත පිනායන තෙක්ම. යළි යළිත් අතීතයට යයි. අහෝ... මේ මායාවේ නිමාව සිදුවන්නේ කවරදාද? සිව් දිශාවෙන් වැසීගිය පළිඟුමිණි ප්රාකාරයෙන් යුතු එක්ටැම් ගෙයක් ද මේ දිවිය?
එදින රාත්රී භෝජනය නොගත් සිද්ධාර්ථයන් පැන් පොදකින්ම සා - පවස් නිවා ගනිමින් යහනේ වැතිරුණි. එහෙත් නන්දාවෝ තවමත් ගී ගයනු ඇසේ. ඈ යෙහෙළියන් හා එකතුව වරින් වර සිනා නගයි. සිද්ධාර්ථයන් අසලකවත් නිදිබර ගතියක් නොවීය. හේ යහනේ ම දිගා වී කව්ළුවෙන් පෙනෙන අහස් කුස දෙස බලා සිටියේය.
සඳ හා එක් වූ තරු කැල රන්වන් පාටින් දිලිසේ. වලාරොදවල් අහසේ පාවී යයි. තෙරක් නොමැති මේ අහසේ අනන්තයට ම පාවී යන්නට ඇත්නම් කොතරම් හොඳදැයි සිද්ධාර්ථයනට සිතිණ. කුරුල්ලන් පවා කොපමණ සැහැල්ලුවෙන් ද දිවි ගෙවන්නේ. ඔවුහු තමන් කැමැති රුකකින් පලවැල බුදිමින් පියාපත් බර පමණක් ඇතිව නිදහසේ පියාසලා යත්. සිද්ධාර්ථයන්ට මේ කුරුලු ජීවිතයේ ඇති නිදහස ශ්රමණ ජීවිතය තුළ ද පෙනුනේය. පොකුණේ පැන් බී ගොදුරු කා පොකුණ අතහැර ලෝල නොවී පියඹා යන හංසයන් සේ ශ්රමණයෝ ද කැමැති තැනකින් වළඳා කැමැති තැනකට යත්. එහෙත් මේ ගෘහවාසය කොතරම් සම්බාධ සහිත ද? කෙලෙස් හට ගැනීමේ ආකරයක් වැන්න. මැදියම් රැය තෙක් සිද්ධාර්ථයන් කල්පනා සයුරේ ගිලී සිටියේය. ගී පද වැල් වියැකී ගොස් තිබිණ. පාලු නිහැඬියාවක් මතු වී ගියේය. දැල් වී ගිය තෙල් පහන් නිවී යමින් තිබිණ. පැතිරුන සුගන්ධය ද හමා අවසන් වී ඇත. තවදුරටත් යහනේ සැතපී සිටින්නට සිද්ධාර්ථයන්ට නොසිතේ. සැණෙකින් හේ නැගිට්ටේය. සක්මන් කරන්නට පටන් ගති. මුළු ලොවම නිදිගත් ඒ මොහොතේ සිද්ධාර්ථයන් තමාම ඇමතී.
“එම්බා ගෞතමයනි, පමා වන්නහුය බොහෝ සේ. බලව, නදිය පවා පමා නොවී සයුරු තෙර වදී. ඉම බිඳී දිය සිඳී ගියදා කෙසේ නම් බිජු වපුරන්ට ද? ජීර්ණව අබල දුබලව ගියදා කෙසේ නම් ඒ සදාකාලික පරම පිවිතුරු ශාන්තිය සොයා යන්ට ද? ඒයි සිද්ධාර්ථයෙනි, තියුණු සැතෙකින් නෙලුම් දඬු සිඳ දමන්නා සේ මේ ගෘහ බන්ධනය ද වහා සිඳලව. ආශා රැහැනින් බැඳී මුසපත් වී ගිය මේ මායා ලොවේ නිමේෂයකට හෝ වසඟ නොව. එසේය... වහ වහා... දැන්ම යව. කුමන පමායෙක් ද තොපට?”
සිද්ධාර්ථයන් තැබූ පියවර නොසොලවා ම සිටියේය. සිතිවිලි නැවතී ගියා සේ වී. ශෛලමය ස්ථම්භයක් සේ වී. මොහොතකින් හේ නිසොල්මනේ පියවර තබමින් බිමට නැඹුරු වූ නෙතින් යුතුව බොහෝ සිතිවිලි බරව යසෝදරාවගේ යහන් ගැබ කරා ගියේය. දොර පියන අඩවන් වී තිබිණ. යහන් ගැබ ආවරණය වී තිබූ සිනිඳු සේද සළුව මෑත් කළේය. ඇතුලු ගැබ දෙස නෙත් යොමා බැලීය.
යසෝදරාව බිළිඳු රාහුලයන්ව තුරුළු කොට යහනේ සැතපී හුන්නීය. නිවෙමින් තිබූ තෙල් පහන් එළියෙන් රාහුලයන්ව පැහැදිලිව නොපෙනින. සිද්ධාර්ථයන් මේ පැමිණ සිටියේ ගෘහවාසයෙන් සමුගන්නා මොහොතටය. ඒත් යසෝදරා සුව නින්දේය. රාහුලයන් ගේ සිඟිති මුව, නිල් මැණික් නෙත්, සුරතල් අත් - පා පොඩි, සිද්ධාර්ථයනට මැවී පෙනින. රාහුලයන්ව දෝතට ගෙන සිපගන්නා විට දැනුන නැවුම් සිඟිති සුවඳත්, ඒ සිනිඳු පහසත් යළි යළිත් දැනෙන්නට වී. සැණෙකින් සිද්ධාර්ථයනට සිහිනුවණ උපන. අඹු දරුවන් කෙරෙහි සිතේ ඇතිවන බැඳීම අයෝමය වරපටකටත් වඩා බලවත් යැයි සිද්ධාර්ථයනට සිතින. අහෝ! ඉන්ද්රජාලිකයාගේ මායා නගරය! හේ එසවූ පිය නොසොල්වා යසෝදරා හා රාහුලයන් දෙස බලා සිටියේය. නැවත සෙමින් සෙමින් පසුපසට පියවර තබා ආපසු හැරුනේය. වහ වහා පියගැටපෙළ බැස්සේය. ඒ මැදියම් රැයේම ඡන්නයන්ගේ කුටිය තෙක් ගියේය. ඡන්න තෙමේ සිද්ධාර්ථයන් ගේ සිතත් විශ්වාසයත් දිනාගත් නිලධාරියා විය. හේ සිද්ධාර්ථයන් හා බොහෝ කුලුපග වී. සිද්ධාර්ථයන් ඡන්නයන් ගේ යහන් ගැබ දොර සෙමින් විවර කෙළේය. ඡන්නයන් සමීපයට ගියේය. ඔහුගේ උරහිසට අත තැබීය. ඡන්නයන් තිගැස්සී අවදි විය.
“ෂ්... ෂ්... ඡන්නයෙනි, හඬ නොනගව්! මේ සිද්ධාර්ථ” යි සිද්ධාර්ථයන් රහස් හඬින් තෙපළේය. ඡන්නයන් දෑස් පිසදමමින් වහා නැගිට්ටේ ය.
“ආහ්.... කුමාරයාණනි, කිම, මේ මැදියම් රැයේ?”
“ෂ්... ෂ්... නිහඬ වව්! ඡන්නයෙනි, දැන් යා යුතුය සිද්ධාර්ථයන්. තෙපි සීරුවෙන් ගොස් අසු සාධා ගනිව්. හඬ නොනගන්නට වග බලාගත යුතුය ඡන්නයෙනි තෙපි”
ඡන්නයන් විමතියට පත් විය. හේ නෙත් විවර කර ගනිමින්, මුව අයා ගනිමින් බලාගත් වනම සිට.
“කු... කුමරුනි, කිමද කුමරුනි මේ?”
“ඡන්නයෙනි, මේ දොඩන වෙලාව නොවේ. නිමේෂයෙකින් අසු සාදාගෙන එව. හදිසි ගමනෙකි මේ යෙදී තිබෙන්නේ”
සිද්ධාර්ථයන් වහා වහා නැවත උඩුමහලට ගියේය. යසෝදරාව සමග වූ සරණ බන්ධනය දා පැළඳි පේරැස් මුදුව ඇතුළු සියළු අබරණ ගලවා තැබීය. සුදු වතක් හැඳ සුදු වතක් පොරවා ගති. හේ නිතර පෙරවූ රන්වන් සලුව ද ගති. රන් මිරිවැඩි සඟල ද ගෙන පාත මාලයට බැස්සේය.
ඡන්නයන් මිණි කිකිණි දැලින් තොර, හඬ නඟන සැරසිල්ලෙන් තොරව කන්තක අසු සකසා තිබුණි. කන්ථක අසු ද සන්සුන් පියොවින් සිටියේය. මේ ශාන්ත පිළිවෙළ දුටු සිද්ධාර්ථයන් සතුටට පත් විය.
“මැනවි... ප්රිය ඡන්නයෙනි, කල් පැමිණියා තවත් බලා නොසිටින්නට. ඒ පරම විමුක්තිය උදෙසා තවත් පමා නොවිය යුතුය”
විසිනම වසක් මුළුල්ලේ තම දිවි මග පහන් කළ ඒ සුවිසල් මාලිගය දෙස මඳකට හෝ සිද්ධාර්ථයන් නැවත හැරී නොබැලීය. ඔවුහු ඉතා නිහඬව ම නික්මී ගියහ. කපිල වස්තු වෙල්යාය මැදින් වැටුණු මාවත දිගේ ගියහ. ඉන් පසු වැටුණේ තවලම් කණ්ඩායම් ගමන් කරන ප්රධාන මාවතටයි. කොසොල් දනව්වද ඉක්මවා ගියහ. මගධ ජනපදයට ද ඇතුළු විය. මේ සා දුරක් පැමිණියේ නමුදු සිද්ධාර්ථයන් තවමත් නිහඬය. සිද්ධාර්ථයන් මේ යන්නේ ගිහිගෙය අතහැර බව ඡන්නයන්ට තේරුම් ගියේය. එහෙත් මේ සිදුවන්නේ කුමක්දැයි ඔහුට අදහාගත නොහැකි වී. මෙතුවක් කලක් එක්ව සිටි කාරුණික කුමාරයාණන් කොයිද මේ යන්නේ? රන්වැලක් සේ බැබලී ගිය යසෝදරා කුමරිය, නොබෝදා ජන්ම ලද මල් පෙත්තක් සේ සිනිඳු පුංචිකුමරු, කාරුණික පියරජුන්, එම බිසව්, නිමක් නැති ධන සම්පත් සියල්ල හැර දමා... තපස් චර්යා සඳහා මේ යන ගමන නම් සුළු පටු එකක් විය නොහැකිය. අහෝ! මේ අසිරිය කෙසේද අදහාගන්නේ!
ඔවුහු නගර සීමා ඉක්මවා මහවන මැදින් වැටී ඇති තවලම් මාවතට පිවිසියහ. සඳ රැසින්වන ගැබ නැහැවී ගිය සේය. මග දෙපස වූ සුවිසල් වෘක්ෂයන් පෙනුනේ වනය අරක් ගත් දානව රාක්ෂයින් ලෙස ය. බකමූණෝ ද අතු අතර සැඟවී හඬ නගන්නට වූහ. වව්ලෝ ඔබ - මොබ පියාසර කළහ. සඳ එළිය වැටී රිදී දහරක් සේ දිලෙමින් ගලා බස්නා අනෝමා නදිය ඈතින් පෙණුනේය. ඔවුහු අනෝමා නදියෙන් ද එතෙර වූහ. නදී තෙර හාත්පස පුළුල්ව පැතිරී ගිය රමණීය වැලිතලාවකි. එතැනට පැමිණි සිද්ධාර්ථයන් අසු පිටින් බැස්සේය. මහා ආශ්වාදයෙකින් යුතුව හාත්පස සිසාරා නැරඹීය. සිද්ධාර්ථයන් ගේ මුවමඬලට එක්වරම ශාන්ත සිනාවක් නැගිණ. බලවත් සැහැල්ලුවකට පත් වී ගියා සේය. හේ ඡන්නයන් දෙස බලා සිනාසුණි. ඡන්නයන්ට තවමත් අදහා ගත නොහැකිය.
“මැනවි... ඡන්නයෙනි, මෙපමණෙකින්ම සම්බාධ සහිත වූ මේ ගෘහවාසය නිමාවිය. බලව, මේ අහස් තලය, ඈතට විහිදී ගිය වන රාජීහු, සිත්කලු වැලිතලාව හා!... සියල්ල නිදහස් ය. ශ්රමණභාවය ද එතරම් නිදහස් ය. එහෙත් ඡන්නයෙනි, නිමේෂයක් අසව. මේ ගමන මෙසේ එන්ට සිදුවූයේ බොහෝ හේතු මතය. යම්හෙයකින් යසෝදරාවන් බලා සිටියදී සිද්ධාර්ථයන් නික්ම ගියේ නම් ඈ ලය වාවා ගත නොහැකිව මිය යනු ඇත.
සිද්ධාර්ථයන් බොහෝ කලක සිට පැතූ දේ. ඒ නිදහස දැන් ලැබී තිබේ. දැන් ඉතින් මේ මායාස්වරූපී වූ ජීවිත පැවැත්මේ රහස සොයා ගෙනයි යා යුත්තේ. සියලු දුක් සොම්නසින් තොර වූ අත්යන්ත සුඛභාගී වූ ඒ සනාතන අමෘතය සොයා ගත යුතුය.
එම්බා ඡන්නය, මපියාණන්ට සැලකරව. සිද්ධාර්ථ කුමරුන් ගිහිබැඳුම් සිඳ හළ බව. අන්තරා නොමැතිව යහතින් සිටින බව. තොපව මේ ගමනට කැඳවා ගත්තේ සිද්ධාර්ථයන් ගැන ඔවුනට කණස්සලු නොවීම පිණිසය.
ඉතින් ඡන්නයෙනි, මෙතැන් සිට සිද්ධාර්ථයන් තනිවම යන්නේය. දැන් ආපසු යා යුතුය තෙපි”
සිද්ධාර්ථයන් රන්මිරිවැඩි සඟළ ගෙන පොරව සිටි රන්වන් උතුරු සලුවෙන් දවටා ඡන්නයන් අත තැබීය.
“මෙය ද මපියාණන්ට දෙව, සිද්ධාර්ථයන් මේ දුක් විඳින ජනයාට සදාකාලික සුවයක් සොයා මේ මායාවෙන් මිදුණු ජීවිතයේ යථාර්ථය සොයා ඒ ආධ්යාත්ම විමුක්තිය සොයා නික්ම ගිය බවත් පවසව.”
දැන් සිද්ධාර්ථයන් සන්තකව ඇත්තේ පොරවාගෙන සිටින සුදුවත පමණි. එහෙත් හේ නව ජීවයක් ලද්දකු සේය. තොල් සඟල ප්රීතියෙන් බබලයි. හේ කන්ථක අසුකරා ගියේය. අසුගේ මුහුණත් ගෙලත් ආදරයෙන් පිරිමදින්නට වී.
“හා!... කන්ථකයෙනි, ජීවිතයේ හැටි ඔහොම තමා. තෙපි බොහෝ කලක් සිද්ධාර්ථයන් හා ප්රීතියෙන් කල් ගත කළානේ. දැන් ඒ සිද්ධාර්ථයන් සියල්ල අත් හළේය. එසේය. තොප සමග වූ මිතුරු දමත් අදින් අවසන් වන්නේය. ප්රිය කන්ථකය, තෙපි මේ ඡන්නයන් සමග ආපසු යව. ශෝක නොකරව සිද්ධාර්ථයන් නොමැති වීම ගැන.”
කන්පෙති නොසොල්වමින් කන්ථක අසු සියල්ල අසාගෙන සිටියේය. සිද්ධාර්ථයන් දෙස බලා සිටියේය. යළි හේ සිද්ධාර්ථයන් ගේ දෙපා සිඹින්නට පටන්ගති. තම පෙම්වත් ස්වාමියාණන් ගේ ජීවිතයේ සිදුවෙමින් පවත්නා මේ මහා වෙනස කන්තකයාට වැටහී ගියා සේ ය.
අනතුරුව සිද්ධාර්ථයන් දෙඅත ඔසවා ඡන්නයන් ගේ දෙවුර මත තැබීය.
“ප්රිය ඡන්නයෙනි, තෙපි ද බොහෝ ස්නේහවන්තව සිද්ධාර්ථයනට සේවා කළාහුය. මිත්ර සන්ථවයෙන් කල් ගෙව්වාහුය. එහෙත් එක්වන සියල්ල වෙන් වීමෙන් අවසන් වී යයි. බලව එය අද පසක් වන හැටි. මෙයයි මේ ලෝ දහමේ අපූර්වත්වය. කඳුළත් - සිනාවත් අතර රියසකය මේ”
ඡන්නයන් කම්පිත වී ගියේය. ගොලු වූ කලක් මෙන් වී. හේ සිද්ධාර්ථයන් ගේ මුහුණ දෙස බලා සිටියේය. පැසුළු යාමයෙහි බැස යන සඳ රැසින් සිද්ධාර්ථයන් ගේ මුහුණ සේදී ගියා සේය. මහා මුනිවරයෙකු ගේ ඡායාවක් එහි දිස්වීය. වනමැද සක්මන් කරන ප්රතිමාවක් සේය. සිද්ධාර්ථයන් ඡන්නයන් ට ආදරයෙන් සැලකූ හැටි, දුක - සැප සොයා බැලූ හැටි. ඡන්නයන්ට මැවී පෙනෙන්නාක් මෙන් වී. අහෝ... ඒත්... දැන් මේ සියල්ල සිදුවන අයුරුය. අනේ! නැවත මේ පුරුෂෝත්තමයා කවරදා නම් දකින්නද?
ඡන්නයන්ට හිත වාවා ගත නොහැකි වී. හේ ළදරුවෙකු සේ ඉකිගසමින් හඬන්නට විය. හේ බිම වැතිර සිද්ධාර්ථයන් ගේ දෙපා සිපගත්තේය. ඡන්නයන් ගේ නෙතින් ගැලූ කඳුළින් තම පායුග තෙත් වී යනු සිද්ධාර්ථයන්ට දැනිණ. හේ ඡන්නයන්ව අල්ලා නැගිටුවීය.
“හා!... ඡන්නයෙනි, කම් නැත. දැන් තොපට යන්නට කල් උදාවිය. යව... තොපට යහපතක්ම වේවා!”
සිද්ධාර්ථයන් ඡන්නයන් දෙස බලා සිට, කන්ථකයන් ගේ ද හිස පිරිමැද පාවහන් රහිත ඒ සිනිඳු පායුග වැල්ලේ තබමින් නදී තීරය ඔස්සේ පියවර තබන්නට වීය. කෙමෙන් කෙමෙන් සිද්ධාර්ථයන් ඈත් වී ගියේය. අහෝ! සියලු සත්නට එකසේ පිළිසරණ විය හැකි විමුක්තියක් සොයමින් මහා වනයට පිවිසගන්නා හැටි. ඡන්නයන් හා කන්තකයා නෙතු නොපියාම තම ආදරණීය කුමාරයාණන් නික්මී යන සැටි බලා සිටියහ. සිද්ධාර්ථයන් ගේ දර්ශනය දැන් නොපැහැදිලි ඡායාවක් සේ වී. සැණෙකින් කන්ථක අසු කලබල වී. හේ සිද්ධාර්ථයන් පසු පස හඹා යනු පිණිස දඟලන්නට පටන් ගති. ඡන්නයන් කන්ථකයාව වැරෙන් අල්ලා ගති. එහෙත් හේ හිස උඩට නගමින් සිද්ධාර්ථයන් යමින් සිටි දෙස බලමින් හේසරාව කරන්නට විය. කන්ථකයාගේ දෑසින් කඳුළු ධාරා ගලා ගියේය.
සිද්ධාර්ථයන් ගේ ඡායාව වන වැදී නොපෙනී ගියේය. කන්ථකයාව ආපසු හරවා ගැනීමට ඉමහත් වෙහෙසක් ගත යුතු විය. ඡන්න තෙමේ මහත් වෑයමින් අසු ද රැගෙන යළි යළිත් හිස් හරවමින් සිද්ධාර්ථයන් ගිය මග බැලූහ. අනෝමා නදියෙන් එතෙර වූ වහාම කන්ථකයා මහා හඬින් හේෂාරව කරන්නටත් කඳුළු සලන්නටත් පටන්ගති. කන්ථක අසුගේ සිත වාවා ගත නොහැකි වී හේ සිහිසුන්ව එතැනම ඇද වැටුණේය. හේ යළි කිසිදින නොනැගිට්ටේය.
(උපුටා ගැනීම - අතිපූජ්ය කිරිබත්ගොඩ ඤාණානන්ද ස්වාමීන් වහන්සේ විසින් රචිත ඒ අමා ගීතය ග්රන්ථයෙනි)
4 days ago (edited) | [YT] | 730
View 23 replies
Mahamevnawa
🌻 අප මහබෝසත් බුදුවනු පිණිස මනුලොව උපදින්ට ඇරයුම් ලබයි.
බෝසත් තෙමේ දෙව්ලොව සුවසේ වාසය කළේය. මනුලොව බුදුකෙනෙකු උපදිනු පිණිස කෙමෙන් කෙමෙන් සකස් වූයේය. එය දැනුණේ මිනිසුන්ට නොව දෙවියන්ට ය.
එකල්හි දස දහසක් සක්වලින් ආ දෙවියෝ තුසිත දෙව්ලොව මුළුදුන්නාහුය. ඔවුහු සන්තුසිත මහබෝසත් දෙව්රජු වෙත ගොස් මෙසේ ඇරයුම් කළාහුය.
“නිදුකාණෙනි, නුඹවහන්සේ විසින් අසංඛෙය්ය කල්ප ගණන් සැරිසරා දස පෙරුම්දම් පුරා නිමකරන ලද්දේය. ඒ අන් කිසිවකට නොව භවදුකින් පීඩිත ලෝසත එදුකින් නිදහස් කරනු පිණිස ය. නිදුකාණෙනි, මේ තොපගේ කාලය යි.
🙏 කාලෝ’යං තේ මහාවීර - උප්පජ්ජ මාතුකුච්ඡියං
සදේවකං තාරයන්තෝ - බුජ්ඣස්සු අමතං පදං
මහා වීරයාණෙනි,
මේ පැමිණියේ තොපගේ කාලය යි
උපදිනු මැනව මව්කුසෙක මනුලොවෙහි
දෙවියන් සහිත ලෝසත
එතෙර කරවමින් සසර සයුරින්
අවබෝධ කළ මැනව
අමතපදය නම් ඒ අමනිවන”
🌻 මහබෝසත් තෙමේ පස්මහ බැලුම් බලයි.
දසදහස් සක්වල දෙවියන් ඇරයුම් කළ පමණකින් මහබෝසත් තෙමේ ඇරයුම භාරගන්ට කලබල නොවූයේය. ඔහුට කිසි කලබලයක් නැත්තේය. නැණවතා කලබල නොවී ඇති තතු විමසයි. හේ නුවණින් විමසීය. ‘බුදුකෙනෙකුන් පහළ වීමේ අවස්ථාවක් මෙකල ලොවෙහි තිබෙයි ද? බුදුවරුන් පහළ වන්නේ කවර රටක ද? කවර පෙදෙසක ද? කවර කුලයක ද? බුදුකෙනෙකු යම් මව්කුසක පිළිසිඳ ගනියි නම් ඒ මව්තොමෝ දැන් මනුලොව සිටින්නී ද?’ වශයෙන් කාලයත්, ද්වීපයත්, දේශයත්, කුලයත්, මවත් යන මේ පස් කරුණ මනාව විමසා බැලීය. .....................
............... අප මහබෝසත් දෙව්රජ බුදුබව පිණිස උපදින්ට සුදුසු කාලයත්, තමා ඉපදිය යුතු රටත්, උපදින ප්රදේශයත්, උපදින කුලයත්, පිළිසිඳ ගතයුතු කුස ඇති මෑණියනුත් මනාව හඳුනාගන්ට සමත් වූයේය. ඒ සියලු කරුණු ඉතා සුදුසු අයුරින් සැකසී තිබුණි. අනතුරුව සන්තුසිත දෙව්රජ දසදහසක් සක්වල දෙවියන් විසින් මනුලොව උපදිනු පිණිස කරනු ලැබූ ඇරයුම පිළිගත්තේය.
🌻 මහමායා දේවිය සොඳුරු සිහිනයක් දකියි.
සිහිනය යනු අපූරු දෙයකි. සිහිනයෙන් අනාගතය පෙනෙයි. අනතුරු පෙනෙයි. යහපත පෙනෙයි. බොහෝ තොරතුරු දැක්වීමේ හැකියාව ඇතැම් සිහිනවලට ඇත්තේය. එනිසා ම එකල ස්වප්න ශාස්ත්රය නමින් වෙන ම
විෂයක් දියුණු කොට තිබුණේය. සිහිනයක් දුටු කල්හි එය ජීවිතයට සම්බන්ධ සුවිශේෂී දෙයක් නම් සිතෙහි කාවදියි. සාමාන්යයෙන් පෙනෙන සිහින අවදි වූ විට අමතක ය. මහමායා බිසව ද සිය ජීවිතය පිළිබඳව අපූරු සිහිනයක් දුටුවාය.
ඒ ඇසළ පොහෝ දවසෙකි. ශාක්ය රාජධානියේ ඇසළ නැකැත් කෙළිය නමින් සත් දිනක මහා සැණකෙළියක් පැවැතුණේය. එය නිමා වූ ඇසළ පොහෝ දා මහාමායා දේවී තොමෝ සිය රාජවංශයේ චාරිත්රානුකූලව මහදන් දී, දවස පුරා පෙහෙවස් සමාදන් ව සිරියහනෙහි සැතපී සිටින්නී සුව නින්දට වැටුණාය.
මැදියම් රැයෙහි ඕ සොඳුරු සිහිනයක් දකියි. එය ඉතා මනරම් ස්වප්නයකි. ධතරාෂ්ට්ර, විරූඪ, විරූපාක්ෂ, වෛශ්රවණ යන සිව්වරම් දෙව්මහරජවරු සිව් දිශාවෙන් පැමිණියෝය. පැමිණ ඇය සැතපී හුන් සිරියහන සිව්කොණින් ඔසොවා අහසින් ගොස් හිමාල පර්වත මුදුනෙහි පිහිටි අනවතප්ත විල්තෙර රත් ගල්තලායෙහි මල් පිපී ගිය මහා සල්රුක් සෙවණක තැබුවෝය. එකෙණෙහි ආවෝ ඒ සිව්මහරජුන්ගේ අගමෙහෙසියෝ ය. අගමෙහෙසි දෙව්අඟනෝ ඇය නැගිටුවා අනවතප්ත විලට කැඳවාගෙන ගොස් ස්නානය කරවා, දිවසළුපිළි හඳවා, දිව සුවඳ ගල්වා, දිවමල්මාලා පළඳවා, දිවමල් අතුළ යහනෙහි සැතැපුවෝය. ඈ මල් යහනෙහි සුවසේ සැතැපී හුන්නාය. එසඳ රිදී පැහැයෙන් දිලෙමින් සිඟිති ඇත්පොව්වෙක් එනු ඇයට පෙනුණි. සිඟිති ඇත්සොඬින් සුදුනෙළුමක් දරා ඔසොවා සිටියේය. හේ රන් පව්වට නැග ඉන් බැස, රිදී පව්වට නැග ඉන් බැස උතුරු දෙසින් පැමිණියේය. දේවිය වෙත අවුත් සිඟිති සොඬ ඔසොවා කුංචනාද කළේය. දේවිය වටා තුන්වරක් පැදකුණු කළේය. අනතුරුව ඇයගේ දකුණැලයෙන් කුසට ඇතුළුවන බවක් දැනී ගියේය.
ඕ වහා අවදි ව නෙත් හැර බැලුවාය. ‘හෝ.... මෙය ස්වප්නයකි!’ ලෝසත භවදුකින් මුදවනු වස් සාරාසංඛෙය්ය කල්ප ලක්ෂයක් මුළුල්ලෙහි අප්රමාණ කැපවීමකින් පෙරුම් පුරා ගමනාන්තයට පැමිණි මහා පුරුෂයෙකු තුසිත දෙව්ලොවින් චුත ව මනුලොව මව්කුස පිළිසිඳගත් උතුම් මොහොත එය ය.
🌻 සිහින පලාපල
බුදුබව ලබන මහාපුරුෂයෙකු සිය කුසෙහි පිළිසිඳගෙන ඇති වග ඕ නොදත්තාය. උදෑසනින් ම සුදොවුන් රජුට තමා දුටු සිහිනය සැළකොට සිටියාය. සුදොවුන් නිරිඳු තෙමේ සිය අගමෙහෙසිය දුටු ස්වප්නයෙහි ගුණදොස් දැනගනු පිණිස ත්රිවේදයෙහි පරතෙර පත් පණ්ඩිත බ්රාහ්මණයන් කැඳවා විමසීය. බමුණෝ සිහින පලාපල පවසා සිටියෝය.
“මහරජාණෙනි, මෙය නම් ඉතා ම සුභ සිහිනයෙකි. අපගේ දේවීන්වහන්සේගේ කුස තුළ මහපිනැති පුත්-රුවනක් පිළිසිඳ ගත්තේය. හේ මහානුභාව සම්පන්න ය. ගිහිගෙහි රැඳුනහොත් සිව්මහා දිවයිනට අධිපති සක්විති මහාරාජයෙක් වන්නේය. ඉදින් ගිහිගෙයින් නික්ම පැවිදි වුවහොත් කෙලෙසුන් නසා මහා ධර්මරාජයෙක් වන්නේය” යනුවෙනි.
සුදොවුන් රජුත් මහමායා දේවියත් සියලු ශාක්ය වංශිකයෝත් සිය වංශය බබුළුවන මහපිනැති පුත්රුවනක් පිළිසිඳ ගත් වග දැන අපමණ උද්දාමයට පත්වූවාහුය. රජතුමා මහමායා දේවිය උදෙසා ගබ්පෙළහර පවත්වන ලද්දේය.
✍️ (උපුටා ගැනීම - අතිපූජ්ය කිරිබත්ගොඩ ඤාණානන්ද ස්වාමීන් වහන්සේ විසින් රචිත අච්ඡරිය මනුස්සෝ ග්රන්ථයෙනි)
4 days ago | [YT] | 764
View 18 replies
Mahamevnawa
භාග්යවතුන් වහන්සේ ශාක්ය රාජධානියෙහි කපිලවස්තුයෙහි නිග්රෝධාරාමයෙහි වැඩවසන සමයක බොහෝ ශාක්ය උපාසකවරු පොහෝ දිනයක් වූ එදින භාග්යවතුන් වහන්සේ යම් තැනක වැඩසිටි සේක් ද, එතැනට පැමිණියාහු ය. පැමිණ භාග්යවතුන් වහන්සේට සකසා වන්දනා කොට එකත්පස් ව හිඳගත්තාහු ය. එකත්පස් ව හුන් ශාක්ය උපාසකවරුන් ගෙන් භාග්යවතුන් වහන්සේ මෙය ඇසූ සේක.
“ශාක්යවරුනි, ඔබ අෂ්ටාංගයෙන් යුක්ත වූ උපෝසථ සිල් සමාදන් ව වසව් ද?”
“ස්වාමීනී, ඇතැම් දවස්වල අපි අෂ්ටාංග උපෝසථ සිල් සමාදන් ව වසමු. ඇතැම් දවස්වල නොවසමු.”
“ශාක්යවරුනි, එය ඔබට අලාභයෙක් ම ය. එය ඔබට නපුරු ලැබීමෙක් ම ය. මෙබඳු වූ ශෝක, භය සහිත ජීවිතයක් ඇති කල්හී, මරණ භය සහිත ජීවිතයක් ඇති කල්හී, ඇතැම් දිනෙක පමණක් අෂ්ටාංග උපෝසථ සිල් සමාදන් වූවාහු ය. ඇතැම් දිනෙක සමාදන් නොවූවාහු ය. ශාක්යවරුනි, ඒ කිමැයි හඟිව් ද? මෙහිලා පුරුෂයෙක් කිසියම් රැකියාවකින් පාඩු නොලබන්නේ නම්, දිනකට අඩ කහවණුවක් උපයන්නේ නම් ඔහු දක්ෂ පුරුෂයෙක් ය, නැගී සිටි වීරියෙන් යුතු කෙනෙක් ය කියා කීමට සුදුසු වෙයි ද?” “එසේ ය, ස්වාමීනී”
“ශාක්යවරුනි, ඒ කිමැයි හඟිව් ද? මෙහිලා පුරුෂයෙක් කිසියම් රැකියාවකින් පාඩු නොලබන්නේ නම්, දිනෙකට කහවණුවක් උපයන්නේ නම් ඔහු දක්ෂ පුරුෂයෙක් ය, නැගී සිටි වීරියෙන් යුතු කෙනෙක් ය කියා කීමට සුදුසු වෙයි ද?” “එසේ ය, ස්වාමීනී”
“ශාක්යවරුනි, ඒ කිමැයි හඟිව් ද? මෙහිලා පුරුෂයෙක් කිසියම් රැකියාවකින් පාඩු නොලබන්නේ නම්, දිනෙකට කහවණු දෙකක් උපයන්නේ නම් ….(පෙ)…. කහවණු තුනක් උපයන්නේ නම් ….(පෙ)…. කහවණු හතරක් උපයන්නේ නම් ….(පෙ)…. කහවණු පහක් උපයන්නේ නම් ….(පෙ)…. කහවණු හයක් උපයන්නේ නම් ….(පෙ)…. කහවණු හතක් උපයන්නේ නම් ….(පෙ)…. කහවණු අටක් උපයන්නේ නම් ….(පෙ)…. කහවණු නවයක් උපයන්නේ නම් ….(පෙ)…. කහවණු දහයක් උපයන්නේ නම් ….(පෙ)…. කහවණු විස්සක් උපයන්නේ නම් ….(පෙ)…. කහවණු තිහක් උපයන්නේ නම් ….(පෙ)…. කහවුණු හතළිහක් උපයන්නේ නම් ….(පෙ)…. කහවණු පනහක් උපයන්නේ නම් ඔහු දක්ෂ පුරුෂයෙක් ය, නැගී සිටි වීරියෙන් යුතු කෙනෙක් ය කියා කීමට සුදුසු වෙයි ද?” “එසේ ය, ස්වාමීනී”
“ශාක්යවරුනි, ඒ කිමැයි හඟිව් ද? ඉදින් ඒ පුරුෂයා දවසක් දවසක් පාසා කහවණු සියයක්, කහවණු දහසක් උපයන්නේ ඒ ලද ලද කහවණු රැස් කරන්නේ සියවසක් ආයු ඇති ඒ තැනැත්තා සියවසක් ජීවිතය ගෙවද්දී මහත් වූ භෝග ස්කන්ධයකට හිමිකරුවෙක් වන්නේ ද?” “එසේ ය, ස්වාමීනී”
“ශාක්යවරුනි, ඒ කිමැයි හඟිව් ද? ඉදින් ඒ පුරුෂයා ඒ භෝග හේතුවෙන් ඒ ධන සම්පත් හේතුවෙන්, ඒ භෝග සම්පත් හේතුවෙන් එක රැයක් වේවා, එක් දහවලක් වේවා, අඩ රැයක් වේවා, අඩ දවසක් වේවා ඒකාන්තයෙන් ම පිරිපුන් ලෙස සැප විඳිනසුළු ව වාසය කරන්නේ ද?” “ස්වාමීනී, එසේ නොවේ ම ය.”
“එයට හේතුව කුමක් ද?”
“ස්වාමීනී, කාමයෝ වනාහී අනිත්යයහ. හිස් දෙයකි. බොරුවෙකි. නැසෙනසුළු ස්වභාව ඇති දෙයකි.”
“ශාක්යවරුනි, මෙහිලා මාගේ ශ්රාවකයෙක් දස වර්ෂයක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහස් වසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, දස වසක් තිබේවා! මෙහිලා මාගේ ශ්රාවකයෙක් නව වසක් ….(පෙ)…. අට වසක් ….(පෙ)…. සත් වසක් ….(පෙ)…. සය වසක් ….(පෙ)…. පස් වසක් ….(පෙ)…. සිව් වසක් ….(පෙ)…. තුන් වසක් ….(පෙ)…. දෙවසක් ….(පෙ)…. එක් වසක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහස් වසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, එක් වසක් තිබේවා! මෙහිලා මාගේ ශ්රාවකයෙක් දස මසක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, දස මසක් තිබේවා! මෙහිලා මාගේ ශ්රාවකයෙක් නව මසක් ….(පෙ)…. අට මසක් ….(පෙ)…. සත් මසක් ….(පෙ)…. හය මසක් ….(පෙ)…. පස් මසක් ….(පෙ)…. සාර මසක් ….(පෙ)…. තුන් මසක් ….(පෙ)…. දෙමසක් ….(පෙ)…. එක් මසක් ….(පෙ)…. අඩමසක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, අඩ මසක් තිබේවා! මෙහිලා මාගේ ශ්රාවකයෙක් දස රෑ දහවලක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, දස රෑ දහවලක් තිබේවා! මෙහිලා මාගේ ශ්රාවකයෙක් රෑ දහවල් නවයක් ….(පෙ)…. රෑ දහවල් අටක් ….(පෙ)…. රෑ දහවල් සතක් ….(පෙ)…. රෑ දහවල් හයක් ….(පෙ)…. රෑ දහවල් පහක් ….(පෙ)…. රෑ දහවල් සතරක් ….(පෙ)…. රෑ දහවල් තුනක් ….(පෙ)…. රෑ දහවල් දෙකක් ….(පෙ)…. එක් රෑ දහවලක් අප්රමාදී ව කෙලෙස් තවන වීර්යයෙන්, කාය ජීවිත දෙකෙහි අනපේක්ෂිත ව වාසය කරමින් මා විසින් යම් අයුරකින් අවවාද කරන ලද්දේ ද, ඒ අයුරින් ම පිළිපදියි නම්, ඒ තැනැත්තා සියක් වසක් ද, දස දහසක් ද, සිය දහස් වසක් ද, සියවස් සිය දහසක් ද ඒකාන්ත සැපයක් විඳිමින් වාසය කරන්නේ ය. එමෙන් ම ඔහු සකදාගාමී වූ කෙනෙක් හෝ අනාගාමී වූ කෙනෙක් හෝ වෙයි. නොවැරදීම සෝවාන් හෝ වෙයි.
ශාක්යවරුනි, එය ඔබට අලාභයෙක් ම ය. එය ඔබට නපුරු ලැබීමෙක් ම ය. මෙබඳු වූ ශෝක භය සහිත ජීවිතයක් ඇති කල්හී, මරණ භය සහිත ජීවිතයක් ඇති කල්හී, ඇතැම් දිනෙක පමණක් අෂ්ටාංග උපෝසථ සිල් සමාදන් වූවාහු ය. ඇතැම් දිනෙක සමාදන් නොවූවාහු ය.”
“ස්වාමීනී, ඒ අපි අද පටන් අෂ්ටාංග උපෝසථ සීලය සමාදන් ව වසන්නෙමු.”
සාදු! සාදු!! සාදු!!!
(සක්ය සුත්ත - අං.නි. 6)
4 days ago (edited) | [YT] | 327
View 5 replies
Mahamevnawa
ඇසළ සඳේ සඳ එළියෙන්... (වන්දනා කවි)
5 days ago | [YT] | 23
View 0 replies
Mahamevnawa
භාග්යවත් බුදුරජාණන් වහන්සේගේ මංගල දම් දෙසුම හෙවත් ප්රථම ධර්ම දේශනාව වන්නේ දම්සක් පැවතුම් සුතුර, ධම්මචක්ක සුත්රය වැනි නම්වලින් හඳුන්වනු ලබන ධම්මචක්කප්පවත්තන සූත්රය යි.
එම උතුම් දෙසුම අතිපූජ්ය කිරිබත්ගොඩ ඤාණානන්ද ස්වාමීන් වහන්සේ විසින් සිංහල බසින් සිදුකරන මෙම ඉතා සුමධුර සජ්ඣායනය ඔබත් සැදැහැ සිතින් අසන්න. ඒ නිරාමිස දහම් රසය විඳින්න. ඔබේ හිත මිතුරන්ටත් අසන්නට සලස්වන්න.
ඇසළ පුන් පොහෝ දිනක බරණැස ඉසිපතන මිගදායේදී පස්වග භික්ෂූන් වහන්සේලාට දෙසූ දම්සක් දෙසුම අසා කොණ්ඩඤ්ඤයන් වහන්සේ සෝවාන් ඵලයට පත් වූහ. මේ ලෝකයට ධර්ම රත්නයත්, ඒ ධර්මය අවබෝධ කළ සංඝ රත්නයත් බිහිවූයේ මෙම උතුම් දෙසුමෙන් ය.
6 days ago | [YT] | 31
View 0 replies
Mahamevnawa
🌦️ වස්සානයේ සුමධුර සද්ධර්ම වර්ෂා 🙏
මේ සුපින්බර වස්සාන සමයේ පොල්ගහවෙල මහමෙව්නාව භාවනා අසපුවෙහි පැවැත්වෙන ධර්ම දේශනා මාලාව.
📅 සෙනසුරාදා දිනයන්හි සවස 4.00 සිට 5.30 දක්වා
අගෝස්තු 08 - පින්වත් අංකුඹුරේ අමිතදීප ස්වාමීන් වහන්සේ
අගෝස්තු 22 - පින්වත් බණ්ඩාරවෙල සන්තදීප ස්වාමීන් වහන්සේ
සැප්තැම්බර් 05 - පින්වත් මතුරට නිමලධජ ස්වාමීන් වහන්සේ
සැප්තැම්බර් 12 - පින්වත් තලාවේ සෝමමෛත්රී ස්වාමීන් වහන්සේ
ඔක්තෝබර් 03 - පින්වත් නාලන්දේ පවර ස්වාමීන් වහන්සේ
ඔක්තෝබර් 10 - පින්වත් කුරුණෑගල ධම්මාරාම ස්වාමීන් වහන්සේ
ඔක්තෝබර් 24 - පින්වත් සෙවනගල උදිතානන්ද ස්වාමීන් වහන්සේ
⏰සෑම සෙනසුරාදා දිනක ම සවස 6.00 ට
සිරි ගෞතම බෝධි වන්දනාව පැවැත්වේ.
🌻 නොවැම්බර් 01 - කඨිනානිශංස ධර්ම දේශනාව
පින්වත් වැලිමඩ සද්ධාසීල ස්වාමීන් වහන්සේ විසින් පැවැත්වීමට නියමිතයි.
සදහම් අමා වැස්සෙන් ඔබේ සිත් සතන් නිවා සනසා ගන්නට, දහම් රස විඳින්නට ඔබ සැමට මෙත් සිතින් ආරාධනා!
📞විමසීම්: 037 22 44 602
#wassanadeshana #mahamevnawa #polgahawela
6 days ago | [YT] | 501
View 21 replies
Mahamevnawa
ජූලි 18 වන සෙනසුරාදා "දම්සුවඳ" සදහම් වැඩසටහනට සහභාගී වන ඔබට මෙම ග්රන්ථය ධර්මදානයක් ලෙස නොමිලේ ලබාගත හැකියි.
#damsuwanda #welimadasaddhaseelathero #Mahamevnawa #polgahawela
2 weeks ago | [YT] | 1,469
View 39 replies
Mahamevnawa
#wisdomforyouth #mahamevnawa #youthprogram
2 weeks ago | [YT] | 154
View 3 replies
Mahamevnawa
අයදුම්පත 👉 mahamevnawa.lk/meditation-program-1/
වැඩි විස්තර සඳහා අමතන්න…
037 22 44 602
074 297 4674
071 111 54 88
#SathiBhawana #meditation #MeditationProgram #Mahamevnawa
2 weeks ago | [YT] | 480
View 4 replies
Load more