DHAMMA KARMA CHANNEL

🙏🙏🙏🙏🙏🙏🙏🙏🙏🙏

🪷" နိဗ္ဗိန္ဒဉာဏ် "🪷

လောကမှာ သက်ရှိ သက်မဲ့ အရာအားလုံးဟာ
"သင်္ခါရ" တရားတွေပဲ ။

မိမိတို့သန္တာန်မှာ ရှိတဲ့
သဘောတရား လေးတွေကလည်း"သင်္ခါရ" တရားတွေပါပဲ ။

ဘာကြောင့်သင်္ခါရလို့ ပြောရတာလဲ ဆိုတော့
"အကြောင်းကြောင့် ဖြစ်လာတဲ့ အကျိုးတွေ" မို့
သင်္ခါရ တရားလို့ ခေါ်ပါတယ်။

ရုပ်ဓမ္မကိုပဲ ကြည့်ကြည့်၊
နာမ်ဓမ္မကိုပဲ ကြည့်ကြည့်၊
အားလုံးဟာ အကြောင်းကြောင့် ဖြစ်တဲ့ အကျိုးတရားတွေ ချည်းပါပဲ။
အကြောင်း မပါပဲ ဖြစ်လာတာ
တစ်ခုမှ မရှိပါဘူး။

အဲဒီ သင်္ခါရ တရားတွေဟာ
အနိစ္စ မမြဲပါဘူး၊
ပျက်စီးတတ် ပါတယ်တဲ့။

ဘုန်းကြီးတို့ ပရိတ်သတ်တွေဟာ ဝိပဿနာတရားအားထုတ်တဲ့ နေရာမှာ

ပထမဆုံး, သင်္ခါရ တရားကို
မြင်အောင် ကြည့်ရပါမယ်၊
ဒုတိယ, အနိစ္စ မမြဲတဲ့ သဘောကို မြင်အောင် ကြည့်ရပါမယ်။

ထွက်လေလေး ဖြစ်လာခြင်းသည် ဝင်လေ ပျက်သွားလို့သာ ဖြစ်တယ်၊
ဝင်လေ မပျက်ရင် ထွက်လေ မဖြစ်နိုင်ပါဘူး။
ဒါကြောင့် ဝင်လေ ပျက်ခြင်းက အကြောင်းတရား၊
ထွက်လေ ဖြစ်ခြင်းက အကျိုးတရားပါပဲ။

ထိုနည်းအတိုင်းပါပဲ၊
ထွက်လေ ပျက်သွားခြင်းက အကြောင်းတရား၊
ဝင်လေ ဖြစ်လာခြင်းက အကျိုးတရားပါ။

ဝင်လေကလည်း ဖြစ်ပြီး ပျက်တယ်၊ထွက်လေကလည်း ဖြစ်ပြီးတော့ ပျက်တယ်၊
ဒီသဘောလေးကို စိတ်ထဲ မြင်အောင် ကြည့်ပေးရင်
ရုပ်ရဲ့ ဖြစ်ပျက် သဘောကို မြင်ပါလိမ့်မယ်၊

ဝင်လေ ထွက်လေရဲ့ သဘောကို သိ,သိ, ပေးနေတာက နာမ်ရဲ့သဘောပါ၊

သိမှုဆိုတဲ့ နာမ်တရား လေးကလည်း တစ်ခု သိလိုက် ပျက်သွားလိုက်နဲ့ အမြဲတမ်းဖောက်ပြန် ပျက်စီး နေပါတယ်။

ဪ..ဒါလေးက ရုပ်တရား၊ ဖြစ်ပြီး ပျက်တယ်၊
ဒါလေးကလည်း နာမ်တရား၊ ဖြစ်ပြီး ပျက်တယ်၊
အဲဒီလို သိလိုက်မယ် ဆိုရင်

ရုပ်တရား နာမ်တရားကို သိတာက သင်္ခါရကို သိတယ်လို့ ခေါ်ပါတယ်၊ပျက်တဲ့ သဘောလေးကို သိတာက
အနိစ္စကို သိတယ်လို့ ခေါ်ပါတယ်၊

ဒီလို သိလိုက်ပြီဆိုရင်
“သဗ္ဗေ သင်္ခါရာ အနိစ္စာ” တဲ့၊
“ အလုံးစုံသော သင်္ခါရ တရားတွေဟာ မမြဲတဲ့ အနိစ္စ သဘောတွေပါလား “ လို့ သိလာတယ်။

အဲဒီလို သဘော ပေါက်လာတာကို ဉာဏ်လို့ ခေါ်တယ်၊ ပညာလို့ ခေါ်ပါတယ်၊
ဒီလို သိတာဟာ ပညာက သိတာပါ၊

ရုပ်နာမ်တို့ရဲ့ ဖြစ်ပျက်က "ဒုက္ခသစ္စာ"၊သိတဲ့ ဉာဏ်လေးက "မဂ္ဂသစ္စာ" လေးပဲ၊
အဲဒါ မဂ္ဂင်ဉာဏ်လေး ပေါ်နေတာပါပဲ။

ရုပ်တရားက ဖြစ်ပြီး ပျက်လို့ ဒုက္ခသစ္စာ၊နာမ်တရားကလည်း ဖြစ်ပြီး ပျက်လို့ ဒုက္ခသစ္စာ၊
ရုပ်နာမ် တရားတွေဟာ ဒုက္ခတရားတွေ ပါပဲလို့
ဉာဏ်နဲ့ ကြည့်ရင်း ကြည့်ရင်း ကနေပဲ အမြဲတမ်း ပျက်နေတဲ့ သဘောတရားတွေပါပဲလို့
သဘော ပေါက်သွားတဲ့ အတွက်

ရုပ်နာမ်တွေကို ကြည့်ရတာ
ငြီးငွေ့တဲ့ သဘောတွေ ဖြစ်လာတယ်၊
ရုပ်နာမ် အဖြစ်အပျက် တွေကို
ဉာဏ်နဲ့ ငြီးငွေ့လာတာ ဖြစ်တဲ့အတွက်
"နိဗ္ဗိန္ဒဉာဏ်" လို့ ခေါ်ပါတယ်။

အဲဒီအချိန်မှာ
ဉာဏ်ဟာ နိဗ္ဗာန်ကို ဦးတည်နေတဲ့ လမ်းကြောင်းပေါ်ကို ရောက်နေပါပြီ။

အဲဒီ လမ်းကြောင်းဟာ
မဂ္ဂင်ဆိုတဲ့ လမ်းကြောင်းပဲ ဖြစ်ပါတယ်၊

အဲဒီလမ်း အတိုင်း တသွေမတိမ်းဆက် လျှောက်ကြမယ် ဆိုရင်
ဒုက္ခငြိမ်းရာ နိဗ္ဗာန်ကို မုချ ရောက်မှာ ဖြစ်ပါတယ်။

ဒါကြောင့် ယောဂီတို့ တတွေဟာ မိမိတို့ သန္တာန်မှာ ရှိတဲ့
ရုပ်နာမ် သင်္ခါရသဘော၊
ပျက်ခြင်းဆိုတဲ့ အနိစ္စသဘောကို
မြင်အောင် ကြည့်ကြပါ။

အဲဒီလို ကြည့်ရင်းနဲ့
ဒါတွေဟာ ဒုက္ခသစ္စာ ပါပဲလို့
ဉာဏ်နဲ့ ပိုင်းခြားပြီး သိလိုက်တဲ့ အချိန်မှာ
ရုပ်ဓမ္မ နာမ်ဓမ္မ သင်္ခါရတရားတွေ အပေါ်မှာ
ငြီးငွေ့တဲ့ နိဗ္မိန္ဒဉာဏ်တွေ ပေါ်လာပါလိမ့်မယ်။

နိဗ္ဗိန္ဒဉာဏ် ပေါ်လာပြီ ဆိုရင်
ကိလေသာဆိုတဲ့ အကြောင်း သမုဒယသစ္စာ
သိမ်းတဲ့အတွက် အနာဂတ် ဒုက္ခသစ္စာတွေ ငြိမ်းပြီး
နိဗ္ဗာန်ဆိုတဲ့ ချမ်းသာစစ် ချမ်းသာမှန်ကို ရဖို့
သေချာ နေပါပြီလို့ သဘောပေါက်ပြီး
သာဓု ခေါ်လိုက်ကြပါ..။
🙏သာဓု🙏သာဓု🙏သာဓုပါဘုရား

🙏ကျိုက္ကလော့ဆရာတော်ဒေါက်တာဘဒ္ဒန္တစန္ဒာဝရာဘိဝံသ🙏
ထေရဝါဒ မိုးကုတ် ဓမ္မရိပ်သာ။

8 months ago | [YT] | 17